ދިވެހި ފުރަތަމަ އެނިމޭޓެޑް ޝޯގެ ގޮތުގައި "މާކަނާ ޝޯ" ބޮޑު މަގުބޫލުކަމެއް ހޯދި އެވެ. އޭގެ މޭސްތިރިޔާ ޔާމީން ރަޝީދުގެ ހުނަރާ މެދު މިހާރު ޝައްކެއް ނުކުރާނެ އެވެ. އޭނައަކީ އެނިމޭޓެޑް ދިވެހި އުފެއްދުންތައް ވައިގައި ހިއްޕާލި ހުނަރުވެރިޔާ އެވެ.
ޔާމީންގެ ކުރިއަށް ހުރި މަސައްކަތްތަކަށް ބަލާ އިރު، ވަރަށް ވަރުގަދަ ބިޔަ ޕްރޮޖެކްޓެއް އެބަ އޮތެވެ. އަގުގެ ގޮތުން ވެސް ބޮޑެވެ. އެއީ ޕޯޗްގީޒުންގެ އަޅުވެތިކަމުން ރާއްޖެ މިނިވަންކުރެއްވި އުތީމު މުހައްމަދު ތަކުރުފާނު (ބޮޑު ތަކުރުފާނު) ނުވަތަ އުތީމު ތިން ބަދަވީންގެ ވާހަކަ އެވެ. އޭނާ މިހާރު އަންނަނީ އެނިމޭޓެޑް ފިލްމެއްގެ ގޮތުގައި ބޮޑު ތަކުރުފާނު ވާހަކަ ބޮޑު ސްކްްރީނަށް ގެނައުމުގެ ތައްޔާރީތަކެއްވަމުންނެވެ.
ޕަބްލިކް ސާވިސް މީޑިއާ (ޕީއެސްއެމް) ގެ މި ޕްރޮޖެކްޓުގެ ރަފް ޑެމޯއެއް ތައްޔާރުކޮށް މިހާރު ވަނީ ބެލުންތެރިންނަށް ދައްކާލައިފަ އެވެ. އެއީ "ބަދަވީން" އެވެ.
"ބޮޑުތަކުރުފާނު ވާހަކައިގެ އެނިމޭޓެޑް ފިލްމެއް ހަދަން ޕީއެސްމުން ކުރި ރިކްއެސްޓަކަށް ފެށި ޕްރޮޖެކްޓެއް މިއީ،" ސެލްމިން އެނިމޭޝަންގެ ނަމުގައި ސްޓޫޑިއޯއެއް ހިންގަމުން އަންނަ ޒުވާން ހުނަރުވެރިޔާ ބުންޏެވެ.
އޭނާ ބުނީ ބޮޑު ތަކުރުފާނު ވާހަކަ އެނިމޭޓެޑް ފިލްމެއްގެ ގޮތުގައި ގެނެސް ދެވިދާނެތޯ ބެލުމަށް ޕީއެސްއެމުން އޭނާ އަށް ހުށަހެޅުމަކީ ފަހުރެއް ކަމަށް ދެކޭ ކަމަށެވެ.
"އެ ރިކްއެސްޓަށް އަޅުގަނޑު ލިޔެ ތައްޔާރު ކުރާ ގޮތަށް ޕްރޮޕޯސަލެއް ޕީއެސްއެމްގެ ފުރަތަމަ ހުށަހެޅީ. ދެން އެ ފިލްމް ޑިވެލޮޕްކުރާނެ ގޮތުގެ ވަރަށް ރަފް ޑެމޯއެއް ތައްޔާރުކޮށްފައި ހުށަހެޅީމަ ޕީއެސްއެމުން ވަރަށް ހިތްހަމަޖެހޭ ކަމަށް މިހާރު ނިންމާފައި އޮތީ،" މިދިޔަ އަހަރުގެ ޑިސެމްބަރު މަހުގެ ތެރޭގައި މަސައްކަތް ފެށި ޕްރޮޖެކްޓާ ބެހޭ ގޮތުން ޔާމީން ބުންޏެވެ. "މިކަހަލަ މަސައްކަތް ކުރާ އިތުރު ބަޔަކު ވެސް ރާއްޖޭގައި ތިއްބައި ޕީއެސްއެމުން ސީދާ އަޅުގަނޑަށް މިވަރުގެ އެއްޗެއް ހަދަން ރިކްއެސްޓް ކުރި ކުރުމަކީ ވަރަށް އުފާވާ އަދި އެހާމެ ފަހުރުވެރިވާ ކަމެއް. އަދި މިއީ ވަރަށް ބޮޑު ޗެލެންޖެއްގެ ގޮތުގައި ދެކިގެން މިކަން ކުރަން ބޭނުން ވަނީ."
އެހެން ނަމަވެސް "ބަދަވީން" ގެ އަމަލީ މަސައްކަތް އަދި ކުރިއަށް އޮތީ އެވެ. މި ފިލްމަކީ ވަރަށް ބޮޑު ހަރަދެއް ހިނގާ ކަމަކަށްވާތީ ފީއެސްއެމަށް ހުރި މާލީ ދަތިތަކާ ހެދި ޕްރޮޖެކްޓް އަދި އޮތީ ފެށުމުގެ ފެހި ސިގްނަލް ނުލިބި އެވެ.
"ޕީއެސްއެމުން މިހާރު މިއަށް ފަންޑް ރައިޒް ކުރުމުގެ މަސައްކަތް ކުރަމުންދާ ކަމަށް ބުނެފައި އޮތީ. އެހެންވީމާ އެ ބޭފުޅުން ގޯ އޭ ބުނާ އިރަށް އަޅުގަނޑުމެން ތިބޭނީ ތައްޔާރަށް،" ގާތްގަނޑަކަށް ދޮޅު ގަޑި އިރަށް ތައްޔާރު ކުރާ "ބަދަވީން" އާ ބެހޭ ގޮތުން ޔާމީން ބުންޏެވެ.
"ބަދަވީން" ގެ ވާހަކައަކީ ބޮޑު ތަކުރުފާނުގެ އެންމެ ޅަފުރާ އިން ފެށިގެން ގޮސް، ޕޯޗްގީޒުންގެ އަތްދަށުން ރާއްޖެ މިނިވަން ކުރުމަށް ކުރާ ވަރުގަދަ ޖިހާދާ ހަމައަށް ވަރަށް ބޮޑެތި ރިސާޗްތަކާ އެކު ގެނެސް ދޭން ނިންމާފައިވާ އެނިމޭޓެޑް ފިލްމެކެވެ.
"މީގެ ސްކްރިިޕްޓް އެކުލަވާލަނީ މިހާތަނަށް ބޮޑު ތަކުރުފާނާ ބެހޭ ގޮތުން ލިޔެފައި ހުރި ހުރިހާ ޑޮކިއުމަންޓްތަކެއް ރިސާޗްކޮށްގެން. އަދި ސްކްރިޕްޓް ޑިވެލޮޕްވަމުން އަންނަ ވަރަކަށް ރާއްޖޭގެ ތާރީހު ދިރާސާ ކުރައްވާ ބޭފުޅުންގެ ހިޔާލާއި ލަފާ ހޯދަމުން ދާނެ،" ޔާމީން ބުންޏެވެ. "ބޭނުން ވަނީ ކޮންޓެންޓްގެ ގޮތުން ވީހާ ވެސް ހަގީގަތާ އެއްގޮތް، އަދި ބަލާ މީހުންނަށް އެންޓަޓައިން ވެސް ވާނެ އިލެމަންޓްސްތަކާ އެކު މީތި ގެނެސް ދޭން."
ޔާމީން ބުނީ އޭނާ އެންމެ ބޭނުންވާ ކޮލިޓީގައި "ބަދަވީން" ވުޖޫދަށް ގެންނަން ގާތްގަނޑަކަށް ދެ އަހަރު ދުވަސް ބޭނުން ވާނެ ކަމަށެވެ. އަދި ޕީއެސްއެމަށް ހުށަހެޅި ޕްރޮޕޯސަލްގައި ވެސް އެކަން ފާހަގަކޮށްފައި ވާނެ ކަމަށް ބުންޏެވެ.
ޔާމީން ބުނީ "ބަދަވީން" ހަދަން ބޮޑު ހަރަދެއް ދާ ސަބަބަކީ އެއީ ޓެކްނިކަލް ގޮތުން ބޮޑު މަސައްކަތެއް ކުރަން ޖެހޭ އަދި ގިނަ މެޝިނަރީ ބޭނުން ކުރަން ޖެހޭ ޕްރޮޖެކްޓަކަށްވާތީ ކަމަށެވެ.
"ބޭނުން ވަނީ އިންޓަނެޝަނަލް ފެސްޓިވަލްތަކުގައި ވާދަކުރެވޭ ވަރުގެ އެއްޗެއް ރާއްޖެ އަށް ވެސް ހެދިދާނެކަން ސާބިތުކޮށް ދޭން. މީތި ހަދާފައި ބޭރުގެ ފެސްޓިވަލްތަކަށް ގެންދިއުމަކީ ވަރަށް ބޮޑު އުންމީދެއް،" އޭނާ ބުންޏެވެ. "ޔަގީންވާ ކަމަކީ ކޮންޓެންޓްގެ ގޮތުން ބޮޑުތަކުރުފާނު ވާހަކައަކީ އިންޓަނެޝަލީ ވެސް ބަލައިގަންނާނެ ވަރުގެ އެއްޗަކަށް ވާނެކަން. ފަަހަރުގައި ދެން ބޭރުގައި ހަދާ އެނިމޭޓެޑް ފިލްމުގެ އެނިމޭޝަން ކޮލިޓީ އާ އަޅާ ނުކީދާނެ."
ޔާމީން ބުނީ "ބަދަވީން" ބޮޑު ސްކްރީނަށް ގެންނާނެ ގޮތުގެ ތަސައްވުރު އޮތީ ސިކުނޑީގައި ކުރަހައި، ކުލަ ޖައްސައި ނިންމައިފައި ކަމަށެވެ.
"ވީހާ ވެސް ރިއަލިސްޓިކް އެއްޗެއް ގެނެސް ދޭން ބޭނުން ވަނީ. އެ ފެންވަރަށް މީތި ހެދޭތޯ މަސައްކަތް ކުރާނަން. މާކަނާ ޝޯ އިން ފެނިގެންދާ ކަހަލަ އެނިމޭޝަންތަކެއް ނޫން ބަދަވީން ފެންނާނީ،" އޭނާ ބުންޏެވެ.
މި ޕްރޮޖެކްޓަށް އެކި ދިމަދިމާލުން ބޭނުންވާ މީހުން ހޯދައިގެން "ސަޅި" އެއްޗެއް ގެނެސް ދޭނެ ކަމުގެ ޔަގީންކަން ޔާމީން ދެ އެވެ. އެގޮތުން އެނިމޭޓަރުންނާއި ތްރީޑީ އާޓިސްޓުންގެ އިތުރުން ކެރެކްޓާތަކަށް އަޑު އަޅާނެ ފަންނުވެރިން ޕްރޮޖެކްޓަށް ބޭނުން ވާނެ އެވެ.
"މީގެ މިއުޒިކް ހަދަންވެގެން އިންޑިއާގެ މަޝްހޫރު ބައެއް މިއުޒިކް ޑައިރެކްޓަރުންނާ ވެސް ވާހަކަ ދެކެވިފައި ހުރީ. ބަދަވީންގެ މިއުޒިކް ހަދާނީ ދިވެހި މިއުޒިޝަނުންނާއި އިންޑިއާގެ މިއުޒިޝަނުން ކޮލަބަރޭޓްވެގެން،" ޔާމީން ބުންޏެވެ.
ރާއްޖޭގެ ތާރީހުގެ މުހިއްމު ހާދިސާތައް އަދި މުހިއްމު ޝަހުސިއްޔަތުންގެ ހަނދާންތައް އާކޮށްދިނުމަށް މިފަދަ އުފެއްދުންތަކުގެ ބޭނުންތެރިކަން ކިތަންމެހާ ވެސް ބޮޑެވެ.
ޔާމީންގެ "ބަދަވީން" އަކީ ދިވެހި ފަހުރުވެރި ވާނެ ވަރުގެ ޕްރޮޖެކްޓަކަށް ވާނެ ކަމަށް އުންމީދު ކުރަމާ ހިނގާށެވެ. އަދި މި ފިލްމް ބެލުންތެރިންނާ ހަމައަށް ދުރު ނޫން މުސްތަގުބަލެއްގައި ފެންނާނެ ކަމަށް ވެސް އުންމީދު ކުރަމާ ހިނގާށެވެ.