ޓްރީ ޓޮޕް ހޮސްޕިޓަލުގެ އަށް ވަނަ އަހަރީ ދުވަހާއި ގުޅުވައި އެ ހޮސްޕިޓަލުން އަންހެނުންނާއި ފިރިހެނުންނަށް ހާއްސަކޮށްފައިވާ ހެލްތް ސްކްރީނިން ޕެކޭޖުތަކުން ޑިސްކައުންޓު ލިބޭ ހާއްސަ ޕްރޮމޯޝަނެއް ފަށައިފި އެވެ.
އެ ޕްރޮމޯޝަނުގެ ދަށުން އެ ހޮސްޕިޓަލުން ވެލް މޭލް ޕެކޭޖާއި ވެލް ވިމެން ޕެކޭޖުން މި މަހުގެ ނިޔަލަށް 20 ޕަސެންޓާއި ހަމައަށް ޑިސްކައުންޓު ލިބޭނެ އެވެ. ވެލް މޭލް ޕެކޭޖަކީ އާއްމުކޮށް ފިރިހެނުންނަށް ކުރިމަތިވާ އެކި ސިއްހީ މައްސަލަތައް ދެނެގަތުމަށް ހަދާ އެކި ޓެސްޓުތައް ހިމެނޭ ޕެކޭޖެކެވެ. އެ ޕެކޭޖުގައި ލޮލުގެ ފެނުމުގެ ޓެސްޓާއި ހަށިގަނޑުގެ ބަރުދަނައި ބީއެމްއައިގެ އިތުރުން ލޭގެ ޕްރެޝަރުގެ ޓެސްޓުތައް ހަދަ އެވެ. އޭގެ އިތުރުން ފުއްޕާމޭގެ އެކްސްރޭ އާއި އީސީޖީ ފަދަ އެކި ރޭޑިއޮލޮޖީ ޓެސްޓުތަކާއި ލޭ ނަގައިގެން ހަދާ ލެބޯޓްރީ ޓެސްޓުތައް ހިމެނެ އެވެ.
ޓްރީ ޓޮޕްގެ ވެލް ވުމަން ޕެކޭޖަކީ އަންހެނުންނަށް ކުރިމަތިވާ އެކި ސިއްހީ މައްސަލަތައް ދެނެގަތުމުގެ ގޮތުން ހަދާ އެކި ޓެސްޓުތައް ހިމެނޭ ޕެކޭޖެކެވެ. މި ޕެކޭޖުގައި ވެސް ލުގެ ފެނުމުގެ ޓެސްޓާއި ހަށިގަނޑުގެ ބަރުދަނައި ބީއެމްއައިގެ އިތުރުން ލޭގެ ޕްރެޝަރުގެ ޓެސްޓުތަކާއި ރޭޑިއޮލޮޖީ ހިދުމަތްތަކުގެ އިތުރުން ލެބޯޓްރީ ޓެސްޓުތައް ހިމެނެ އެވެ.
ޓްރީ ޓޮޕްގެ އަހަރީ ދުވަހަށް ހާއްސަ ކޮށްފައިވާ ޑިސްކައުންޓުގެ އިތުރުން މި މަހުގެ އަށް ވަނަ ދުވަހު ފާހަގަކުރާ އަންހެނުންގެ ދުވަހާ ގުޅިގެން އެ ދުވަހު ވެލް ވުމަށް ޕެކޭޖުން 25 ޕަސެންޓުގެ ޑިސްކައުންޓު ދިނުމަށް އެ ހޮސްޕިޓަލުން ވަނީ ނިންމާފަ އެވެ. އަދި މި މަހު ފާހަގަކުރާ އޯރަލް ހެލްތު ޑޭ އަށް ހާއްސަކޮށް ކަނޑައެޅިފައިވާ ޑެންޓަލް ހިދުމަތްތަކަށް 15 ޕަސެންޓުގެ ޑިސްކައުންޓު ލިބޭ ޕްރޮމޯޝަނެއް ފެށުމަށް ވެސް ވަނީ ހަމަޖެހިފަ އެވެ. އެ ޕްރޮމޯޝަން ކުރިއަށް ދާނީ މި މަހުގެ 15 ވަނަ ދުވަހުން 31 ވަނަ ދުވަހުގެ ނިޔަލަށެވެ. އެ ޕްރޮމޯޝަނުގައި ސްކޭލިން އާއި ފީޝާ ސީލަންޓު ފަދަ ހިދުމަތްތަކުން ޑިސްކައުންޓު ލިބޭނެ އެވެ.
ޓްރީ ޓޮޕް ހޮސްޕިޓަލަކީ ރާއްޖޭގައި ހުޅުވި ފުރަތަމަ ޓާޝިއަރީ ފެންވަރުގެ ހޮސްޕިޓަލެވެ. އެ ހޮސްޕިޓަލުގައި 30 އަށް ވުރެ ގިނަ ސްޕެޝަލިސްޓު ދާއިރާތަކުގެ ތަޖުރިބާކާރު ޑޮކްޓަރުންގެ ޓީމެއް މަސައްކަތް ކުރެ އެވެ. އައިސީޔޫ، ކެތު ލެބް، އެންއައިސީޔޫ، އެޗްޑީޔޫ، ފާޓިލިޓީ ސެންޓަރު، ޑަޔަލިސިސް އަދި ކީމޯތެރަޕީގެ ހިދުމަތް ދޭ އެ ހޮސްޕިޓަލުގައި 210 އެނދުގެ ކެޕޭސިޓީ ހުރެ އެވެ.