އަމްޖޭގެ ކުރީގެ ފިލްމްތަކާ އެކު އޮލިމްޕަހުގައި ފެސްޓިވަލެއް ބާއްވަނީ

މިހާތަނަށް 49 ފިލްމް ގެނެސްދީފައިވާ ޑައިރެކްޓަރު އަމްޖަދު އިބްރާހީމްގެ ފިލްމުތަކަށް ހާއްސަ ފެސްޓިވަލެއް ބާއްވަން ނިންމައިފި އެވެ.

ހަތް ވަނަ ގައުމީ ފިލްމް އެވޯޑްސްގައި ލައިފް ޓައިމް އެޗީވްމަންޓް އެވޯޑް ވެސް ލިބުނު ޑައިރެކްޓަރު ބުނީ އޭނާގެ ކުރީގެ ފިލްމުތަކާ އެކު އޮލިމްޕަހުގައި ބާއްވާ ފެސްޓިވަލަށް އެ ސިނަމާ ހޯދަން މިހާރު މަސައްކަތް ކުރަމުން އަންނަ ކަމަށެވެ.

އެހެންވެ ފެސްޓިވަލް ބާއްވާނެ ދުވަހެއް ނުނިންމަ އެވެ.

"މި ފެސްޓިވަލަށް އޮލިމްޕަސް ބޭނުން ވާނެ ގާތްގަނޑަކަށް ފަނަރަ ނުވަތަ ސަތާރަ ވަރަކަށް ދުވަހަށް. ބޭނުން ވަނީ ފެސްޓިވަލްގައި ވީހާ ވެސް ގިނަ ފިލްމްތައް ބެލުންތެރިންނަށް ދައްކާލަން،" އަމްޖޭ ބުންޏެވެ.

"އޮލިމްޕަހުގެ އެވެއިލެބިލިޓީ އަށް ބަލާފައި ފެސްޓިވަލް ފަށާނެ ތާރީހެއް ނިންމާނީ. އުންމީދު ކުރަން އޮލިމްޕަސް ލިބޭނެ ކަމަށް. ލިބުނުހާ އަވަހަކަށް ފެސްޓިވަލް ބާއްވާނަން."

އޭނާ އަދި ބުނީ ފެސްޓިވަލް ބާއްވާނީ ޓިކެޓް ވިއްކައިގެންތޯ ނުވަތަ ނޫންތޯ ނުނިންމާ ކަމަށެވެ.

އަމްޖޭ ބުނީ 49 ފިލްމެއް މިހާތަނަށް ޑައިރެކްޓްކޮށްފައިވާ އިރު، ފެސްޓިވަލްގައި ދައްކާނީ، އާންމުންގެ ތަރުހީބު ކުރިން ވެސް އެންމެ ބޮޑަށް ލިބުނު ފިލްމްތައް ހޮވައިގެން ކަމަށެވެެ.

"މިކަހަލަ ކަމެއް ކުރަން މި ނިންމީ ވެސް އަހަރެން ހަދާފައި ހުރި ފިލްމްތައް ބަލާލަން ބައެއް މީހުން އެދެމުން ވެސްދާތީ އާ އެކު. އަނެއްކާ މި އަހަރު އަހަރެންގެ އާ ފިލްމްތަކަށް ސިނަމާ އަށް ގެންނަން ނިންމާފައިވާ އިރު، ކުރިންކޮށްފައި ހުރި މަސައްކަތްތައް ދައްކާލުމަކީ ވެސް ފެސްޓިވަލެއް ބޭއްވުމުގެ އެއް ބޭނުން." އޭނާ ބުންޏެވެ. ރަނގަޅު ތަރުހީބެއް ލިބޭނެ ކަމަށް އުންމީދު ކުރަން."

އަމްޖޭގެ 50 ވަނަ ޑައިރެކްޝަނަކީ "ގިލަން" އެވެ. އަދި އޭނާ މިހާރު އަންނަނީ 51 ވަނަ ފިލްމް "ދޭތީ އަނިޔާ" ގެ މަސައްކަތް ކުރަމުންނެވެ.

"އެ ދެ ފިލްމް އިރާދަކުރެއްވިއްޔާ މި އަހަރު ސިނަމާ އަށް އަންނާނެ. އެކަމަކު ކުރިން އަޅުވާނީ ކޮން ފިލްމެއް ކަމެއް އަދި އެއްގޮތަކަށް ވެސް ނޭނގޭ،" އޭނާ ބުންޏެވެ.

"އަމްޖޭ" ޑައިރެކްޓްކޮޑްފައިވާ ފިލްމުތަކުގެ ތެރޭގައި އާންމުންގެ ތަރުހީބު ވަރަށް ބޮޑަށް ލިބުނު ފިލްމްތައް ވެސް ހިމެނެ އެވެ.

"ހުރަސް" އިން ފީޗާ ފިލްމް ޑައިރެކްޝަނަށް ނިކުތް އަމްޖޭގެ ފިލްމްތަކުގެ ތެރޭގައި ކަށްވަޅަށް ދާންދެން، އުދަބާނި، ސަނދުރަވިރޭ، މަޖުބޫރު ލޯބި، ހަ ފަރާތް، 12 ގެ ފަސް ފަދަ ފިލްމްތައް ފާހަގަކޮށްލެވެ އެވެ.