ސުޕަހީރޯ ޓްރިލޮޖީއެއްގެ ގޮތުގައި "ނާގިން"

އިންސާނުންގެ ކިބައިން ބަދަލުހިފަން އަންނަ ހަރުފަ އަށް ބަދަލުވާ އަންހެނުންގެ ވާހަކަ އަކީ އިންޑިއާގައި އަބަދު ވެސް ވަރަށް ހިނގާ ވާހަކައެކެވެ. އެކްތާ ކަޕޫރް ކަލާޒް ޗެނަލުން ގެނެސްދޭ "ނާގިން" ސިލްސިލާ އަކީ ވެސް ބެލުންތެރިންގެ މެދުގައި ވަރަށް މަގުބޫލު މީގެ ސިލްސިލާއެކެވެ.

އޭގެ ހަތަރު ވަނަ ސީޒަން ދައްކަން ތައްޔާރުވަމުން އަންނަ އިރު، މިހާރު އަނެއްކާ ވެސް މިއޮތީ ހަރުފައިންގެ ވާހަކަ ކިޔައިދޭ ފިލްމުތަކެއްގެ ވާހަކަ އެވެ. އެންމެ ފިލްމެއް ވެސް ނޫނެވެ. ތިން ބަޔަކަށް ގެނެސްދޭ ޓްރިލޮޖީއެކެވެ.

"ނާގިން" ގެ ނަން ދީފައިވާ އަދި ސުޕަހީރޯ ފިލްމުތަކެއްގެ ގޮތުގައި ގެނެސްދޭން ނިންމާފައިވާ މި ފިލްމުގެ ޕްރޮޑިއުސަރަކީ އެކްތާއާ ގުޅިގެން މިދިޔަ އަހަރު "ވީރޭ ދީ ވެޑިން" ގެނެސްދިން ޕްރޮޑިއުސަރު/އެކްޓަރު ނިކިލް ދިވެދީ އެވެ.

ބޮލީވުޑް ހަންގާމާ އިން ބުނިގޮތުގައި އޭނާ މިހާރު އަންނަނީ ސްކްރީންރައިޓަރުންތަކަކާ އެކު "ނާގިން" ގެ ސްކްރިޕްޓްގެ މަސައްކަތްކުރަމުންނެވެ. ނަމަވެސް މި ޓްރިލޮޖީއާ ބެހޭ އިތުރު އެއްވެސް ތަފުސީލެއް އަދި ހާމައެއް ނުކުރެ އެވެ.

ނިކިލް ޕްރޮޑިއުސަރެއްގެ ގޮތުގައި ހިއްސާވާ ފިލްމަކަށް ދެން އެންމެ އަވަހަށް ސިނަމާތަކަށް އަންނާނީ އަންނަ މަހުގެ 20 ގައި ރިލީޒްކުރާ ސަލްމާން ޚާންގެ "ދަބަންގް 3" އެވެ.

ދާދި ފަހުން މީޑިއާތަކުން ރިޕޯޓްކޮށްފައިވާ ގޮތުގައި ޑައިރެކްޓަރު/ޕްރޮޑިއުސަރު އަނޫރާގް ކެޝަޕާ ގުޅިގެން ނިކިލް ވަނީ ހޮލީވުޑްގެ ފިލްމު "ކިލް ބިލް" ގެ ހިންދީ ރިމެކެއް ވެސް ހަދަން ނިންމައިފަ އެވެ. އަދި އެ ފިލްމުގެ ރޯލެއް ޝާހްރުކް ޚާނަށް ވެސް ހުށަހަޅާފައިވާ ކަމަށްވެ އެވެ.

ބޮލީވުޑްގައި ހަރުފައިންގެ ވާހަކަ ކިޔައިދިން ފިލްމުތަކުގެ ތެރެއިން ސްރީދޭވީގެ ނާގިނާ (1986) އާއި އޭގެ ދެވަނަ ބައި ނިގާހޭ (1989) ގެ އިތުރުން ޖީތެންދުރާ އާއި ރީނާ ރޯއިގެ ނާގިން (1976) އަކީ ބެލުންތެރިންގެ މެދުގައި ވަރަށް މަގުބޫލުވި ފިލްމުތަކެވެ.