ގައުމީ އެއާލައިން، މޯލްޑިވިއަންގެ ސީޕްލޭން ޓާމިނަލް ޒަމާނީ ފެންވަަރަށް ތަރައްގީކޮށް މިއަދު ރަސްމީކޮށް ހުޅުވައިފި އެވެ.
ބޮޑެތި ބަދަލުތަކަކާ އެކު އެތަން ތަރައްގީކޮށްފައި ވަނީ ރާއްޖެއަށް ޒިޔާރަތްކުރާ ފަތުރުވެރިންނަށް، ޕްރިމިއަމް ހިދުމަތްތަކެއް ދެވޭނެ އެކި ފެސިލިޓީތަކާ އެކު އެވެ. އަދި ރާއްޖޭގެ ގުދުރަތީ ރީތި ކަމާއި ސަގާފަތް އެ ޓާމިނަލުން ދައްކުވައިދޭ ތީމަކަށެވެ.
ޓާމިނަލްގެ ޖާގަ މިހާރު ވަނީ ދެ ގުނަ ބޮޑުކޮށް، އެތެރޭގައި އެއްފަހަރާ 90 މީހުންނަށް އަދި ބޭރުގައި 40 މީހުންނަށް ހިދުމަތް ދެވޭނެ ގޮތަށް ހަދައިފަ އެެވެ.
އަދި ރާއްޖޭގެ މާހައުލާ ހުޅޭ ގޮތަށް ފަރުމާކޮށްފައިވާ އައުޓްޑޯ އޭރިއާއެއް އެ ޓާމިނަލުގައި ހިމެނެ އެވެ. އެތަނުގައި ކިޑްސް ޕްލޭ އޭރިއާއަކާއި ސުވެނިއާ އާއި ލުއިކާނާ ލިބޭނެ ހާއްސަ ކިއޮސްކެއް ވެސް ވަނީ ގާއިމުކޮށްފަ އެވެ. އަދި ބޯޓިން ގޭޓުގެ އަދަދު ވެސް ވަނީ އިތުރު ކޮށްފަ އެވެ. އޭގެ އިތުރުން އެތަނުގައި މޯލްޑިވިއަންގެ މުވައްޒަފުންނަށް ހާއްސަކޮށްފައިވާ ކެންޓީނެއް ވަނީ ގާއިމްކޮށްފަ އެވެ.
މޯލްޑިވިއަންގެ ސީޕްލޭން ޓާމިނަލް ހުޅުވަން ބޭއްވި ރަސްމިއްޔާތުގައި އައިލެންޑް އޭވިއޭޝިއަންގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ މިދިޔަ އަހަރު ތަރައްގީކުރަން ފެށި އެ މަޝްރޫއުގެ ދަށުން ތަނުގެ އިންޓީރިއާ އަދި އެކްސްޓީރިއާއަށް ބޮޑެތި ބަދަލުތަކެއް ގެނެސްފައިވާ ކަމަށެވެ.
އެއީ، ޓޫރިސްޓުން ރާއްޖޭގައި ކުރާ ތަޖުރިބާ އިތުރަށް ފުރިހަމަކުރަން ކުރެވުނު މުހިންމު މަސައްކަތެއް ކަމަށް އޭނާ ވިދާޅުވި އެވެ. އަދި ރާއްޖޭގެ ސީޕްލޭން ހިދުމަތްތައް ފުޅާކޮށް، ތަރައްގީކުރުމަށް ހިންގުނު މުހިންމު މަސައްކަތެއްގެ ގޮތުގައި ވެސް ސިފަކުރެއްވި އެވެ.
އިޔާސް ވިދާޅުވީ ސީޕްލޭން ހިދުމަތް ފުޅާކޮށް ތަރައްގީކުރަން އެ ކުންފުނިން ކުރާ މަސައްކަތްތަކުގެ ދަށުން ސީޕްލޭން ފްލީޓް އިތުރުކުރުމުގެ މަސައްކަތް ވެސް ކުރަމުން އަންނަ ކަމަށެވެ. އެގޮތުން މިދިޔަ މަހު އެންމެ ފަހުގެ ދެ ޓުވިން އޮޓާ ކްލެސިކް މަތިންދާ ބޯޓަށް އޯޑަރު ދީފައިވާ ކަމަށާއި އެ ދެ ބޯޓު އަންނަ އަހަރު ރާއްޖެ ގެނެސް، ހިދުމަތް ދެވެން ފެށޭނެ ކަމަށް ވިދާޅުވި އެވެ.
އެ ރަސްމިއްޔާތުގައި ޓޫރިޒަމް މިނިސްޓަރު މުހައްމަދު އަމީން ވަނީ ކުންފުނީގެ މާލީ ހާލަތު ރަނގަޅުވަމުން އަންނަ ކަން ފާހަގަކުރައްވައިފަ އެވެ. ވޭތުވެދިޔަ ތިން އަހަރެއްހާ ދުވަހުގެ ތެރޭގައި އާ މޮޑެލްއަކަށް ހިދުމަތްތައް ބަދަލުކުރެވި، ކުންފުނީގެ އެސެޓުތައް އިތުރުކޮށް، އިންފްރާސްޓްރަކްޗާ ތަރައްގީކުރުމުގެ މުހިންމު މަސައްކަތްތަކެއް ކުރަމުން އަންނަ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި މޯލްޑިވިއަންގެ ހައިބަތު ފެންނަން ހުންނާނެ ފަދަ އޮފީސް އިމާރާތުގެ މަސައްކަތް ހަލުވިކަމާއެކު ކުރިއަށް އެބަދެ އެވެ.
މޯލްޑިވިއަން އިން ސީޕްލޭންގެ ހިދުމަތް 2014 ވަނަ އަހަރުގެ އޭޕްރިލް މަހު ފެށި އިރު، އެކުންފުނީގެ ސީޕްލޭން ޓާމިނަލް ހުޅުވީ 2015 ވަނަ އަހަރު އެވެ. އެކުންފުނީގެ ސީޕްލޭން ފްލީޓުގައި ޓުވިން އޮޓާ 11 މަތިންދާބޯޓު އޮވެ އެވެ.