ރިހިވެލި ރިސޯޓްގެ މައްސަލަ: އެންމެ ފަހުން އާއިލީ ބޮޑު މައްސަލަގަނޑަކަށް

ރިހިވެލި ރިސޯޓްގެ މިލްކުވެރިންނާއި އެ ރިސޯޓް ހިންގަން އެކި ފަހަރުމަތިން ހަވާލުވި ކުންފުނިތަކާ ދެމެދު ޖެހޭ ބޮޑެތި މައްސަލަތައް ގިނަވެފައި ވަނިކޮށް ހިއްސާދާރުން ނިސްބަތްވާ އާއިލާގެ ތެރޭގައި ހިޔާލު ތަފާތުވުން އުފެދި ސިވިލް ކޯޓަށް ވަކި މައްސަލައެއް ވައްދައިފި އެވެ.

ކ. މަހާނައެޅިހުރާގައި ހިންގާ ރިހިވެލި ރިސޯޓަކީ 1979 ގައި، އަލީ ޔޫސުފް، މަޝްހޫރު ނަމުން ނަމަ ދޮންއަލިފުޅު އުފެއްދެވި މާހަލް ޓުއާސް މޯލްޑިވްސްއަށް ދޫކޮށްފައިވާ ރަށެކެވެ. މިހާރު ވަރަށް ބޮޑު އާލާސްކަންފުޅެއްގައި އޮންނެވި ދޮންއަލިފުޅު ވަނީ އޭނާގެ 11 ބޭފުޅުންނަށް ކުންފުނީގެ 30 ޕަސެންޓް ހިއްސާ ދެއްވައިފަ އެވެ. އަނެއް 70 ޕަސެންޓް އޮތީ، އާއިލާގެ ބައެއް ބޭފުޅުން، ނަން ނުޖަހާ ގޮތަށް "މިހާރު"އާ ވާހަކަ ދައްކަވަމުން ވިދާޅުވި ގޮތުގައި، "ބައްޕަގެ ނަން މަތީގަ" އެވެ.

އެކަމަކު އާއިލާގެ އަންހެން ބޭފުޅަކު ތުހުމަތުކުރައްވާ ގޮތުގައި ބައްޕަގެ 70 ޕަސެންޓް ހިއްސާ ވަނީ، އެހެން އެއްވެސް ހިއްސާދާރަކަށް އެނގުމެއް ނެތި، އެ އާއިލާގެ ހުސެއިން ޝިހާމާއި މުހައްމަދު ޝިހާމްގެ ނަމަށް ބަދަލުކުރައްވައި، ކުންފުނީގެ މެޖޯރިޓީ ހިއްސާ ނަންގަވައިފަ އެވެ.

"އަޅުގަނޑުމެންނަށް އެކަންޏެއް ނޫން، ބައްޕައަށް ވެސް އޮޅުވާލައިގެން ލިޔުންތަކުގައި ސޮއިކޮށްގެން އެކަން ކޮށްފައި އޮތީ،" އޭނާ ވިދާޅުވި އެވެ.

"މިހާރު"އާ ވާހަކަ ދެއްކެވި ހިއްސާދާރު ވިދާޅުވި ގޮތުގައި ކުންފުނީގެ އަސާސީ ގަވައިދު ބުނާ ގޮތުން، ކުންފުނީގެ ހިއްސާ އޮންނާނީ އާއިލާގެ ހުރިހާ މެމްބަރުންނަށް އެއްވަރަކަށެވެ. އޭނާ ވިދާޅުވީ އަސާސީ ގަވައިދާ އެއްގޮތަށް ކުންފުނި ހިންގަމުން ނުދާތީ ބޯޑު ބައްދަލުވުންތައް ނުބާއްވާ ކަމަށެވެ. އެހެންކަމުން މާހަލްގެ މެނޭޖިން ޑިރެކްޓަރުގެ މަގާމުގައި މުހައްމަދު ޝިހާމް، މަޝްހޫރު ނަމުން ނަމަ ޓާކޫރޭއަށް، ނުހުންނެވޭނެ ކަމަށް ވެސް އޭނާ ވިދާޅުވި އެވެ.

ކުންފުނީގެ ހިއްސާ ބަދަލުކުރި މައްސަލަ އާއިލާގެ ހަ ބޭފުޅަކު އެކުވެގެން، ހުސެއިން އާއި މުހައްމަދާ ދެކޮޅަށް ކޯޓަށް މިހާރު ވަނީ ވައްދާފައިކަން "މިހާރު"އަށް ލިބުނު މައުލޫމާތުތަކުން އެނގެ އެވެ.

"ހުރިހާ ކުދިންގެ ހައްގެއް ވަކި ބަޔަކު ވެގެން ނިގުޅައިގަނެ ބަޔަކަށް މަކަރުހަދައި އޮޅުވާލައިގެން މިދަނީ. ކުންފުނީގެ ހިންގާ ގަވައިދުން ބޭރުން އައްޔަންކޮށްފައި އޮތް ބޯޑަކުން ކުރި ކަމެއް މިއީ،" އަންހެން ހިއްސާދާރު ވިދާޅުވި އެވެ.

މަކަރާއި ހީލަތަށް ތުހުމަތުކުރެވޭ މައްސަލައެއް ދޮންއަލިފުޅުގެ އާއިލާގެ ތެރެއިން އުފަންވި އިރު، ރިހިވެލި މިހާރު ސަބްލީސް ކޮށްފައިވާ ސޭވް ދަ ޑްރީމް ކުންފުންޏާ އެކު ވެފައިވާ އެއްބަސްވުން ބާތިލް ކުރުމާ ގުޅޭ މައްސަލައެއް ވެސް ކޯޓުގައި ކުރިއަށް އެބަ ދެ އެވެ.

ސޭވް ދަ ޑްރީމަށް ރިހިވެލި ސަބްލީޒް ކުރީ ފެބްރުއަރީ 2018ގައި ފްރާންސްގެ 55 ހިއްސާދާރަކާއި ހުސެއިން ޝިހާމް ބައިވެރިވެގެން އުފެއްދި ޖޮއިންޓް ވެންޗާ ކުންފުންޏަކަށެވެ. މި ކުންފުނީގެ 50 ޕަސެންޓް ފްރާންސްގެ ހިއްސާދާރުންނަށް އަދި އަނެއް 50 ޕަސެންޓްގެ ހިއްސާދާރަކީ، އެނގިފައިވާ ގޮތުގައި، ހުސައިން އެވެ.

ސޭވް ދަ ޑްރީމް އިން ތުހުމަތުކުރާ ގޮތުގައި ފްރާންސްގެ ހިއްސާދާރުން ރިހިވެލި ރިސޯޓަށް 2.7 މިލިއަން ޑޮލަރު ހޭދަކޮށްފައިވާ އިރު ހުސައިން އެންމެ ލޯ ލާރިއެއް ވެސް ނުދެއްވަ އެވެ.

ރިހިވެލި ރިސޯޓް ހިންގަން ކުރިން ހަވާލުވި ކާސްޓަވޭ އާއި މާހަލްއާ ދެމެދު ވެސް ބޮޑު މައްސަލަގަނޑެއް ޖެހި، އެކަން ނިންމަން ޖެހުނީ ކޯޓާ ހިސާބުންނެވެ. އެގޮތުން 2014 ގައި ދެ ކުންފުނީގެ މެދުގައި ހެދި އެއްބަސްވުން މާހަލް އިން ކޯޓަށް ގޮސް ބާތިލްކޮށް، ކާސްޓްއަވޭގެ އަތުން އެ ރަށް އަތުލީ އެވެ.

މާހަލްގެ ހިއްސާދާރަކު ވިދާޅުވީ ސޭވް ދަ ޑްރީމްއަށް ރަށް ހަވާލުކޮށް ފައިސާގެ ބޮޑެތި މުއާމަލާތްތަކެއް ހުސެއިން ހިންގެވީ އޮޅުވާލައްވައިގެން ކަމަށެވެ. އެ މުއާމަލާތުގެ އެއްވެސް ފައިދާއެއް ނުވަތަ ބައެއް ވެސް އެހެން ހިއްސާދާރަކަށް ލިބިވަޑައިގެންފައި ނުވާ ކަމަށް ވެސް، އޭނާ ވިދާޅުވި އެވެ.

"މި މީހުން ބައްޕަ ބަލިވުމުން އޮޅުވާލައިގެން ބައްޕަގެ ހުރިހާ ޝެއާއެއް ނެގީ. ބައްޕަ ލައްވާ ފިންގާ ޕްރިންޓާ އެއްޗެހި ނަގައިގެން ބައްޕައަކީ ކުންފުނީގައި ނެތް މީހަކަށް ހަދައިގެން މި ބުނާ އެގްރީމެންޓެއްގައި ސޮއިކޮށްފައި އޮތީ. މިއީ ފްރޯޑް ކަންތައްގަނޑެއް،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި ގާނޫނީ ހަމަޔަކުން ބަލާ ނަމަ މި ވަގުތު މާހަލްގައި ސައްހަ މެނޭޖިން ޑިރެކްޓަރަކު ނުހުންނަވާނެ އެވެ. ނަމަވެސް އިކޮނޮމިކް މިނިސްޓްރީގެ ލިޔުންތަކުން ފެންނަ ގޮތުގައި މާހަލް ޓުއާސްގެ މެނޭޖިން ޑިރެކްޓަރަކީ މުހައްމަދު ޝިހާމެވެ.

ކުންފުނި ހިންގަނީ ގާނޫނީ ހަމަތަކުގެ ތެރެއިން

އާއިލާގެ ބައެއް ބޭފުޅުން ހުސައިން އާއި މުހައްމަދަށް ކުރައްވާ ތުހުމަތުތަކާ ބެހޭ ގޮތުން ހުސެއިންގެ ބަހެއް ލިބޭ ގޮތެއް ނުވި އެވެ.

އެކަމަކު މުހައްމަދު ވިދާޅުވީ ކުންފުނީގެ ހިއްސާދާރުންގެ ތެރޭގައި މައްސަލަ އުފެއްދީ ސޭވް ދަ ޑްރީމުން ކަމަށެވެ. އަދި އާއިލާގެ ބައެއް މެމްބަރުން ތުހުމަތުކުރައްވާ ގޮތަށް، ކުންފުނީގެ މެޖޯރިޓީ ހިއްސާ އޭނާ އާއި ހުސެއިންއަށް ލިބިވަޑައިގަތީ އޮޅުވާލައްވައިގެން ނޫން ކަމަށް ވެސް ވިދާޅުވި އެވެ.

"ބައްޕަ ދެއްވުމުން އަޅުގަނޑުމެންނަށް ލިބުނު އެއްޗެއް އެއީ،" މުހައްމަދު ޝިހާމް ވިދާޅުވި އެވެ.

އެހެންކަމުން އޭނާ ވިދާޅުވި ގޮތުގައި ކުންފުނީގެ ކުޑަ ހިއްސާއެއް އޮންނަ ބަޔަކަށް، ކުންފުނީގެ ކަންކަމާ ބާރެއް ނުފޯރުވޭނެ އެވެ.

"ކުންފުނީގެ ހުރިހާ ކަމެއް ވެސް ހިންގާފައިވަނީ ގާނޫނީ ހަމަތަކާއި އުސޫލުގެ ތެރެއިން،" މުހައްމަދު ވިދާޅުވި އެވެ.

އޭނާ ވިދާޅުވި ގޮތުގައި ފްރާންސްގެ ކުންފުންޏާ އެކު ވެފައި އޮތް އެއްބަސްވުން އުވާލަން ޖެހުނީ މިދިޔަ ނުވަ މަހު ކުލި ނުދައްކައިގެންނެވެ.

އޭނާ އެހެން ވިދާޅުވި އިރު މިދިއަ ނުވަ މަސް ރާއްޖެ ހޭދަކޮށްފައި މިވަނީ ކޮވިޑް-19ގެ އަނދިރީގަ އެވެ. ރާއްޖޭގެ ޓޫރިޒަމް އެއްކޮށް ހުއްޓިފައި ވެސް، ގާތްގަނޑަކަށް ހަތަރު މަސް ހޭދަވި އެވެ.