ޔޫއެފްއެސް އަށް 10 އަހަރު، ރާއްޖޭގެ ކާމިޔާބީއާ އެކު ލަންކާ އަށް

ރިސޯޓް ސަޕްލައިއަކީ ރާއްޖޭގަައި އެންމެ ކުރިއަރަމުން އަންނަ އެއް ވިޔަފާރި އެވެ. ފުރުސަތުތައް ގިނަވެފައި، ބޮޑު އާމްދަނީއެއް ލިބޭ ދާއިރާއެއް ކަމުން ބޭރުގެ ބޮޑެތި ކުންފުނިތަކުން ވެސް މިވަނީ ރާއްޖެ އައިސް މި ވިޔަފާރިއަށް ވަދެފަ އެވެ. ނަމަވެސް މިފަހަރު މިއޮތީ ތަފާތު ވާހަކަ އެކެވެ. ރިސޯޓް ސަޕްލައި ކުރުމުގައި ކާމިޔާބު ދިވެހި ކުންފުންޏަކުން އަވައްޓެރި ސްރީ ލަންކާގެ މާކެޓަށް ނިކުތް ވާހަކަ އެވެ.

މި ދައްކަނީ ރާއްޖޭގެ ރިސޯޓްތަކަށް ފިނިކުރި ކާނާގެ ބާވަތްތައް ސަޕްލައި ކުރަމުގައި ކާމިޔާބުކަން ހޯދާފައިވާ ޔުނައިޓެޑް ފުޑް ސަޕްލައި ނުވަތަ ޔޫއެފްއެސްގެ ވާހަކަ އެވެ. އެ ކުންފުނީގެ ކާމިޔާބީ އެންމެ ބޮޑަށް ފެނިގެން ދަނީ ލަންކާގެ އެންމެ ބޮޑު އެއް ރީޓެއިލް ޗެއިން ކަމަށްވާ ކާގިލްސް އަށް ބައެއް ބާވަތްތައް ސަޕްލައި ކުރަން ފެށުމުންނެވެ.

"ގިނަފަހަރަށް ވާގޮތަކީ ސިލޯނު ކުންފުނިތަކުން ރާއްޖޭގެ ޑިސްޓްރިބިއުޓާޝިޕް ނަގާނީ. މިފަހަރު ރާާއްޖެ އާއި ސިލޯނަށް ދިވެހި ކުންފުންޏަކުން [ޔޫއެފްއެސް އިން] ޑިސްޓްރިބިއުޓާޝިޕް ނަގާފައި ބޭއްވީއެއް ނޫން. ސިލޯނުގެ އެންމެ ބޮޑު ރީޓެއިލް ޗެއިން މެދުވެރިކޮށް ޑިސްޓްރިބިއުޓް ކުރަން ފެށީ،" މި މަހު 16 ވަނަ ދުވަހު، ރިސޯޓް ސަޕްލައި ކުރުމުގައި ހަރަކާތްތެރިވާތާ 10 އަހަރު ފުރުނު ފާހަގަކުރި ޔޫއެފްއެސްގެ މެނޭޖިން ޑައިރެކްޓަރު އިބްރާހިމް އާތިފް ޝަކޫރު ވިދާޅުވި އެވެ.

ރާއްޖޭގެ އެންމެ ތަޖުރިބާކާރު މެނޭޖިން ޑައިރެކްޓަރުންގެ ތެރޭގައި ހިމެނޭ އާތިފް ވިދާޅުވީ، ކާގިލްސް އަށް އެ ކުންފުނިން ސަޕްލައި ކުރަން ފަށާފައި ވަނީ މިސްރުގެ މަޝްހޫރު ޓެމީ ބްރޭންޑްގެ ސީރިއަލް ކަމަށެވެ. މިއީ ކުޑަކުދިންގެ އިތުރުން ބޮޑެތި މީހުންނަށް ވެސް ހާއްސަ ވައްތަރުތަކުގެ ސީރިއަލް ހިމެނޭ ބްރޭންޑެކެވެ.

"އަހަރެމެން ރެޖިސްޓާ ކޮށްގެން ގެންގުޅެން ފިސާރި ދުޅަހެޔޮ ކިޔާ ކޮންސެޕްޓެއް. އެއީ ސިއްހީ ގޮތުންނާއި ދެމެހެއްޓެނިވި މިންގަނޑުތަކުން ރަގަޅު ބާވަތްތަކުގެ ކާނާ ވިއްކުމަށް އަޅުގަނޑުމެން ކުރަމުން އަންނަ މަސައްކަތެއް،" އާތިފް ވިދާޅުވި އެވެ."ޓެމީގެ މިރޭންޖަކީ މިގޮތުން ސީރީއަލް ގިނަ ބްރޭންޑް ތަކަށްވުރެ ސިއްހީގޮތުން ރައްކާތެރި ބާވާތެއް. ނަން ޖީއެމެއޯ، ޖެނެޓިކް މޮޑިފިކެޝަން އެކުނުލެވޭ ކަމުގެ ޔަގީންކަން ފޯރުކޮށްދޭ، ކުޑަކުދިންގެ އިތުރުން ބޮޑެތި މީހުންނަށް ވެސް ހާއްސަ ވައްތަރުތަކުގެ ސީރިއަލް ހިމެނޭ ބްރޭންޑެއް."

އާތިފް ވިދާޅުވީ ކާގިލްސްގެ ސުޕަމާކެޓް ތަކުގެ އިތުރުން ވެސް ލަންކާގެ އެހެނިހެން ސްޕަމާކެޓްތަކަށް ވަރަށް އަވަހަށް ޓޮމީ ސީރިއަލް ސަޕްލައި ކުރަން ފަށަން ހަަމަޖެހިފައިވާ ކަމަށެވެ. އަދި އެ މަސައްކަތް ކުރިއަށް ގެންދާނީ ކާގިލްސްއާ ގުޅިގެން ކަމަށް ވެސް އޭނާ ވިދާޅުވި އެވެ.

އެ ކުންފުނީގެ ކާމިޔާބީގެ ވާހަކަ މިހާ ހިސާބުން ނިންމާލެވޭކަށް ނެތެވެ. ދެން މިއޮތީ އެ ކުންފުނިން ރާއްޖޭގައި ވިޔަފާރި ފުޅާ ކުރުމަށް ތައްޔާރުވަމުން އަންނަ ވާހަކަ އެވެ.

"ކުރިން ޔޫއެފްއެސް މީހުން ދަންނަނީ އަގުހެޔޮކޮށް އެކި ބްރޭންޑްތަކުގެ ފިނިކުރި މުދާ ގެނެސް ރިސޯޓްތަކަށް ވިއްކާ ބައެއްގެ ގޮތުގައި. ދެން މިހާރު އަހަރެމެން މި ކުރާ މަސައްކަތަކީ ޔޫއެފްއެސް އަކީ ހަމައެކަނި ރިސޯޓުތަކަށް ޖެނެރިކް ފިނިކުރި މުދާ ވިއްކާ ބައެއް ނޫން. މިފަހަކަށް އައިސް އަޅުގަނޑުމެން ޕްރީމިއަމް މާކެޓަށް ވިއްކުމަށްޓަކައި ތައްޔާރުވެ މިއަދު އަޅުގަނޑުމެން އެބަ ޑިސްޓްރިބިޔުޓް ކުރަން ދުނިޔޭގެ މަޝްހޫރު އެތައް ބެރޭންޑެއް،" އާތިފް ވިދާޅުވި އެވެ.

އާތިފް ވިދާޅުވި ގޮތުގައި ޑިސްޓްރިބިއުޝަން އެއްބަސްވުމެއްގެ ދަށުން ޔޫއެފްއެސް އިން އިމްޕޯޓްކޮށް ވިއްކާ އެމީ ބްރޭންޑްގެ ސްވިސް މިލްކާއި ޔޯގަޓު އަކީ ރާއްޖޭގައި މިވަގުތު ހުރި "މޭޑް އިން ސްވިޓްޒަލޭންޑް" ލޯގޯ ޖެހުމުގެ މިންގަޑުތަކަށް ފެތޭ ހަމައެކަނި ސްވިސް އުފެއްދުމެވެ.

"ފިސާރި ދުޅަހެޔޮގެ ދަށުން ޔޫއެފްއެސް އިން ކުކުޅުގެ ޖެނެރިކް ބްރޭންޑްތައް ގެނެސް ވިއްކުމުގެ ބަދަލުގައި މިހާރު އަހަރެމެން އިމްޕޯޓްކޮށް ވިއްކަނީ ހަމައެކަނި ފަރަންސޭސި އުފެއްދުމެއް ކަމުގައިވާ ޑޫ ބެރޭންޑްގެ ކުކުޅު. ޖެނެރިކް ބްރެޒިލްގެ ބްރޭންޑްތަކަށް ވުރެ، ޔޫރަޕްގެ މިންގަނޑުތަކުގެ ދަށުން ފަރަންސޭސި އުފެއްދުމެއް ކަމުން، ރައްކާތެރި ގޮތުން އެތަކެއް ދަރަޖަ ރަނގަޅު ވާނެ،" އެ ކުންފުނިން ގެންނަ ޕްރޮޑަކްޓްތަކުގެ ކޮލެޓީއާ ގުޅޭގޮތުން އާތިފް ވިދާޅުވި އެވެ.

ޔޫއެފްއެސް އިން ވިއްކާ ބައެއް ބްރޭންޑްތައް:

- ސުވިޓްޒަލޭންޑްގެ މަޝްހޫރު އެމީ ޔޯގާޓް އަދި މިލްކް

- ބެލްޖިއަމްގެ ބެލްބެރީ މަރުކާގެ ޖޭމްސް

- ބެލްޖިއަމްގެ ކްރޮޕްސް މަރުކާގެ އައިކިޔުއެފް ފްރޫޓްސް، ސްމޫތީސް އަދި ފްރޯޒަން ވެޖިޓަބަލްސް

- ފަރަންސޭސި ޑޫ ބްރޭންޑުގެ ކުކުޅު އަދި އެ ބްރޭންޑުގެ ޕްރޮސެސްޑް ތަކެތި

- މިސުރުގެ ޓެމީ ބްރޭންޑުގެ "ނަން ޖީއެމްއޯ" ސީރިއަލްސް

އެ ކުންފުނީގެ ލޯކަލް ޕްރޮޑަކްޓްތައް މާލޭގައި ވިއްކަން ފެށުމަށް އަންނަ އަހަރު ކުރީކޮޅު ފިހާރައެއް ހުޅުވާނެ ކަމަށް އާތިފް ވިދާޅުވި އެވެ. އަދި އެ ކުންފުންނިން ރާއްޖޭގައި ވިޔަފާރި ފުޅާކުރުމުގެ މަސައްކަތްތަކުގެ ތެރެއިން މިފަހުން ކުރެވުނު އެންމެ ބޮޑު އެއް މަސައްކަތަކީ، ކ. މާފުށީގައި އެ ކުންފުނީގެ އައުޓްލެޓެއް ހުޅުވުން ކަމަށް ވެސް އޭނާ ވިދާޅުވި އެވެ.

"އަޅުގަނޑު މިދަންނަވާލީ ޕްރީމިއަމް ބްރޭންޑްތަކާއި ފިސާރި ދުޅަހެޔޮ ތަކެތި ދިވެހި އާއިލާ ތަކަށް ފޯރުކޮށްދިނުމަށްޓަކައި ދާދި އަވަހަށް މާލޭގެ ރީޓެއިލް އަށް އެބަ ތައްޔާރުވަމޭ،" އާތިފް ވިދާޅުވި އެވެ.

އާތިފް ވިދާޅުވީ ހުޅުމާލޭގައި ހުންނަ އެ ކުންފުނީގެ ކޯލްޑް ސްޓޯރޭޖަކީ، ރާއްޖޭގައި ހުރި އެފަދަ އެންމެ ބޮޑު ފެސިލިޓީ ކަމަށެވެ. އަދި އެ ފެސިލިޓީގެ އަގު އެކަނި ވެސް ފަސް މިލިޔަން ޑޮލަރަށް އަރާނެ ކަމަށް ވެސް އޭނާ ވިދާޅުވި އެވެ.

ރާއްޖޭގެ އެންމެ ބޮޑެތި ކުންފުނިތައް ކާމިޔާބުކަމާއި އެކު ހިންގަވާފައިވާ އާތިފް ވިދާޅުވީ، އެ ކުންފުނީގެ ވިޔަފާރި ރާއްޖޭގައި ފުޅާކުރުމަށް ފަހު، ލަންކާ އަށް ގެންދިޔުމަކީ އަދި ފެށުމެއް ކަމަށެވެ. އެގޮތުން ލަންކާގައި ރަގަޅަށް ފައިތިލަ ހަރުކުރުމަށްފަހު، އެހެން ގައުމަކަށް މިސްރާބު ޖެހުމުގެ ވިސްނުން އާތިފް ވަރަށް ބޮޑަށް ގެންގުޅުއްވަ އެވެ.