ސޯލާ ޕެނެލް ބޭނުންކޮށްގެން އައްޑޫގައި ކަރަންޓްގެ ހިދުމަތް ހޯދަން ބޭނުންވާ މީހުންނަށް ސޯލާ ޕެނަލް ގަނެވޭނެ ފުރުސަތު މޯލްޑިވްސް އިސްލާމިމް ބޭންކް (އެމްއައިބީ) އާއި އައްޑޫ ޕީޕަލްސް ކޯޕަރޭޓިވް (އޭޕީސީ) ގުޅިގެން ހަމަޖެއްސުމަށް އެއްބަސްވުމެއްގައި މިއަދު ސޮއިކޮށްފި އެވެ.
އައްޑޫ ސިޓީ ކައުންސިލް އިދާރާގައި އޮތް ރަސްމިއްޔާތެއްގައި އެމްއައިބީގެ ފަރާތުން ސޮއިކުރެއްވީ ހެޑް އޮފް ބިޒްނަަސް އައްސަދު މުނީރެވެ. އޭސީޕީގެ ފަރާތުން ސޮއި ކުރެއްވީ ބޯޑު މެމްބަރު އަހުމަދު ހިސާނެވެ. އޭޕީސީއަކީ އައްޑޫ ސިޓީ ރައްޔިތުންނާއި ކައުންސިލް ހިއްސާވާ ގޮތަށް 2016 ގައި އުފެއްދި ކޯޕަރޭޓިވެކެވެ.
އެމްއައިބީގެ "އުޖާލާ ދިރިއުޅުން" ފައިނޭސިން ފެސިލިޓީގެ ދަށުން ގަނަވޭ ސޯލާ ޕެނަލަށް ފައިސާ އެއް ދުވަހުގެ ތެރޭގައި ހަމަޖެހިގެން ދާނެ ކަމަށް ބޭންކުން ބުންޏެވެ. އަދި ސޯލާ ޕެނަލްތަކަށް ފައިސާ ދައްކަން ފަސް އަހަރުގެ މުއްދަތެއް ލިބޭ އިރު، އެޑްވާންސަށް ފައިސާ ދައްކާކަށް ވެސް ނުޖެހޭނެ އެވެ.
އެމްއައިބީން ބުނީ ސޯލާ ޕަވާ ފައިނޭންސް ފެސިލިޓީގެ ދަށުން އެ ބޭންކުގެ ކަސްޓަމަރުންނަށް ފަސޭހަކަމާ އެކު ސޯލާ ޕެނެލްތައް ނެގޭނެ ކަމަށާއި މިީގެ ސަބަބުން ކަރަންޓަށް ކުރާ ހަރަދު ވެސް ކުޑަވެގެން ދާނެ ކަމަށެވެ.
މި ފެސިލިޓީގެ ދަށުން ދޫކުރަން ނިންމާފައި ވަނީ ތިން ވައްތަރެއްގެ ސޯލާ ޕަވާ ޕެނަލް ސިސްޓަމްތަކެކެވެ. އެއީ ގްރިޑް ޓައި ސިސްޓަމް، ހައި ބްރިޑް ސިސްޓަމް އަދި އޮފް ގްރިޑް ސިސްޓަމެވެ.
އޭޕީސީން ބުނީ އެމްއައިބީގެ ފައިނޭންސިން ފެސިލިޓީ މެދުވެރިކޮށް ސޯލާ ޕެނެލް ނަގާ މީހުންނަށް ފައިސާ ދައްކައި ނިމެންދެން ސޯލާ ޕެނަލް ސިސްޓަމް އިންޝޫރަންސް ކުރެވިފައިވާނެ ކަމަށާއި މައްސަލައެެއް ދިމާވެއްޖެނަމަ އެކަން އޭޕީސީން ހައްލު ވެސް ކޮށްދޭނެ ކަމަށެވެ. މީގެ އިތުރުން ސޯލާ ޕެނަލް އެމްއައިބީ މެދުވެރިކޮށް ނަގާ ކަސްޓަމަރުންނަށް ޕެނަލްތައް ހަރުކޮށް ހިދުމަތް ދިނުމުގެ ހުރިހާ ކަމެއް އޭޕީސީން ފުރިހަމަކޮށް ދޭނެ އެވެ.