ދުނިޔޭގެ ފަތުރުވެރިކަމުގެ ދުވަހާއި ގައުމީ ފަތުރުވެރިކަމުގެ ދުވަހާ ގުޅުވައިގެން ރާއްޖޭގެ ސަފާރީ އުޅަނދުފަހަރު ނުވަތަ ލިވަބޯޑު ދާއިރާގައި ދިވެހި އަންހެނުންނަށް އިތުރު ފުރުސަތުތައް ފަހިކޮށްދިނުމުގެ ހާއްސަ މަސައްކަތްތަކެއް މޯލްޑިވްސް ލެޖެންޑުން ފަށައިފި އެވެ.
މޯލްޑިވްސް ލެޖެންޑްއަކީ ރާއްޖޭގެ ކަނޑުފަޅުތަކުގެ ގުދުރަތީ ރީތިކަމާއި ދިވެހިންގެ މެހެމާންދާރީ ތަޖުރިބާ ކުރެވޭނެ ފަދަ ހިދުމަތްތަކެއް ފޯރުކޮށްދޭ، މޯލްޑިވްސް ހޮލިޑޭ ކަލެކްޝަންސްގެ ދަށުން ހިންގާ ދިވެހި ބްރޭންޑެކެވެ.
ޓޫރިޒަމްގެ ދާއިރާއިން އަންހެނުންނަށް އިތުރު ފުރުސަތުތައް ހޯދައިދިނުމަށް މޯލްޑިވްސް ލެޖެންޑުން އިސްނެގުމަކީ މި މަހުގެ މެދުތެރޭގައި ދަތުރުތައް ފެށުމަށް ހަމަޖެހިފައިވާ އެ ބްރޭންޑުގެ އެންމެ އާ އުޅަނދު 'މޯލްޑިވްސް ލެޖެންޑު ވައި' އިފްތިތާހުކުރުމުގެ ކުރިން ފަށާފައިވާ މަސައްކަތެކެވެ.
މި އުޅަނދުގެ ފަޅުވެރިންގެ ގޮތުގައި އަންހެނުންނަށް ފުރުސަތު ދިނުމުގެ އިތުރުން، ވަޒީފާގެ މާހައުލުގައި ތަމްރީނާއި ހުނަރު ކުރިއެރުވުމަށް ރޭވުންތެރި އަދި ދާއިމީ ވަޒީފާތަކެއް މި އުޅަނދު މެދުވެރިކޮށް ދިވެހި އަންހެނުންނަށް ފަހިވާނެ ކަމަށް މޯލްޑިވްސް ލެޖެންޑުން ބުންޏެވެ.
މޯލްޑިވްސް ލެޖެންޑުން ގަބޫލުކުރާ ގޮތުގައި ރާއްޖޭގެ ޓޫރިޒަމްގެ ސިނާއަތް އިތުރަށް ތަރައްގީ ކުރަންވާނީ، ދިވެހިންނަށް އެ ދާއިރާގެ އެކި މަގާމުތަކުގައި ހަރަކާތްތެރިވެ، އިސް ސަފުގައި އުޅުމުގެ ރަނގަޅު ފުރުސަތުތަކެއް ފަހިކޮށްދީގެންނެވެ. އަދި ރާއްޖޭގެ ފަތުރުވެރިކަމުގެ ދާއިރާގައި އަންހެނުން އަދާކުރާ ދައުރު ފުޅާވެފައި ވިޔަސް ސަފާރީތަކުގައި މަސައްކަތްކުރާ އަންހެނުން ނިސްބަތުން މަދުކަން އެ ކުންފުނިން ފާހަގަކުރެ އެވެ.
މޯލްޑިވްސް ލެޖެންޑުގެ އުންމީދަކީ މި މަސައްކަތުގެ ތެރެއިން، ފަތުރުވެރިކަމުގެ ސިނާއަތުގައި ދިގު މުއްދަތަކަށް މަސައްކަތްކުރަން ބޭނުންވާ އަންހެނުންނަށް ކުރިއަށް ދިއުމަށް އާ ފުރުސަތުތަކެއް ލިބުމެވެ.
މޯލްޑިވްސް ލެޖެންޑުން ނެރުނު ނޫސްބަޔާނުގައި ބުނީ ރާއްޖޭގެ ފަތުރުވެރިކަމުގެ މުސްތަގުބަލަކީ އެންމެންނަށް ހަމަހަމަ ފުރުސަތުތަކެއް ފަހިވެފައިވާ ދާއިރާއަކަށް ވުން ކަމަށެވެ. އަދި ދުނިޔޭގެ ފަތުރުވެރިކަމުގެ ދުވަހާއި ގައުމީ ފަތުރުވެރިކަމުގެ ދުވަސް ފާހަގަކުރާ އިރު، މޯލްޑިވްސް ލެޖެންޑުގެ އަމާޒަކީ ހަމައެކަނި މިހާތަނަށް ހާސިލް ކުރެވިފައިވާ ކަންކަން ފާހަގަކުރުމުގެ ބަދަލުގައި، މި ދާއިރާގެ ކުރިއަށް އޮތް ބާބު ބައްޓަންކުރާނެ ފަރާތްތަކަށް އިސްކަންދިނުން ކަމަށްވެސް ބުންޏެވެ.
"މޯލްޑިވްސް ލެޖެންޑް ވައިގެ ޒަރީއާ އިން، ސަފާރީ އުޅަނދުފަހަރުގެ ދާއިރާގައި މަސައްކަތް ކުރުމަށް ދިވެހި އަންހެނުންނަށް އާ މަގުތަކެއް ހުޅުވައި ދިނުމަކީ އަޅުގަނޑުމެންގެ ވަރަށް ބޮޑު އުންމީދެއް. އެއީ ހަމައެކަނި މި ދާއިރާގައި ބައިވެރިވުމެއްގެ ގޮތުގައެއް ނޫނެވެ،" ބަޔާނުގައި ބުންޏެވެ.
"އޭގެ ބަދަލުގައި ތަމްރީނާއި ތަޖުރިބާ ލިބިފައިވާ ފަންނުވެރިންގެ ގޮތުގައި، މި ދާއިރާއިން ދިގު މުއްދަތުގެ ވަޒީފާގެ ފުރުސަތުތައް ހޯދައިދީ ކުރިއެރުމުގެ މަގު ފަހިކޮށްދިނުން."
މޯލްޑިވްސް ލެޖެންޑުގެ މި ހާއްސަ އިސްނެގުމާ ގުޅޭ ގޮތުން ސޯޝަލް މީޑިއާގައި ވަނީ ހާއްސަ ވީޑިއޯއެއް އާއްމުކޮށްފަ އެވެ. މި ވީޑިއޯގައި މުޖުތަމައުގެ ހުރިހާ ފަންތިއަކަށް ފުރުސަތުތައް ފަހިކޮށްދިނުމާއި ދާއިރާގައި އަންހެނުން ބާރުވެރިކުރުވުމުގެ މުހިންމު މެސެޖު ވަނީ ފޯރުކޮށްދީފަ އެވެ. އަދި ރާއްޖޭގައި ހިންގާ ފަތުރުވެރިކަމުގެ ވިޔަފާރިތަކުން ދިވެހިންނަށް ރަނގަޅު ވަޒީފާގެ ފުރުސަތުތައް އުފައްދައިދިނުމުގައި އަދާކުރެވިދާނެ މުހިންމު ދައުރު ވެސް އެ ވީޑިއޯގައި ވަނީ ހިމަނައިފަ އެވެ.
މޯލްޑިވްސް ލެޖެންޑުގެ މި ހާއްސަ އިސްނެގުމަކީ ރާއްޖޭގެ ފަތުރުވެރިކަމުގެ މުސްތަގުބަލާ ގުޅޭގޮތުން ގައުމީ ފެންވަރުގައި ކުރާ މަޝްވަރާތަކުގައި ބައިވެރިވެ، އެ ބްރޭންޑުގެ ހިއްސާ އިތުރުކުރުމެވެ. އޭގެ ތެރޭގައި ފަތުރުވެރިކަމުގެ ސިނާއަތް ކުރިއަރަމުންދާއިރު، ދިވެހިންނަށް އިތުރު ފުރުސަތުތައް ހޯދައިދިނުމާއި ހާއްސަކޮށް އަންހެނުން ކުރިއަށް ދިއުމަށް މަގުފަހިކޮށްދިނުން ހިމެނެ އެވެ.