ކ. އެނބޫދޫފަޅުގައި ތަރައްގީކުރާ ހާޑް ރޮކް ހޮޓެލް އާއި ހާޑް ރޮކް ކެފޭ އަންނަ އަހަރުގެ އޮކްޓޯބަރު 1 ގައި ހުޅުވާނެ ކަމަށް ބުނެފި އެވެ.
ޓޫރިޒަމް ހަބަރުތައް ގެނެސްދޭ ވެބްސައިޓެއްގައި ބުނީ ތައިލެންޑްގެ ސިންގަ އެސްޓޭޓުން ތަރައްގީކުރާ ރާއްޖޭގެ ފުރަތަމަ އިންޓަގްރޭޓެޑް ރިސޯޓު ޕްރޮޖެކްޓްގެ ދަށުން ހުޅުވާ ހާޑް ރޮކް ހޮޓެލް އާއި ހާޑް ރޮކް ކެފޭއާ އެކު 350 އަށް ވުރެ ގިނަ ވަޒީފާ އުފެދޭނެ ކަމަށެވެ.
އެނބުދޫފަޅަކީ ދެކުނުން މާލެއާ އެންމެ ކައިރީގައި އޮންނަ ފަޅެވެ. އެ ފަޅުގައި ތަރައްގީކުރާ އިންޓަގްރޭޓެޑް ރިސޯޓު ޕްރޮޖެކްޓްގެ ފުރަތަމަ ފިޔަވަހީގެ ދަށުން 311.5 މިލިއަން ޑޮލަރު އިންވެސްޓްކުރަން ސިންގަ އެސްޓޭޓުން ވަނީ ނިންމައިފަ އެވެ.
ވެބްސައިޓްގައި ބުނެފައިވާ ގޮތުގައި ހާޑް ރޮކް ހޮޓެލްއަކީ އެ ފަޅުގައި ތަރައްގީކުރާ ތިން ރިސޯޓުގެ ތެރެއިން އެއް ރިސޯޓެވެ. އެގޮތުން އެތަނުގައި މަތީ ފެންވަރުގެ 178 ކޮޓަރި ހުންނާނެ ކަމަށް ބުނެފައިވެ އެވެ. އޭގެ ތެރޭގައި ފެމެލީ ސުއިޓްސް އާއި ބީޗް ވިލާ އަދި އެއް ކޮޓަރި އާއި ދެ ކޮޓަރީގެ މޫދު ކޮޓަރި ވެސް ހަދަ އެވެ.
ރާއްޖޭގައި ހުޅުވާ ފުރަތަމަ ހާޑް ރޮކް ކެފޭގައި 185 މީހުންގެ ޖާގަ ހިމެނެ އެވެ. އަދި އިންޑޯ އާއި އައުޓްޑޯގައި ކެއިން ބުއިމުގެ އިންތިޒާމް ހަމަޖެހިފައި ހުންނާނެ ކަމަށާއި އޭގެ އިތުރުން މޫދު ކައިރީގައި ތިބެގެން ވެސް ކެއިން ބުއިމުގެ އިންތިޒާމް ހަމަޖެހޭނެ ކަމަށް ވެބްސައިޓްގަައިވެ އެވެ.
"ރާއްޖެއަކީ ހަނީމޫނަށް އަންނަ މީހުންގެ މެދުގައި ވަރަށް މަގުބޫލް ޒަމާންވީ މަންޒިލެއް. އަޅުގަނޑުމެން ވަރަށް އުފާވޭ ސިންގަ އެސްޓޭޓާ ގުޅިގެން ތަފާތު އެކި ފެންވަރުގެ ޓޫރިސްޓުންނަށް ރާއްޖެ ދައްކާލުމުގެ ފުރުސަތު ލިބޭތީ،" ހާޑް ރޮކް އިންޓަނޭޝަނަލްގެ ސީނިއާ ވައިސް ޕްރެޒިޑެންޓް ޓޮޑް ރީކޯ ވިދާޅުވި އެވެ.