މަންޓާގެ ދަތުރުތައް މަޑިވަރަށް ފަށައިފި، އަމާޒަކީ މާފަރަށް ފެށުން

ރާއްޖޭގައި އެންމެ ފަހުން އެތެރޭގެ އުދުހުންތައް ފެށި އަމިއްލަ އެއާލައިން މަންޓާ އިން ޅ. މަޑިވަރަށް ދަތުރުތައް ފަށައިފި އެވެ.

އެ އެއާލައިންގެ ޑެޕިއުޓީ ސީއީއޯ އަހުމަދު މައުމޫން (މާނު) މިއަދު ވިދާޅުވީ، މިދިޔަ ޑިސެމްބަރު 22 ގައި މަޑިވަރަށް ދަތުރު ފެށި އިރު ކޮންމެ ދުވަހަކު ތިން ފްލައިޓު އަޅަން ތާވަލް ކޮށްފައިވާ ކަމަށެވެ.

"މިހާތަނަށް ޑިމާންޑު ވެސް ވަރަށް ރަނގަޅު،" މާނު ވިދާޅުވި އެވެ.

އޭނާ ވިދާޅުވީ، މަޑިވަރުގެ އިތުރުން ނ. މާފަރު އިންޓަނޭޝަނަލް އެއާޕޯޓަށް ދަތުރުތައް ފެށުމަށް ވެސް އެ އެއާލައިނުން ތައްޔާރު ވަމުން އަންނަ ކަމަށެވެ. އޭގެ ހުރިހާ ތައްޔާރީތަކެއް ވެފައިވާ އިރު، މިދިޔަ އަހަރު މަންޓާ އިން ވަނީ މާފަރު އެއާޕޯޓަށް ދަތުރުތައް ކުރަން އެ އެއާޕޯޓު ހިންގާ އައިލެންޑް އޭވިއޭޝަންގެ ހުއްދައަށް އެދިފަ އެވެ.

މާނު ވިދާޅުވިގޮތުގައި، އެ ހުއްދަ ލިބުނުހާ އަވަހަކަށް މަންޓާގެ ދަތުރުތައް މާފަރަށް ފަށާނެ އެވެ. އެ ކުންފުނީގެ އުންމީދަކީ މި މަހު އެ ދަތުރުތައް ފެށުމެވެ.

މަންޓާ އެއާއިން ވައިގެ ދަތުރުތައް ފެށީ 2019 ވަނަ އަހަރު އެވެ. އެންމެ ފުރަތަމަ ދަތުރުތައް ފެށީ ދ. ކުޑަހުވަދުއަށެވެ. އެ އެއާލައިނުން ވަނީ މިދިޔަ ހަތަރު އަހަރުގެ ތެރޭގައި ސީޕްލޭން އަދި ޑޮމެސްޓިކް ދަތުރުތައް ވެސް ވަރަށް ބޮޑަށް ފުޅާކޮށްފަ އެވެ.

މަންޓާ އެއާއިން މިވަގުތު އަންނަނީ ހަތަރު މަންޒިލަކަށް ދަތުރުތައް ކުރަމުންނެވެ. މަޑިވަރުގެ އިތުރުން އެ އެއާލައިނުން މިހާރު ދަތުރުތައް ކުރަނީ ކުޑަހުވަދު އާއި ބ. ދަރަވަންދު އާއި ރ. އިފުރަށެވެ. މަންޓާ އެއާގެ ފްލީޓުގައި 20 އެއާކްރާފްޓު އޮތް އިރު އޭގެ ތެރޭގައި ތިން އޭޓީއާރު ބޯޓު ވެސް ހިމެނެ އެވެ.