ތެލުގޫ ސިނަމާގެ މަޝްހޫރު އެކްޓަރު ރާމް ޗަރަންގެ ކަނާތު އަތަށް ލިބުނު އަނިޔާއަކާ ގުޅިގެން އަޅާފައިވާ ކާސްޓާއި އޮޕަރޭޝަނަށް ފަހު ލައްވާފައިވާ ރޮޑުތައް ނަގައި، ރިހެބިލިޓޭޝަން އަދި ފިޒިއޯތެރަޕީގެ ފަރުވާ ފަށައިފި އެވެ.
ރިޕޯޓްތައް ބުނި ގޮތުގައި، އިންޑިއާގެ ކޮއިމްބަތޫރުގެ ގަންގާ ހޮސްޕިޓަލުގައި ކުރިއަށް ގެންދިޔަ އެ ފޮލޯއަޕް ޕްރޮސީޖާގައި، އޭނާގެ އަތަށް ލައްވާފައިވާ ރޮޑުތަކާއި ކާސްޓް ވަނީ ކާމިޔާބުކަމާ އެކު ނަގައިފަ އެވެ.
ރާމް ޗަރަންއަށް މި އަނިޔާ ލިބުނީ އޭނާގެ ކުރިއަށް އޮތް ސްޕޯޓްސް އެކްޝަން ޑްރާމާ ފިލްމު "ޕެއްޑީ"ގެ ހަނގުރާމައިގެ ނުރައްކާތެރި މަންޒަރެއް ޝޫޓްކުރުމުގެ ތެރޭގަ އެވެ.
އެ އަނިޔާއަށް ފަރުވާ ހޯދުމަށް އޭނާ ވަނީ މިދިޔަ ޖުލައި މަހު އޮޕަރޭޝަނެއް ވެސް ކޮށްފަ އެވެ.
ޑޮކްޓަރުންގެ އިރުޝާދާ އެކު، ރާމް ޗަރަން ދެން ކުރިއަށް ގެންދާނީ 8-10 ހަފުތާގެ ނިއުރޯ-މަސްކިއުލާ އަދި ފިޒިއޯތެރަޕީ ޕްރޮގްރާމެއް ކަމަށް ރިޕޯޓްތައް ބުންޏެވެ.
މުޅިން ރަނގަޅުވެ، ފިލްމީ މަސައްކަތްތަކަށް އޭނާއަށް އެނބުރި ދެވޭނީ އަންނަ ނޮވެމްބަރު މަހުގެ މެދުތެރޭގައި ކަމަށް ބެލެވެ އެވެ.
"ޕެއްޑީ"ގެ އިތުރުން ދެކުނު އިންޑިއާގެ ކުޅަދާނަ އެކްޓަރު ރާމް ޗަރަން އަންނަނީ ޑައިރެކްޓަރު ސުކުމާރުގެ "އާރްސީ17"ގެ މަސައްކަތްތައް ވެސް ކުރަމުންނެވެ.