"ޖެކް ރީޗާ" ކުޅެން ޓޮމް ކްރޫޒް މާ ކުރު: ލީ ޗައިލްޑް

"ޖެކް ރީޗާ" ގެ ދެ ފިލްމެއްގައި މަޝްހޫރު އެކްޓަރު ޓޮމް ކްރޫޒް ޓައިޓްލް ރޯލް ކުޅުނު ނަމަވެސް، މި ސީރިޒްގެ އިތުރު ބަޔަކުން ދެން އޭނާ ނުފެންނާނެ ކަމުގެ ޔަގީންކަން ލިޔުންތެރިޔާ ލީ ޗައިލްޑް ދީފި އެވެ.

ކްރޫޒް ވަނީ 2012 ގައި ރިލީޒް ކުރި އެކްޝަން ތުރިލާ "ޖެކް ރީޗާ" އާއި 2016 ގައި ގެނެސް ދިން "ޖެކް ރީޗާ: ނެވަ ގޯ ބެކް" ގައި މަސައްކަތްކޮށްފަ އެވެ. މި ދެ ފިލްމަކީ ވެސް ބެލުންތެރިންގެ ތަރުހީބު ލިބުނު، ބޮކްސް އޮފީހުގައި ވަރަށް ހިނގި ދެ ފިލްމު ވެސް މެ އެވެ.

ނަމަވެސް ލީ މިހާރު ބުނަނީ ޖެކް ރީޗާގެ ކެރެކްޓާ ކުޅޭ ވަރަށް ވުރެ ހަގީގަތުގައި ވެސް ކްރޫޒް، 56، އިސްކޮޅުން މާ ކުރު ކަމަށެވެ. ލީގެ ވާހަކައިގައި ސިފަކޮށް ދީފައިވާ ޖެކް ރީޗާގެ އަސްލު އިސްކޮޅަކީ 6 ފޫޓް 5 އިންޗި އެވެ. ނަމަވެސް ކްރޫގެ އިސްކޮޅަކީ 5 ފޫޓް 7 އިންޗި އެވެ.

މިކަމާ ބެހޭ ގޮތުން ބީބީސީ ރޭޑިއޯ މެންޗެސްޓާ އަށް ދިން އިންޓަވިއުއެއްގައި ލީ ބުނީ އޭނާއަކީ ކްރޫޒްގެ ވަރަށް ބޮޑު ފޭނެއް ކަމަށާއި އެއީ ބަލައިލަން ވެސް ރީތި، ހުނަރުވެރި އެކްޓަރެއް ކަމަށެވެ.

"އެކަމަކު އަހަރެން ބުނާނީ ޖެކް ރީޗާގެ ކެރެކްޓާ އަށް ކްރޫޒް ފިޒިކަލީ ފިޓެއް ނޫނޭ. އެންމެ ބޮޑު މައްސަލައަކީ އޭނާ އިސްކޮޅުންް ކުރުވުން. އެހެންވެ ކުރިއަށް އޮތް ތަނުގައި ޖެކް ރީޗާގެ ކެރެކްޓާއަކުން ދެން އޭނައެއް ނުފެންނާނެ،" ލީ ބުންޏެވެ.

އޭނާ ބުނި ގޮތުގައި ސްކްރީނުން ޖެކް ރީޗާ އެންމެ ފުރިހަމަ އަށް ތަޖުރިބާ ކުރެވޭނީ ސިފަކޮށްފައިވާ ސައިޒްގެ އެކްޓަރެއް ލައްވައި އެ ރޯލް ކުޅުވައިގެންނެވެ.

"އެގޮތުން އޭނާގެ އިސްކޮޅަލީ ވަރަށް މުހިއްމު ބައެއް،" ލީ ބުންޏެވެ. "އެކަމަށް ވިސްނައިގެން ދެން ޖެކް ރީޗާ ގެނެސް ދޭނީ."

"ޖެކް ރީޗާ" ގެ އަލުން ސްކްރީނަށް ގެންނަން ވަނީ ނިންމައިފަ އެވެ. އެކަމަކު އެއީ ފީޗާ ފިލްމެއްގެ ގޮތުގައިތޯ ނުވަތަ ޓީވީ ސިލްސިލާއެއްގެ ގޮތުގައިތޯ އަދި ކަށަވަރެއް ނުވެ އެވެ.

ބޮކްސް އޮފީހުގައި 218.3 މިލިއަން ޑޮލަރުގެ އާމްދަނީއެއް ހޯދި "ޖެކް ރީޗާ" ޑައިރެކްޓް ކުރީ ކްރިސްޓޯފާ މެކްކުއަރީ އެވެ. އެޑްވަޑް ޒިވިކް ޑައިރެކްޓް ކުރި ދެވަނަ ބަޔަށް 162.1 މިލިއަން ޑޮލަރުގެ އާމްދަނީއެއް ލިބިފައިވެ އެވެ.