ތައިލެންޑް ފުޓްބޯޅަ ޓީމެއްގެ 12 މެމްބަރުންނާއި ޓީމްގެ ކޯޗް އެ ގައުމުގެ ތަމް ލުއާން ހޮހަޅައިގެ ތެރޭގައި ތާށިވެ، އެ މީހުން ސަލާމަތް ކުރަން ހިންގި ކާމިޔާބު ބޮޑު އޮޕަރޭޝަނެއް ބިނާކޮށް ފިލްމެއް ހަދަން ނިންމައިފި އެވެ.
މިކަން އިއުލާން ކުރި އަދި ތައިލެންޑްގައި ދިރިއުޅެމުން އަންނަ ޕިޔޯ ފްލިކްސް އެންޓަޓައިންމަންޓްގެ މެނެޖިން ޑިރެކްޓަރު މައިކަލް ސްކޮޓް ބުނީ އެ ހާދިސާ ބޮޑު ސްކްރީނަށް ގެންނަން އެކަމުގެ ހުއްދަ ތައިލެންޑްގެ ކަމާބެހޭ ފަރާތްތަކުން ހޯދަން މިހާރު ވާހަކަ ދައްކަމުން އަންނަ ކަމަށެވެ.
އިންދަ ބްލިންކް އޮފް ދި އައި (2009) އާއި ގޯޑް އިޒް ނޮޓް ޑެޑް (2018) ފަދަ ފިލްމްތައް ގެނެސްދިން މައިކަލް ގޮތުގައި ހޮހަޅައިގައި ތާށިވި މީހުން ސަލާމަތްކުރަން ކުރި މަސައްކަތަކީ އާދަޔާހިލާފު އަދި މުޅި ދުނިޔޭގެ ސަމާލުކަން ހުއްޓުނު ވަރަށް އަސަރުގަދަ ހާދިސާއެކެވެ.
"މިއީ ވަރަށް ވެސް އިންސްޕިރޭޝަނަލް އަދި އެހާމެ ޖަޒުބާތީ ހާދިސާއެއް. މި ހާދިސާ ވަރަށް ގާތުން ފޮލޯކުރަމުން ދިޔަ މީހެއްގެ ހައިސިއްޔަތުން އަހަންނަށް ލިބޭނެ ވަރަށް ބޮޑު އުފަލަކަށް ވާނެ ހޮހޮޅަ ހާދިސާ އަށް ފިލްމެއް ހަދަން ފުރުސަތު ލިބުން،" މައިކަލް ބުންޏެވެ.
މިދިޔަ މަހުގެ 23 ވަނަ ދުވަހު ހޮހޮޅައިގައި ތާށިވި އެންމެން ސަލާމަތްކޮށް ނިމުނީ މިދިޔަ އަންގާރަ ދުވަހު އެވެ. ބާރަ ކުދިންނާއި ކޯޗު 17 ދުވަސް ފަހުން ހޮހޮޅައިގެ ތެރެއިން ސަލާމަތް ކުރެވުމާ އެކު މި މަސައްކަތުގައި ހަރަކާތްތެރިވި މީހުންނަށް މުޅި ދުނިޔެއިން ވެސް ވަނީ ވަރަށް ބޮޑަށް ތައުރީފުކޮށްފަ އެވެ.
ފުޓްބޯޅަ ޓީމްގެ ކުޅުންތެރިންނާއި ކޯޗް ހޮހަޅަ އަށް ވަނީ 23 ވަނަ ޕްރެކްޓިސް ނިންމައިލުމަށް ފަހު އެވެ. އެކަމަކު ކުދިން ހޮހަޅަ އަށް ވަން ފަހުން ބޯކޮށް ވާރޭ ވެހި ހޮހަޅަ ތެރެއަށް ފެންގަނޑު ދަމައިގަތުމުން ނުކުމެވޭނެ ގޮތެއް ނެތި ތާށިވެފައިވާ ތިބޭތާ 9 ދުވަސް ފަހުން އެ ކުދިން ހޯދީ އިނގިރޭސިވިލާތުގެ ދެ ޑައިވަރުންނެވެ.
މި ހާދިސާއާ ގުޅިގެން ކުދިން ސަލާމަތް ކުރަން އުޅުނު ތައި ނޭވީގެ ކުރީގެ ޑައިވަރަކު މި މަހުގެ 6 ވަނަ ދުވަހު މަރު ވެސް ވެފައިވެ އެވެ.