އަރުޖުން ކަޕޫރާ ހެދި އޭނާގެ ބައްޕަ، ޕްރޮޑިއުސަރު ބޯނީ ކަޕޫރާއި ސަލްމާން ހާންގެ ގުޅުން ވަރަށް ބޮޑަށް ގޯސްވެފައިވާ ކަމަށާއި ދެ މީހުން މިހާރު ވާހަކަ ވެސް ނުދައްކާ ކަމަށް މީޑިއާތަކުން ބުނެފި އެވެ.
ބޮލީވުޑްގެ ހަބަރުތައް ގެނެސްދޭ ނޫސްތަކުން ބުނި ގޮތުގައި ސަލްމާން ކުޅުނު ބައެއް ފިލްމުތައް ޕްރޮޑިއުސްކޮށްފައިވާ ބޯނީ އާއި އޭނާގެ ގުޅުމުގައި ކުނި ޖެހިފައި ވަނީ ސަލްމާންގެ ކޮއްކޮ އަރްބާޒް ހާންގެ ކުރީގެ އަންހެނުން މަލައިކާ އަރޯރާއާ ބޯނީގެ ދަރިފުޅު އަރުޖުންއާ ދެމެދު މިހާރު ގާތް ގުޅުމެއް އޮންނާތީ އެވެ.
އެ ދެ މީހުން ލޯބީގެ ގޮތުން ގުޅިގެން އުޅޭކަން އަމިއްލަ އަށް ޔަގީންކޮށް ނުދިން ނަމަވެސް އަރުޖުން އާއި މަލައިކާގެ އެންމެ ގާތް މީހުންގެ ތެރޭގައި ހިމެނޭ ކަރަން ޖޯހަރު ވަނީ އެ ދެ ތަރިން މިހާރު ހިތާވެގެން އުޅޭކަން ކަށަވަރު ކޮށްދީފަ އެވެ.
އިންޑިއާގެ މަޝްހޫރު ކްރިކެޓް ތަރިން ކަމަށްވާ ހާޑިކް ޕާންޑިއާ އާއި ކޭއެލް ރާހުލް، ކަރަންގެ ޗެޓް ޝޯ "ކޮފީ ވިތު ކަރަން" ގައި ބައިވެރިވި އެޕިސޯޑްގައި ކަރަން ވަނީ އަރުޖުން އާއި މަލައިކާ ރައްޓެހިވެގެން އުޅޭކަން ޔަގީންކޮށް ދީފަ އެވެ. އަދި އަރުޖުންގެ ބޮޑުބޭބެ އަނިލް ކަޕޫރު ވެސް އެ ދެ މީހުންގެ ގުޅުމަށް އާއިލާ އިން ވެސް ރުހޭ ކަމަށް ދޭހަވާ ގޮތަކަށް ދާދި ފަހުން ވާހަކަ ދައްކާފައިވެ އެވެ.
މީޑިއާތަކުން ބުނީ އަރުޖުން އާއި މަލަކައިކާގެ ކައިވެނީގެ ވާހަކަ ވެސް މިހާރު ވަރަށް ގަދައަށް މީޑިއާތަކުގައި ދެކެވެމުންދާތީ، ސަލްމާން އެކަމާ ހިތްހަމަނުޖެހިގެން އަރުޖުންއާ ވެސް ގުޅުން ކަނޑާލައި ބޯނީއާ ވެސް ރުޅި މޫނު ހަދައިފައިވާ ކަމަށެވެ. އަދި ސަލްމާންގެ އާއިލާ އިން ބާއްވާ އެއްވެސް ހަފުލާއަކަށް އެ ދެ މީހުންނަށް ދައުވަތު ނުދޭން ސަލްމާން އަންގާފައިވާ ކަމަށްވެ އެވެ.
އަނެއްކޮޅުން ސަލްމާންގެ ކުރީގެ ފަހަރިއަކާ އަރުޖުން ލޯބީގެ ގުޅުމެއް ބާއްވަމުން އަންނަ އިރު، އޭނާ ވަނީ ސަލްމާންގެ ހަގު ކޮއްކޮ އަރްޕިތާ ހާނަށް ވެސް ކުރިން ބޭވަފާތެރިވެފަ އެވެ. އެކްޓަރު އަޔޫޝް ޝަރުމާއާ ކައިވެނި ކުރުމުގެ ކުރިން އެންމެ ޒުވާން އުމުރުގައި އަރްޕިތާ އާއި އަރުޖުން ވަނީ ރައްޓެހިވެގެން ގިނަ ދުވަސްތަކެއް ވަންދެން އުޅެފަ އެވެ.
އަރުޖުން މަލައިކާ އަންނަ އެޕްރީލް މަހު ކައިވެނި ކުރަން ތައްޔާރުވަމުން އަންނަ ކަމަށް މީޑިއާތަކުން ބުނަމުން އަންނަ އިރު، އެ ގުޅުމާ ދޭތެރޭ ބޯނީ އެހާ ހިތްހަމަނުޖެހޭ ކަމަށްވެ އެވެ.
ފިލްމު ކުޅެން ފެށުމުގެ ކުރިން ވަރަށް ފަލަކޮށް ހުރި އަރުޖުން އަށް ހިކެން ހިތްވަރުދީ އެކްޓަރަކަށް ވާން އެންމެ ބޮޑަށް ހިތްވަރު ދިން މީހަކީ ސަލްމާނެވެ. އޭނާއަކީ އަރުޖުންގެ ބައްޕަ ބޯނީގެ ވަރަށް ޒަމާންވީ ގާތް އެކުވެރިއެކެވެ. އެގޮތުން ސަލްމާން ކުޅުނު "ނޯ އެންޓްރީ" އާއި "ވޯންޓެޑް" ފަދަ ފިލްމުތަކަކީ ބޯނީ ޕްރޮޑިއުސް ކުރި ފިލްމުތަކެވެ.
ނަމަވެސް މިހާރު ކަންތައްތައް ދާ ގޮތުން ދެން ދުވަހަކު ވެސް ބޯނީގެ ފިލްމެއްގައި ސަލްމާން މަސައްކަތެއް ކުރާނެ ކަމަށް ނުބެލެވޭ ކަމަށް މީޑިއާތަކުން ދަނީ ބުނަމުންނެވެ.
ސަލްމާނަކީ އޭނާ އެއްވެސް މީހަކާ ރުޅި ހަދާލައިފި ނަމަ، އަލުން ސުލްހަވާނެ މީހެއް ނޫނެވެ. އޭގެ އެންމެ ބޮޑު އެއް ހެއްކަކީ ކުރީގެ ލޯބިވެރިޔާ އައިޝްވާރިޔާ ރާއީގެ މައްސަލާގައި އެކްޓަރު ވިވެކް އޮބެރޯއީ އުފެދުނު ހާޖާނުގަނޑެވެ.