ސަންދީޕް ވަންގާގެ އާ ފިލްމު ރަންބީރް ކަޕޫރަށް

އަހުމަދު އަދްޝަން، މިހާރު

13 ސެޕްޓެމްބަރ 2019 - 08:21

ދާދި ފަހުން ރިލީޒްކޮށް، ބެލުންތެރިންގެ ބޮޑު ތަރުހީބެއް ހޯދި ފިލްމު "ކަބީރު ސިންގް" ގެ ޑައިރެކްޓަރު ސަންދީޕް ރެޑީ ވަންގާ ދެން ހަދާ ފިލްމުގެ ބަތަލުގެ ރޯލުން ފެނުމުގެ ފުރުސަތު ބޮޑީ ރަންބީރު ކަޕޫރް ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނިގޮތުގައި މި ފަހަރު ވެސް ސަންދީޕް ފިލްމު ހަދާނީ ބުޝަން ކުމާރުގެ ޓީ ސީރީޒާ ގުޅިގެންނެވެ. އަދި އޭނާގެ އާ ފިލްމަކީ ކްރައިމް ޑްރާމާއެއް ކަމަށާއި ވަރަށް އަވަހަށް ފިލްމު އިއުލާންކުރަން ތައްޔާރުވަމުން އަންނަ ކަމަށް މީޑިއާތަކުން ބުންޏެވެ.

ޝާހިދު ކަޕޫރާއި ކިއާރާ އަދުވާނީ ލީޑް ރޯލް ކުޅުނު "ކަބީރު ސިންގް" އަކީ ސަންދީޕްގެ އަލަތު ހިންދީ ޑައިރެކްޝަނެވެ. އަދި އެ ފިލްމުން އޭނާއަކީ ވަރަށް ކުޅަދާނަ އަދި ކުރިމަގު ވަރަށް އުޖާލާ ޑައިރެކްޓަރެއްކަން ސާބިތުކޮށް ދީފައިވާ ކްރިޓިކުން ބުނެފައިވެ އެވެ. އެހެންވެ ބޮލީވުޑްގެ އޭ ލިސްޓް ތަރިންގެ ވިޝް ލިސްޓްގައި ވެސް ސަންދީޕްގެ ނަން މިހާރު ހިމެނެ އެވެ.

"ކަބީރު ސިންގް" އަކީ އޭނާ 2017 ގައި ގެނެސްދިން ތެލެގޫ ފިލްމު "އަރުޖުން ރެޑީ" ގެ ރިމޭކެކެވެ.

މީޑިއާތަކުން ބުނީ ސަންދީޕްގެ އިތުރުން ބުޝަން ވެސް ހުރީ އާ ފިލްމަށް ރަންބީރު ގެންނަން ބޭނުންވެފައި ކަމަށެވެ.

އޭނާ މި ވަގުތު އަންނަނީ ޔާޝްރާޖް ފިލްމްސް (ވައިއާރްއެފް) އިން އަންނަ އަހަރުގެ ޖުލައިގައި ގެނެސްދޭ "ޝަމްޝޭރާ" ގެ މަސައްކަތް ކުރަމުންނެވެ.

މިދިޔަ އަހަރު "ސަންޖޫ" އިން ފެނިގެން ދިޔަ ރަންބީރުގެ ކުރިއަށް ހުރި ފިލްމުތަކުގެ ތެރޭގައި "ބުރައްމަސްތުރާ" އާއި ލަވް ރަންޖަން ޑައިރެކްޓްކުރާ އަދި ނަން އިއުލާންނުމުރާ ފިލްމެއް ހިމެނެ އެވެ.