ބާރު ޝަރީފް މިހާރު ކޮބާ؟

ދެހާހުގެ އަހަރުތައް ފެށިގެން އައި އިރު ރާއްޖޭން އެންމެ ފާހަގަކޮށްލެވުނު އެއް ޑައިރެޓްރަކީ މުހައްމަދު ޝަރީފް (ބާރު ޝަރީފް) އެވެ. އޭރު ޑްރާމާ ސިލްސިލާތަކަށް ފޯރި ދެމުން ގެންދިޔަ މީހުން އެންމެ ލޯބިވި އެއް ޑައިރެކްޓަރަކީ ވެސް އޭނާ އެވެ.

ބާރު ޑައިރެކްޓްކޮށްފައިވާ ޑްރާމާތަކުގެ ތެރޭގައި "އިހްތިޔާރު" އާއި "ލޯބިވާ ނަމަ" އަކީ ވަކިން ފާހަގަކޮށްލެވޭ މަގުބޫލް ދެ ސިލްސިލާ އެވެ. ފަހުން އޭނާ "އަހަރެން" ގެ ނަމުގައި ފީޗާ ފިލްމެއް ވެސް ޑައިރެކްޓް ކުރި އެވެ. އެކަމަކު އެ ފިލްމަކީ ކްރިޓިކަލީ އެކްލެއިމްޑް ފިލްމަކަށް ވިޔަސް، ވިޔަފާރީގެ ގޮތުން އެހާ ކާމިޔާބު ފިލްމެއް ނޫނެވެ.

ބާރުގެ މަސައްކަތުގެ ހަރުގަނޑަށް ބަލާ އިރު ބައެއް ދިވެހި ލަވަތަކުގެ ހިތްގައިމު ވީޑިއޯ ވެސް އެބަ ހުއްޓެވެ.

އޭނާގެ ގިނަ އުފެއްދުންތަކެއް ފެންނާނެ ކަމަށް އުންމީދުކޮށްގެން ތިއްބަސް ކަންދިމާ ކުރި ގޮތުން އެހެނެއް ނުވި އެވެ. ބާރު ޝަރީފަކީ މިހާރު ފިލްމީ ދާއިރާއާ ފެއަށް ޖެހިގެން ހުރި މީހެކެވެ. އެއީ ބައިވަރު ސަބަބުތަކާ ހެދި އެވެ.

އެކަމަކު އޭނާގެ ޝައުގު އެންމެ ބޮޑަށް އަތް މަސައްކަތަކުން އަތެއް ދުލެއް ނުކުރެ އެވެ. އެއީ ޓީވީ ކޮމާޝަލް ހެދުމެވެ. ރާއްޖޭގެ ބައެއް ކުންފުނިތަކުގެ ޓީވީ އިޝްތިހާރު ހެދުމުގެ މަސައްކަތް ކުރަމުން އަންނަ އިރު، އޭނާގެ މަސައްކަތް އޮތީ މޫވީ މޯލްޑިވްސްގެ ތެރޭގަ އެވެ. އެއީ ކުޅިވަރުގެ ދަނޑުގައި ޑޮކްޓަރެއްގެ ލަގަބު ދީފައިވާ މަޝްހޫރު ޅެންވެރިޔާ އަދި ޕްރޮޑިއުސަރު އަހުމަދު ޝަބީކާއި ހުސައިން އިމްތިޔާޒް (އިންތި) އާ އެކު ބާރު ހިއްސާވާ ސްޓޫޑިއޯއެކެވެ.

"މޫވީ މޯލްޑިވްސްގައި މިހާރު މި ކުރާ މަސައްކަތެއް މި ކުރަނީ. އަސްލު އަހަރެން އެންމެ ގަޔާވާ މަސައްކަތް މި ތަނުގައިި މި ކުރަނީ. އެއީ ޓީވީ ކޮމާޝަލް ހެދުން،" އެ މަސައްކަތުން ރަނގަޅު އާމްދަނީއެއް ވެސް ލިބޭކަން ފާހަގަކޮށް އޭނާ ބުންޏެވެ.

އެކަމަކު ސުވާލަކީ ޑްރާމާއެއް ސިލްސިލާއެއް ނުވަތަ ފީޗާ ފިލްމެއްގެ މަސައްކަތަށް ބާރު އަލުން އެނބުރި އައިސް ދާނެތޯ އެވެ؟ އޭގެ ޖަވާބަކަށް ދިއުމުގެ ކުރިން އޭނާ ބުނީ ފިލްމް ހަދަން އެހާ ޝައުގުވެރިކަން ނުހުންނަ ވާހަކަ އެވެ.

"ޑްރާމާތައް ހެދީ ޓީވީއެމްގައި މަސައްކަތް ކުރި ދުވަސްވަރު. ޔޫއެންއެފްޕީއޭގެ ޕްރޮޖެކްޓެއްގެ ދަށުން އެކަހަލަ ވަަރަށް ގިނަ މަސައްކަތްތައް ވެސް ކުރެވިފައި ހުންނާނެ،" ބާރު ބުންޏެވެ.

އޭނާ ބުނީ ފިލްމީ މަސައްކަތްތަކަށް ދާން ބޭނުން ނުވާ ސަބަބުތަކުގެ ތެރޭގައި އެ ދާއިރާގެ ކަންކަން އަދިވެސް އެންމެ ބޭނުންވާ ގޮތަށް ބައްޓަންވެފައި ނެތުން ހިމެނޭ ކަމަށެވެ. އަދި މި ދާއިރާ ކުރިއަރަން ޖެހޭ ވަރަށް، އެ ބަދަލު ނުފެންނަކަން ވެސް އޭނާ ފާހަގަ ކުރި އެވެ.

"އަހަންނަކީ އަބަދު ވެސް މަސައްކަތެއް ކުރާ ކަމަށް ވަންޏާ އެކަމަކާ ވަރަށް ކޮމިޓްވެގެން މަސައްކަތް ކުރާ މީހެއް. އަދިވެސް ގަބޫލް ކުރެވެނީ ފިލްމެއް ހެދުން ކަހަލަ ޕްރޮޖެކްޓަކަށް ބަޔަކު އޮންބޯޑްކޮށްގެން މަސައްކަތް ކުރާ އިރު، ދިމާވެދާނެ ދަތިތައް އެބަ ހުއްޓޭ. މިސާލަކަށް ފިލްމެއް މަސައްކަތް ފަށާ ތަނުން އޭގައި އުޅޭ ބަޔަކު ވަކި ހިސާބަކުން ވަގުތު ނުދޭ ކަމަށް ވަންޏާ ވަރަށް ބޮޑު މައްސަލައަކަށް ވާނެ،" ބާރު ބުންޏެވެ. "އެހެންވީމަ ވަރަށް އުނދަގޫ މި ދާއިރާގެ ތެރޭގައި ޓްރަސްޓް އުފައްދަން."

އޭނާ ބުނީ ފިލްމީ ދާއިރާ ކުރިއެރުވޭނީ ސަރުކާރުން ވެސް މި ދާއިރާ އަށް އެހީތެރިކަމެއް ފޯރުކޮށް ދީގެން ކަމަށެވެ. އެގޮތުން ދާއިރާ އަށް މީހުން ބިނާ ކުރުމަށް ޓްރޭނިން ހޯދޭނެ ވަސީލަތްތަކެއް ގާއިމުވުން މުހިއްމު ކަމަށް ބުންޏެވެ.

"އަޅާނުލެވި އޮތް ދާއިރާއެއްގެ ގޮތުގައި މި އިންޑަސްޓްރީ ފެންނަނީ. އެބައި ވެސް އެބަ ޖެހޭ ރަނގަޅު ކުރަން. އޭގެ ތެރޭގައި ގާނޫނީ ގޮތުން ވެސް ފިލްމީ ދާއިރާގެ ކަންކަން ހަރުދަނާ ކުރެވޭނެ އުސޫލްތަކެއް އެބަ ޖެހޭ ގާއިމު ކުރަން،" ރާއްޖޭގައި ބާއްވާ ފިލްމް އެވޯޑްތަކުގެ ޖަޖްކަން ވެސް ކުރަމުން އަންނަ ބާރު ބުންޏެވެ.

އޭނާގެ އުންމީދަކީ ފިލްމީ ދާއިރާ މިހާރު އޮތް ހަރުފަތުން އެހެން ހަރުފަތަށް ދާ މަންޒަރު ފެނުމެވެ. ބާރު ބުނީ ފިލްމް މޭކިން މަސައްކަތްތަކަށް ބަލާ އިރު ރާއްޖޭގައި މިހާރު އެންމެ ޒަމާނީ ވަސީލްތައްތައް މި މަސައްކަތުގައި މިހާރު ބޭނުން ކުރާ ކަމަށެވެ.

އެހެން ނަމަވެސް އެއަށް ވުރެ އެންމެ މުހިއްމު ކަމެއް ގޮތުގައި އޭނާ ދެކެނީ ފިލްމެއް ހަދާ ނަމަ ވާހަކަ އާއި ސްކްރީންޕްލޭ އަށް ދޭން ޖެހޭ ސަމާލުކަން ދިނުމެވެ. މިއީ ޖަޖެއްގެ ގޮތުގައި އޭނާ އަށް ހަމަ ޔަގީނުން ވެސް ފިލްމްތަކުން ފާހަގަ ކުރެވޭ މައިގަނޑު މައްސަލަ އެވެ. އެހެންވެ އެއްޗަކަށް އެއްޗެއް ހެދުމުގެ ވިސްނުން ދޫކޮށްލައި، ވަގުތާއި ރިސާޗްތައް ވެސް މިކަމަށް ބޭނުންވާ ކަމަށް ބުންޏެވެ.

"ފިލްމްތަކުން އަދިވެސް އެންމެ ފާހަގަ ކުރެވޭ އެންމެ ބޮޑު މައްސަލަކީ ސްޓޯރީ ނުވަތަ ސްކްރީންޕްލޭ މިސްރާބެއް ނެތް ގޮތަށް ގެނެސް ދީފައި އޮތުން. އެކަމަކު މިއީ ފިލްމެއްގެ ބެކްބޯން. އޭތި ރަނގަޅުވެއްޖެ ނަމަ، ފިލްމް ރަނގަޅު ވާނެ. ބޭނުން ވަނީ ވަގުތާއި މަސައްކަތް އެއަށް ދީގެން އެކަން ކުރުން،" އޭނާ ބުންޏެވެ. "އެއްޗެއް ލިޔާ އިރު ރިސާޗްކޮށްގެން ލިޔަން ޖެހެނީ މި ސަބަބާ ހުރެ."

މި ދާއިރާ ތަރައްގީވުމަކީ ބާރު ދެކެން ބޭނުންވާ ކަމެކެވެ. މޮޅެތި އުފެއްދުންތައް ދިވެހިންނަށް ވެސް އުފެއްދޭނެކަމީ އޭނާ ގަބޫލުކުރާ ހަގީގަތެކެވެ.

ދެން އަނެއްކާ ވެސް އޮތީ ހަމަ ކުރީގެ ސުވާލެވެ. ބާރު އިތުރު ފިލްމެއް ގެނެސް ދީފާނެ ހެއްޔެވެ؟

"ނޫނެކޭ ނުބުނާނަން. އެކަހަލަ ވިސްނުމެއް އެބަހުރި. އެކަމަކު ނޭނގޭ އެއީ ކޮން އިރަކު ކަމެއް،" ހިނގިނޑަކުން ފުއްދާލުން އޭނާ ބުންޏެވެ. "ފިލްމެއް އަލުން ހަދާ ނަމަ ފެންޓަސީ އެއްޗަކާ ދޭތެރޭ ކަންނޭނޭ ހިޔާލު ކުރެވޭނީ."

ޔަގީނުން ވެސް ބާރުގެ މި ވާހަކަ އިން ހިތްހަމަޖެހުމެއް ލިބޭނެ ބަޔަކު ތިބޭނެ އެވެ. އޭނާގެ ފީޗާ ފިލްމަކަށް މި ހިސާބުން އިންތިޒާރު ކުރަން ފަށަމާ ހިނގާށެވެ. ޔަގީންވާ ކަމަކީ ފިލްމީ ދާއިރާ އިން އޭނާ އެއްކޮށް ގެއްލެން ބޭނުން ނުވާ ކަމެވެ.