ޓީވީ ބަތަލާ ކްރިސްޓަލް ޑި ސޫޒާ އަށް ބޮލީވުޑްގެ ބޮޑު ފިލްމެއް

އަހުމަދު އަދްޝަން، މިހާރު

25 ނޮވެމްބަރ 2019 - 07:44

އިންޑިއާގެ މަޝްހޫރު ޓީވީ ބަތަލާ ކްރިސްޓަލް ޑި ސޫޒާ ވެސް ބޮލީވުޑްގެ ބޮޑު ފިލްމަކަށް ސޮއިކޮށްފި އެވެ.

ސްޓާ ޕްލަސް އިން ގެނެސްދިން މަގުބޫލު ސިލްސިލާ "އޭކް ހަޒާރޯ މޭ މޭރޭ ބެހެނާ ހޭ" އިން މަޝްހޫރުވި 29 އަހަރުގެ ބަތަލާ ސޮއިކޮށްފައި ވަނީ އަމީތާބް ބައްޗަން އާއި އިމްރާން ހާޝިމީ މުހިއްމު ރޯލްތައް ކުޅޭ "ޗެހެރޭ" އަށެވެ.

ކްރިސްޓަލް އަށް މި ފިލްމުގެ މުހިއްމު ރޯލެއް ކުޅެން ލިބުނީ، އެ ރޯލް ކުޅެން ކުރިން ލިބުނު ބަތަލާ ކްރިތީ ކަރްބަންދާ ފިލްމު ދޫކޮށްލުމާ ގުޅިގެންނެވެ. ނަމަވެސް އޭނާ މި ފުރުސަތު ދޫކޮށްލި ސަބަބެއް ހާމައެއްނުކުރެ އެވެ. މިކަމާ ބެހޭ ގޮތުން ބައެއް މީޑިއާތަކުން ބުނީ މިދިޔަ ހުކުރު ދުވަހު ރިލީޒްކުރި "ޕާގަލްޕަންތީ" ގެ ކާސްޓްގައި ވެސް ހިމެނޭ ކްރިތީ "ޗެހެރޭ" އިން ވަކިކުރީ ކަމަށާއި އެއީ އޭނާގެ ޕްރޮފެޝަނަލްކަން ކުޑަވެގެން އެޅި ފިޔަވަޅެއް ކަމަށެވެ.

In the light of recent media reports, we wish to clarify that @kriti_official & @apmpictures have mutually agreed to part ways on a cordial & professional note. We wish her success in all her future endeavours!
— Anand Pandit Motion Pictures (@apmpictures) November 19, 2019

ނަމަވެސް މި ވާހަކަތަކާ ގުޅިގެން އެ ފިލްމުގެ ޕްރޮޑިއުސަރު އަޝޯކް ޕަންޑިތުގެ ފިލްމު ކުންފުނިން ކުރި ޓްވީޓެއްގައި ބުނީ ކްރިތީ ފިލްމު ވަކިވީ ދެ ފަރާތުން ވާހަކަ ދައްކައި އެއްބަސްވެގެން ކަމަށެވެ.

އޭނާ "ޗެހެރޭ" ގެ ކާސްޓުން އުނިވުމާ އެކު، އެ ކްރިތީ އެއްބަސްވި ރޯލަށް މިހާރު ބޮލީވުޑްގައި މަސައްކަތްކުރާ ޓީވީ އެހެން ދެ ބަތަލާއަކަށް ހުށަހެޅި ކަމަށް ވެސް ޚަބަރުތައް ފެތުރިފައިވެ އެވެ. އެއީ މޯނީ ރޯއީ އާއި އަންކިތާ ލޯކަންދޭ އެވެ.

ނަމަވެސް "ޗެހެރޭ" ގެ ކާސްޓާ ކްރިސްޓަލް ގުޅުނުކަން އޭނާ ވަނީ އިންސްޓަގްރާމްގައި ކަށަވަރުކޮށް ދީފަ އެވެ. އެގޮތުން މިހާރު ނިއު ދިއްލީގައި ކުރިއަށްދާ ޝޫޓިންގެ ތެރެއިން ފިލްމުގެ ކްލިޕްބޯޑް ހިފައިގެން ނަގާފައިވާ ފޮޓޯއެއް އިންސްޓަގްރާމް ސްޓޯރީގައި ހިއްސާކޮށް އޭނާ ބުނީ ހުވަފެނީ ޓީމަކާ އެކު އާ ދަތުރެއް ފެށުނީ ކަމަށާއި އެންމެންގެ ހެޔޮދުއާ ބޭނުންވާ ކަމަށެވެ.

ކްރިސްޓަލް ކުރިން ވެސް ވަނީ ފިލްމެއްގެ ކުޑަކުޑަ ހާއްސަ ފެނިލުމެއް ކުޅެފަ އެވެ. އެއީ 2008 ގެ "ސީ ކޮމްޕެނީ" އެވެ.

އޭނާ ކުޅެފައިވާ ސިލްސިލާތަކުގެ ތެރޭގައި "ބެލަން ވާލީ ބަހޫ" އާއި "އޭކް ނައީ ޕެހެޗާން" އަދި "ކިސް ދޭޝް މޭ ހޭ މޭރާ ދިލް" ހިމެނެ އެވެ. ކްރިސްޓަލް އެންމެ ފަހުން ފެނިފައި ވަނީ އެކްތާ ކަޕޫރްގެ އޯލްޓް ބަލާޖީން ދާދި ފަހުން ސްޓްރީމްކުރި ވެބް ސީރީޒް "ފިތުރަތު" އިންނެވެ. އޭގައި ކްރިސްޓަލަކާ އެކު ބަތަލުގެ ރޯލް ކުޅުނި ބޮލީވުޑްގެ ޒުވާން އެކްޓަރު އަދިތިޔާ ސީލެވެ.

ރޫމީ ޖެފްރީ ޑައިރެކްޓްކޮށް އަންނަ އަހަރުގެ އެޕްރީލް 24 ގައި ގެނެސްދޭ މިސްޓްރީ ތުރިލާ "ޗެހެރޭ" ގެ ކާސްޓްގައި ރިއާ ޗަކްރަބަތީ، އައްނޫ ކަޕޫރް އަދި ސިދާންތު ކަޕޫރް ހިމެނެ އެވެ.