ޔޫރަޕް ގައުމުތަކުގެ ތެރެއިން، އޯޕަން ބޯޑާސް ގައުމުތައް ނުވަތަ ޝެންގަން އޭރިއާގެ ގައުމުތަކަށް ކުރު ދަތުރުތައް ކުރާ ފަރާތްތަކަށް ހާއްސަކޮށް ދޫކުރާ ޝެންގަން ވިސާ ރާއްޖޭގައި ތިބެގެން ނެގޭނެ އިންތިޒާމު ވަރަށް އަވަހަށް ހަމަޖެހިގެން ދާނެ ކަމަށް، ރާއްޖެއިން ޔޫރަޕިއަން ޔޫނިއަންް (އީޔޫ) އަށް ކަނޑައަޅާފައި ހުންނަވާ ސަފީރު އަހުމަދު ޝިއާން ވިދާޅުވެއްޖެ އެވެ.
ޕީއެސްއެމް އަށް ދެއްވި އިންޓަވިއުއެއްގައި، ޝިއާން ވިދާޅުވީ އީޔޫގެ ގައުމުތަކަށް ދަތުރު ކުރަން ބޭނުންވާ ޝެންގަން ވިސާ ރާއްޖޭން ނެގޭނެ އިންތިޒާމުތައް ހަމަޖެއްސުމަށް މިދިޔަ އަހަރުން ފެށިގެން މަސައްކަތް ކުރައްވަމުން އަންނަ ކަމަށެވެ.
އޭނާ ވިދާޅުވި ގޮތުގައި ދެން ކުރިއަށް އޮތީ އެ މަސައްކަތްތަކަށް އަމަލީ ގެނައުމެވެ. އަދި އެ މަސައްކަތުގެ ބޮޑު ބައި ކުރިއަށް އޮތް "ތިން ހަތަރު" މަސް ދުވަހުގެ ތެރޭގައި ނިމޭނެ ކަމަށް ވެސް ވިދާޅުވި އެވެ.
މިހާރު ދިވެހިން ޝެންގަން ވިސާ ނަގަން ދާންޖެހެނީ ސްރީ ލަންކާއަށެވެ.
ރާއްޖޭން ޝެންގަން ވިސާ ދޫކުރަން ފަށަން ތައްޔާރުވަމުން އަންނަ އިރު، ޔޫރަޕް ގަައުމުތަކަށް ޗުއްޓީ ފަދަ ބޭނުންތަކަށްދާ ދިވެހިންގެ އަދަދު އަންނަނީ އިތުރުވަމުންނެވެ.