ރިހިވެލި ރިސޯޓުގެ އާ މެނޭޖްމަންޓުގެ ޝަކުވާތައް އޮއްސާލައިފި

ރިހިވެލި ރިސޯޓުގެ ވެރިޔާ އާއި މިހާރު އެ ރިސޯޓް ހިންގަމުން އަންނަ ފްރާންސްގެ ސޭވް ދަ ޑްރީމްއާ ދޭތެރޭ އުފެދިފައިވާ މައްސަލަތައް ސަރުކާރާ ހަމައަށް އެ ކުންފުނިން ގެންގޮސްފި އެވެ.

ސޭވް ދަ ޑްރީމްގެ ހިއްސާދާރު ކެޓީ ކާލްބް ވިދާޅުވީ، 2018 ގައި ފްރާންސްގެ 55 ހިއްސާދާރަކު ހިމެނޭ ގޮތަށް އުފެއްދި ކުންފުނިން މިއަދާ ހަމައަށް ރިހިވެލި ރިސޯޓަށް 2.7 މިލިއަން ޑޮލަރު ހޭދަކޮށްފައިވާ ކަމަށެވެ. އެ ރިސޯޓު ހިންގަނީ ސޭވް ދަ ޑްރީމާއި ރާއްޖޭގެ މާހަލް ޓުއާސް އެއްވަރަކަށް ހިއްސާވާ ޖޮއިންޓް ވެންޗާ ކުންފުންޏެއްގެ ދަށުންނެވެ.

"މިގޮތަށް ދެ އަހަރު ވެގެން ދިޔަ އިރު މި މީހުންގެ ހަގީގަތް މި އެނގުނީ. މި މީހުން ހިންގަނީ ބޮޑު ސްކޭމެއް. މިހާރު އަނެއްކާ އެ މަސައްކަތް ކުރަނީ އެހެން ކުންފުންޏަކަށް އަގުބޮޑުކޮށް ވިއްކާލަން،" ކެޓީ ވިދާޅުވި އެވެ.

ކ. މަހާނައެޅިހުރާގައި ހިންގާ ރިހިވެލި ރިސޯޓަކީ މާހަލް ޓުއާސް މޯލްޑިވްސް އަށް ސަރުކާރުން ދޫކޮށްފައިވާ ރަށެކެވެ. މާހަލް ޓުއާސް އާއި ސޭވް ދަ ޑްރީމްއާ ދެމެދު މިފަދަ މައްސަލައެއް ޖެހުނު އިރު މީގެ ކުރިން އެ ރަށް ހިންގި ކާސްޓަވޭ މޯލްޑިވްސް އާއި މާހަލް ޓުއާސްއާ ދެމެދު ވެސް ޖެހިފައި ވަނީ ހަމަ މިކަހަލަ މައްސަލަތަކެކެވެ. އެހެންވެ، ކާސްޓަވޭއާ ދެމެދު 2014 ވަނަ އަހަރު ހެދި އެއްބަސްވުން މާހަލް ޓުއާސް އިން ކޯޓަށް ގޮސް ބާތިލްކޮށް، ކާސްޓްއަވޭގެ އަތުން އެ ރަށް ޖެނުއަރީ 2، 2018ގައި ވަނީ އަތުލައިފަ އެވެ. އެ އަހަރުގެ ފެބްރުއަރީ 15 ގައި ސޭވް ދަ ޑްރީމާ ރަށް ހަވާލުކޮށް، 2042 ވަނަ އަހަރާ ހަމައަށް އެ ކުންފުންޏަށް ސަބްލީސް ކުރި އެވެ.

ސޭވް ދަ ޑްރީމް އިން އަންނަނީ ސޯޝަލް މީޑިއާގައި ވެސް ސަރުކާރުން މިކަން ބަލައި ދިނުމަށް އެދެމުންނެވެ. އެ ކުންފުނީގެ ވެބްސައިޓުގައި ބުނެފައިވާ ގޮތުގައި މާހަލް ޓުއާސް އިން އެންމެ ލޯ ލާރިއެއް ވެސް ރިހިވެލި އަށް ހޭދަކޮށްފައެއް ނުވެ އެވެ. އެ ކުންފުނިން ދޭ ފައިސާ އިން މާހަލް ޓުއާސް އިން ކޮރަޕްޝަން ހިންގާ ކަމުގެ ތުހުމަތު ވެސް ކޮށްފައި ވެ އެވެ.

"މިހާރު އޮތް ހާލަތުން ކުންފުނީގެ މުވައްޒަފުންނަށް ޖެހޭ މުސާރަ ދޭން މިވަނީ އުނދަގޫތަކާ ކުރިމަތިވެފައި. މިއީ ސޭވް ދަ ޑްރީމް އިން ހިތާމަކުރާ ކަމެއް. އަޅުގަނޑުމެންގެ ކުންފުނީގެ އެންމެ މުހިއްމު އެއް އަސާސަކީ މުވައްޒަފުންނަށް ރަނގަޅު ގޮތްތަކެއް ފަހިކޮށްދިނުން،" ސަރުކާރަށް ފޮނުވާފައިވާ ސިޓީގައި އެ ކުންފުނިން ބުނެފައިވެ އެވެ.

ރަށުގެ ރީތިކަން ބެލެހެއްޓުމަށް ވެސް ކުންފުންޏަށް ވަނީ ދަތިތަކާ ކުރިމަތިވެފައިވާ ކަމަށާއި އެހެންވެ ސަރުކާރުގެ އިދާރާތަކުން އެ ކަމުގައި ސޭވް ދަ ޑްރީމަށް އެހީވުމަށް އެ ކުންފުނިން އެދިފައިވެ އެވެ.

އެ ކުންފުނިން ބުނީ، މާހަލް ޓުއާސް އާ ދެމެދު ޖެހުނު މައްސަލަތައް ހައްލު ނުވެ ގިނަ ދުވަސްތަކެއް ވެފައިވާ އިރު ރާއްޖޭގެ ޝަރުއީ ނިޒާމާ މެދު ވެސް މިވަނީ ސުވާލު އުފެދިފައި ކަމަށެވެ. މާހަލް ޓުއާސްގެ ހިއްސާދާރުންނާއި ޑިރެކްޓަރުންގެ ސައްހަކަން އަދިވެސް ކަށަވަރު ކުރެވިފައިވާ ނުވާ ކަމަށާއި މާހަލް އާ އެކު ވެފައިވާ އެއްބަސްވުމަކީ ސައްހަ އެއްބަސްވުމެއް ކަމާ ދޭތެރޭ ޝައްކު ކަމަށް ވެސް ފްރާންސްގެ ކުންފުނިން ބުނެ އެވެ.

ސޭވް ދަ ޑްރީމް އާއި މާހަލް ޓުއާސްއާ ދެމެދު ޖޮއިންޓް ވެންޓާ ކުންފުންޏެއް ހެދުމަށް 550،000 ޑޮލަރު ވެސް ސޭވް ދަ ޑްރީމް އިން ހޭދަކޮށްފައިވެ އެވެ. އެ ފައިސާއިން ކޮވިޑްގެ ހާލަތުގައި މުވައްޒަފުންގެ މުސާރަ އަށް ހޭދަކުރެވެން އޮތް އިރު މާހަލްގެ އަމިއްލަ ބޭނުމަށް އެ ފައިސާ ބޭންކުން ނެގުމަކީ ކަންބޮޑުވާން ޖެހޭ ކަމެއް ކަމަށް ވެސް ކެޓީ ވިދާޅުވި އެވެ. މިއީ ވެސް އެއްބަސްވުމާ ހިލާފަށް ހިންގި އަމަލެއްގެ ގޮތުގައި ސޭވް ދަ ޑްރީމުން ފާހަގަކުރެ އެވެ.

Rihiveli kuyyah dhinumuge ithuru massala eh fenmathi vejje

The most trusted news source in the Maldives

Mihaaru

މާހަލް އިން ކޮރަޕްޝަންގެ އަމަލުތައް ހިންގާ ކަމަށް ބުނެ ސޭވް ދަ ޑްރީމުން އޭސީސީ އަށް މިދިޔަ އަހަރުގެ އޮގަސްޓުގައި މައްސަލައެއް ވެއްދި ނަމަވެސް، އެ މައްސަލަ އަވަސް އަރުވާލައި ނިންމާލާފައިވާ ކަމަށް އެ ކުންފުނިން ތުހުމަތު ކުރެ އެވެ. ރާއްޖެއަކީ އދ. ގެ މެމްބަރު ގައުމަކަށް ވާ އިރު ޔޫރަޕްގެ ގައުމެއްގެ އިންވެސްޓަރަކު މާލީ އޮޑިޓަކަށް އެދުނު ނަމަވެސް، އެކަން ސީރިއަސްކޮށް ބަލާފައި ނުވާތީ ސޭވް ސަ ޑްރީމް އިން ކަންބޮޑުވުން ފާޅުކޮށްފައިވެ އެވެ.