ރާއްޖެ އާއި ހޮން ކޮންގާ ދެމެދު ފްރީ ޓްރޭޑް މަޝްވަރާތައް ފަށައިފި

ރާއްޖެ އާއި ހޮން ކޮންގާ ދެމެދު މިނިވަން ވިޔަފާރީގެ އެއްބަސްވުމެއް އެކުލަވާލުމާ ގުޅޭ ގޮތުން ކުރާ މަޝްވަރާތައް މިއަދު ފަށައިފި އެވެ.

ހޮން ކޮންގުގައި ކުރިއަށް ގެންދާ މި މަޝްވަރާތަކުގައި ރާއްޖޭގެ ފަރާތުން އެންމެ އިސްކޮށް ބައިވެރިވެވަޑައިގަންނަވަނީ އިކޮނޮމިކް މިނިސްޓަރު މުހައްމަދު ސައީދާއި ކޮމިޝަނަ ޖެނެރަލް އޮފް ކަސްޓަމްސް އިބްރާހިމް ޝަރީފެވެ.

މި ދަތުރަށް ފުރާވަޑައިގަތުމުގެ ކުރިން މިނިސްޓަރު ވިދާޅުވީ ހޮން ކޮންގާ އެކު މިނިވަން ވިޔަފާރީގެ އެއްބަސްވުމެއް އެކުލަވައިލުމުން ހޮން ކޮންގް ފަދަ ޒަމާނީ ފެންވަރަށް ތަރައްގީކޮށްފައިވާ މާލީ މަރުކަޒަކަށް ރާއްޖެ ހަދަން ކުރާ މަސައްކަތުގައި ވަރަށް ބޮޑު ކުރިއެރުމެއް ލިބޭނެ ކަމަށެވެ.

ހޮން ކޮންގަކީ، މިނިސްޓަރު ފާހަގަކުރެއްވި ގޮތުގައި، ރާއްޖޭން އެންމެ ގިނަ އަދަދަކަށް ފަރުމަސް ބޭރުކުރާ އެއް ތަނެވެ. އެހެންވެ، މިއަދު ފެށި މި މަޝްވަރާގައި އެތަނަށް ބޭރުކުރާ މަހުން ޑިއުޓީ ކަނޑައިލަން ހުށަހަޅާނެ ކަމަށް އޭނާ ވިދާޅުވެފައިވެ އެވެ.

ސައީދު ވިދާޅުވި ގޮތުގައި ހޮން ކޮންގާ އެކު ފެށި މަޝްވަރާތައް ނިމި، ކުރިއަށް އޮތް ހަ މަސްދުވަހުގެ ތެރޭގައި އެއްބަސްވުމުގައި ސޮއިކުރެވޭނެ އެވެ.

ހޮން ކޮންގުގެ މައި ގައުމު ކަމަށްވާ ޗައިނާއާ އެކު ވެސް މިނިވަން ވިޔަފާރީގެ އެއްބަސްވުމެއް އެކުލަވާލަން އިއްޔެ ވަނީ މަޝްވަރާތަކުގެ ފަހު ބުރު ބާއްވައިފަ އެވެ. މި މަޝްވަރާތަކުގައި ހޮން ކޮންގުން ވަނީ އޮބްޒާވަރެއްގެ ގޮތުގައި ބައިވެރިވެފަ އެވެ.

މިއީ މިނިވަން ވިޔަފާރީގެ އެއްބަސްވުމެއް އެހެން ގައުމަކާ އެކު ރާއްޖޭން އެކުލަވައިލާ ފުރަތަމަ ފަހަރެވެ. މީގެ ކުރިން ރާއްޖޭން ބައިވެރިވެފައި ވަނީ ދެކުނު އޭޝިއާ ސަަރަހައްދުގެ މިނިވަން ވިޔަފާރީގެ އެއްބަސްވުން (ސަފްޓާ)ގަ އެވެ. އެއީ ސާކުގެ ހުރިހާ ގައުމެއް ބައިވެރިވާ، ސަރަހައްދީ އެެއްބަސްވުމެކެވެ.