އިންޑިއާގެ އެންމެ މުއްސަނދި އެކްޓަރުގެ މަގާމު ބޮލީވުޑްގެ ސުޕަސްޓާރު ޝާހްރުކް ޚާން ހޯދައިފި އެވެ.
ހުރޫން އިންޑިއާ ރިޗް ލިސްޓް 2026 އިން ދައްކާ ގޮތުގައި، ބޮލީވުޑްގެ ރަސްގެފާނު ޝާހު ވަނީ އިންޑިއާގެ އެންމެ މުއްސަނދި އެކްޓަރުގެ މަގާމު ހޯދައިފަ އެވެ. އޭނާގެ މިލްކިއްޔާތުގެ ޖުމްލަ އާމްދަނީ 10,000 ކްރޯޑު އިންޑިއަން ރުޕީސް (1.06 ބިލިއަން ޑޮލަރު) އަށް އަރާފައިވާ ކަމަށް ރިޕޯޓްތައް ބުންޏެވެ.
ޝާހުގެ މުއްސަނދިކަން އިތުރުވުމުގެ މައިގަނޑު ސަބަބަކީ އޭނާގެ ފިލްމު އުފައްދާ ކުންފުނި "ރެޑް ޗިލީސް އެންޓަޓެއިންމަންޓް" އާއި އައިޕީއެލްގެ ކްރިކެޓް ޓީމު "ކޮލްކަތާ ނައިޓް ރައިޑާސް"ގެ ހިއްސާއިން ލިބޭ ބޮޑު އާމްދަނީ އެވެ.
އެ ލިސްޓުގެ ދެވަނައިގައި 4,000 ކްރޯޑު ރުޕީސްގެ މިލްކިއްޔާތަކާ އެކު އަމީތާބް ބައްޗަން އޮތްއިރު، މަޝްހޫރު އެކްޓަރު ސަލްމާން ޚާން ވަނީ 3,000 ކްރޯޑު ރުޕީސްގެ މުއްސަނދިކަމާ އެކު އަލަށް މި ލިސްޓުގައި ހިމެނިފަ އެވެ.
ޝާހު ދެން އެންމެ އަވަހަށް ފެންނާނީ ސުޖޯއީ ގޯޝް ޑައިރެކްޓްކުރާ ބޮޑު އެކްޝަން ތުރިލާ ފިލްމު "ކިންގް" އިންނެވެ. އަންނަ ޑިސެމްބަރު މަހު 24 ގައި ރިލީޒްކުރާ އެ ފިލްމުގައި ޝާހުގެ ދަރިފުޅު ސުހާނާ ޚާންގެ އިތުރުން ދީޕިކާ ޕަޑުކޯން އާއި ރާނީ މުކަރްޖީ އަދި އަބީޝެކް ބައްޗަން ވެސް މުހިންމު ރޯލުތައް ކުޅެފައިވެ އެވެ.