ޑެނިއަލް ކްރެއިގްގެ "ނައިވްސް އައުޓް" ގެ ދެވަނަ ބައެއް

މަޝްހޫރު އެކްޓަރު ޑެނިއަލް ކްރެއިގް މުހިއްމު ރޯލެއް ކުޅެ، މިދިޔަ އަހަރު ނެރުނު ކާމިޔާބު ފިލްމު "ނައިވްސް އައުޓް" ގެ ސީކްއެލްއެއް ހަދަން ނިންމައިފި އެވެ.

ބެލުންތެރިންނާއި ކްރިޓިކުންގެ މެދުގައި ވެސް ވަރަށް މަގުބޫލު ފިލްމަކަށްވި ފިލްމުގެ ދެވަނަ ބައެއް ހަދާކަން ލަޔަންސްގޭޓުން ކަށަވަރުކޮށް ދީފައި ވަނީ އޭގެ ދެވަނަ ބައެއް ހަދާނެ ކަމަށް ކުރިން ވެސް އަޑުތައް އަރާފައި ވަނިކޮށެވެ. ލަޔަންސްގޭޓްގެ ސީއީއޯ ޖޮން ފެލްތެއިމާ ބުނީ "ނައިވްސް އައުޓް" ގެ ދެވަނަ ބައިގެ ތައްޔާރީތައް މިހާރު ވާން ފަށާފައިވާ ކަމަށެވެ.

މި ފިލްމަކީ ރިއަން ޖޯންސަން ލިޔެ، ޑައިރެކްޓްކުރި މިސްޓްރީ ތުރިލާއެކެވެ. "ނައިވްސް އައުޓް" އިން ޖޮން އަށް މުޅިން އަލަށް 92 ވަނަ އޮސްކާ އެވޯޑްސްގެ އެންމެ މޮޅު އޮރިޖިނަލް ސްކްރީންޕްލޭގެ ނޮމިނޭޝަނެއް ވެސް ލިބުނެވެ.

މި ފިލްމުގެ ކާސްޓުންގެ ތެރޭގައި ޖޭމްސް ބޮންޑްގެ ރޯލް ކުޅޭ ކްރެއިގާ އެކު، ހިމެނެނީ ކްރިސް އިވަންސް، މައިކަލް ޝެނަން، ޑޮން ޖޯންސަން، ކެތެރީން ލޯންގްފޯޑް، ޖެމީ ލީ ކާޓިސް، އަނާ ޑި އާމަސް އަދި ކްރިސްޓޯފާ ޕްލަމާ އެވެ.

މުއްސަނދި އަދި އެހާމެ މަޝްހޫރު ލިޔުންތެރިއެއްގެ 85 ވަނަ އުފަން ދުވަސް ފާހަގަކުރަން ބަޔަކަށް ދައުވަތު ދީގެން ބާއްވާ ހަފުލާއަކަށް ފަހު އޭނާ ކުއްލި ގޮތަކަށް މަރުވުމުން ހިންގާ ތަހުގީގުގެ ތެރެއިން ފަޅާއަރާ ހާދިސާތަކެއް ދައްކުވައިދޭ "ނައިވްސް އައުޓް" އަކީ އެންމެ 40 މިލިއަން ޑޮލަރުގެ ބަޖެޓަކުން ހަދާފައިވާ ފިލްމެކެވެ. ނޮވެމްބަރު މަހުގެ 27 ގައި ސިނަމާތަކަށް ގެނައި މި ފިލްމަށް 295.4 މިލިއަން ޑޮލަރުގެ އާމްދަނީއެއް ލިބިފައިވެ އެވެ.

"ނައިވްސް އައުޓް" ގެ ދެވަނަ ބައެއް ހަދަން ނިންމިކަން އިއުލާންކުރި ނަމަވެސް، ފިލްމު ބެލުންތެރިންނަށް ގެނެސްދޭނެ އިރެއް އަދި ނޭނގެ އެވެ.