ރާއްޖޭގައި ހިންގާ އެންމެ މަތީ ފަންތީގެ ރިސޯޓުތަކުގެ ތެރޭގައި ހިމެނޭ، މާލެ އަތޮޅުގައި އޮންނަ ވޮލްޑޯފް އެސްޓޯރިއާ އިތާފުށި ރިސޯޓުގެ މުވައްޒަފުންނަށް މިދިޔަ މަހުގެ ސާވިސް ޗާޖުގެ ގޮތުގައި 4،177 ޑޮލަރު (64،409ރ.) ލިބިއްޖެ އެވެ.
ރިސޯޓް ވޯކާސް މޯލްޑިވްސްގެ ފޭސްބުކް ޕޭޖުގައިވާ ގޮތުން، ހަތް ތަރީގެ އިތާފުށި ރިސޯޓުގައި 600 އަށް ވުރެ ގިނަ މުވައްޒަފުން މަސައްކަތްކުރާއިރު، ކޮންމެ މުވައްޒަފަކަށް މިދިޔަ މަހުގެ ކޮންމެ ހަފްތާއަކު 16،000 އަށް ވުރެ ގިނަ ރުފިޔާ ވަނީ ލިބިފަ އެވެ.
ޔޫރަޕުގެ ގިނަ ގައުމުތަކަށް ފިނި މޫސުމަކީ ރާއްޖޭގެ ޓޫރިޒަމްގެ ޕީކް ސީޒަނެވެ. އެހެންވެ، ކޮންމެ އަހަރަކު، ރާއްޖެއަށް އެންމެ ގިނައިން ޓޫރިސްޓުން އަންނަ ޑިސެމްބަރާއި ޖެނުއަރީ މަހަކީ، ރިސޯޓު މުވައްޒަފުންނަށް ބޮޑެތި އަދަދުތަކުން ސާވިސް ޗާޖު ލިބޭ ދެ މަހެވެ.
މިދިޔަ މަހު، ރާއްޖޭގައި ހިންގާ އެންމެ މަތީ ފަންތީގެ ގިނަ ރިސޯޓުތަކުގެ މުވައްޒަފުންނަށް އެވްރެޖުކޮށް، 1،000 އަށް ވުރެ ގިނަ ޑޮލަރު ސާވިސް ޗާޖުގެ ގޮތުގައި ވަނީ ލިބިފަ އެވެ.
- ވަން އެންޑް އޮންލީ ރީތި ރަށް - 1،977 ޑޮލަރު
- ވެލާ ޕްރައިވެޓް އައިލެންޑް - 1،875.45 ޑޮލަރު
- ރިއު އެޓޯލް އެންޑް ޕެލެސް - 1،239.48 ޑޮލަރު
- ޖޭޑަބްލިޔު މެރިއަޓް - 1،158 ޑޮލަރު
- ޑަބްލިޔު މޯލްޑިވްސް - 1،135.80 ޑޮލަރު
- ސެންޓާރާ ގްރޭންޑް - 1،111 ޑޮލަރު
ރާއްޖޭގެ ހުރިހާ ޓޫރިސްޓް ފެސިލިޓީއަކުން ސާވިސް ޗާޖުގެ ގޮތުގައި 10 ޕަސެންޓު ނެގުން މިހާރު ވަނީ ގާނޫނީ ގޮތުން މަޖުބޫރު ކޮށްފަ އެވެ. ސާވިސް ޗާޖު ނުދީފި ނަމަ ވަޒީފާ ދޭ ފަރާތް ބައި ލައްކަ ރުފިޔާ އަށް ވުރެ ބޮޑު ނޫން އަދަދަކުން ޖޫރިމަނާ ކުރުމުގެ ބާރު ލޭބާ ރިލޭޝަންސް އޮތޯރިޓީ (އެލްއާރުއޭ) އަށް އޮވެ އެވެ.