"ބޭފިކްރޭ" އަކީ މީހަކު ކުޅޭވަރުގެ ފިލްމެއް ނޫން: ސުޝާންތު

ޔާޝްރާޖް ފިލްމްސް އާއި އެކްޓަރު ސުޝާންތު ސިންގް ރާޖްޕޫތުގެ ގުޅުން މިހާރު ވަނީ ވަރަށް ގޯސްވެފަ އެވެ. "ބޭފިކްރޭ" ގެ ބަތަލުކަން ސުޝާންތަށް ދޭނެކަމަށް ޔާޝްރާޖްގެ ހެޑް އަދިތުޔާ ޗޯޕްރާ ވައުދު ވުމަށް ފަހު އެ ރޯލު ރަންވީރު ސިންގަށް ދިނުމުން ސުޝާންތު ރުޅި އައިސްފައި ހުރި ކަމަށްވެ އެވެ.

ނަމަވެސް މި ޚަބަރުތައް ސުޝާންތު ދޮގު ކުރެ އެވެ. އޭނާ ބުނީ އޭނާއަކަށް "ބޭފިކްރޭ" ގެ ހުށަހެޅުން ނުލިބޭ ކަމަށެވެ. އަދި ލިބުނު ނަމަވެސް އޭނާ އެ ފިލްމު ނުކުޅޭނެ ކަމަށާއި މިހާރު އެހެން ބުނަނީ ބޮކްސް އޮފީހުގައި ފިލްމުގެ ނަތީޖާއަށް ބަލާފައި ނޫންކަމަށް ސުޝާންތު ބުންޏެވެ. އޭނާ ބުނަނީ "ބޭފިކްރޭ" އަކީ މީހަކު ކުޅޭވަރުގެ ފިލްމެއް ނޫންކަމަށެވެ.

ކުރިން ޓީވީ ސިލްސިލާތަކުގައި މަސައްކަތްކުރި އެކްޓަރު ސުޝާންތު ފިލްމު ކުޅެން ފެށި ދުވަސްވަރު ޔާޝްރާޖް ފިލްމްސްއާ އެކު ތިން ފިލްމަކަށް ކޮންޓްރެކްޓް ހެދި އެވެ. އެތަނުން ޕްރޮޑިއުސްކުރި "ޝުދް ދޭސީ ރޮމޭންސް" އާއި "ޑިޓެކްޓިވް ބިޔޯމްކޭޝް ބަކްޝީ" ސުޝާންތު ވަނީ ކުޅެފަ އެވެ. ތިން ވަނަ ފިލްމަކަށް އޮތީ ޝޭކަރް ކަޕޫރު ޑައިރެކްޓްކުރާ "ޕާނީ" އެވެ. ނަމަވެސް އެންމެ ފަހު ވަގުތު އެ ފިލްމު ޕްރޮޑިއުސްނުކުރަން ޔާޝްރާޖުން ނިންމީ އެވެ. މިކަމުގެ ގެއްލުން ސުޝާންތަށް ލިބުނެވެ.

ސުޝާންތުގެ ފުރަތަމަ ފިލްމު "ކައި ޕޯ ޝޭ"ގެ ޑައިރެކްޓަރު ޝޭކަރް ކަޕޫރުގެ "ފިތޫރު" އޭނާ ދޫކޮށްލީ "ޕާނީ" އަށް އެ ތާރީޚުތައް ދީފައި ވާތީ އެވެ. އަދި ސަންޖޭ ލީލާ ބާންސާލީގެ "ގޯލިޔޯންކީ ރާސްލީލާ ރާމް ލީލާ" ވެސް ރަންވީރަށް ވުރެ ކުރިން ލިބުނީ ސުޝާންތަށެވެ. ނަމަވެސް ޔާޝްރާޖްގެ ކޮންޓްރެކްޓްގެ ސަބަބުން އެ ފިލްމުވެސް އޭނާއަށް ކުޅެވޭގޮތް ނުވީ އެވެ. އިތުރަށް މައްސަލަ ގޯސްވީ "ބޭފިކްރޭ" ވެސް ސުޝާންތަށް ދިނުމުގެ ބަދަލުގައި ރަންވީރަށް ދިނުމުންނެވެ.

ސުޝާންތު ޔާޝްރާޖްގެ ކޮންޓްރެކްޓް އުވާލައި އެތަނާ ވަކިވި އެވެ. އަދި އޭރުއްސުރެ ރަންވީރާއި ސުޝާންތުގެ ފިނި ހަނގުރާމައެއް ވެސް ވަނީ ފެށިފަ އެވެ.

"ބޭފިކްރޭ" އާ ބެހޭ ގޮތުން ސުޝާންތު ދައްކާނެ އެއްވެސް ރަނގަޅު ވާހަކައެއް ނެތީ މި ސަބަބާހުރެ އެވެ. ސުޝާންތު ބުނީ "ބޭފިކްރޭ" ގައި ދައްކަނީ އިންޑިއާގެ ޒަމާނީ ޒުވާނުން ކަމަށްވާނަމަ ބޮކްސް އޮފީހުގައި އެ ޒުވާނުން ތަމްސީލު ނުކުރެވުނީތީ ހައިރާންވާ ކަމަށެވެ.

ނަމަވެސް އަދިތުޔާ ޗޯޕްރާ ކަހަލަ ބޮލީވުޑްގެ ފުންނާބު އުސް މީހަކާ ދިމާކޮށްލައިގެން އަދި ރަންވީރު ކަހަލަ އަރަމުން އަންނަ އެކްޓަރަކާ ޖައްސާލައިގެން ސުޝާންތު މި ހަދަނީ ވަރަށް ބޮޑު ގޯހެއް ކަމަށާއި އެކަމުގެ ނޭދެވޭ އަސަރު އޭނާގެ ފިލްމީ ކެރިއަރަށް ކުރުމަކީ އެކަށީގެންވާ ކަމެއް ކަމަށް ގިނަ ބަޔަކު ގަބޫލު ކުރެ އެވެ.

އަނެއްކޮޅުން "ބޭފިކްރޭ" ފީކަޅާކަމުން އަދިތުޔާ ޗޯޕްރާ އަށް ފާޑުކިޔާ މީހުން ވެސް ސުޝާންތު ނޫނަސް ވަރަށް ގިނަ އެވެ. ގިނަ ބަޔަކު ގަބޫލުކުރަނީ "ބޭފިކްރޭ" އަކީ އަދިތުޔާ ކަހަލަ މީހަކު އުފައްދާ ވަރަށް ވުރެ ފެންވަރު ދަށް ފިލްމެއް ކަމަށެވެ.

"ބޭފިކްރޭ"އަށް ވުރެ ތަންކޮޅެއް ކުރިން ރިލީޒްވި ސުޝާންތުގެ "އެމް.އެސް. ދޯނީ" ބޮކްސް އޮފީހުގައި ބޮޑު ކާމިޔާބެއް ހޯދާފައިވެ އެވެ. އަދި އެ ފިލްމުގައި ސުޝާންތުގެ އެކްޓިން އަށް ވެސް ތައުރީފުކުރި މީހުން ވަރަށް ގިނަ އެވެ.