ފޮކްސް ސްޓާ އިންޑިއާ އިން ކަރަން ޖޯހަރާ ވިޔަފާރީގެ ގުޅުން ކަނޑާލަނީ؟

އިންޑިއާގެ ފިލްމު ކުންފުނި ފޮކްސް ސްޓާ އިންޑިއާ އިން ޑައިރެކްޓަރު/ޕްރޮޑިއުސަރު ކަރަން ޖޯހަރާ އެކު ކުރިއަށް އޮތް ތަނުގައި މަސައްކަތް ނުކުރަން ނިންމައި އޭނާގެ އާ ފިލްމު "ތަޚުތު" ގައި ވެސް ހިއްސާނުވާން ނިންމާފައިވާ ކަމަށް ރިޕޯޓްތައް ބުނެފި އެވެ.

ނަމަވެސް މިކަމާ ބެހޭ ގޮތުން ކަރަން އާއި ފޮކްސް ސްޓާ އިން އަދި އެއްވެސް ވާހަކައެއް ނުދައްކަ އެވެ. އަދި މިފަދަ ނިންމުމެއް ނިންމި ސަބަބެއް ވެސް ސާފެއް ނޫނެވެ.

ބޮލީވުޑް ހަންގާމާ އިން ބުނި ގޮތުގައި މީގެ 10 އަހަރު ކުރިން ފެށިގެން ކަރަންގެ ފިލްމު ކުންފުނި ދަރުމާ ޕްރޮޑަކްޝަނުން ހަދާ ފިލްމުތަކުގައި މާލީ ގޮތުން ހިއްސާވާ ފޮކްސް ސްޓާ އިން އޭނާއާ އޮތް ވިޔަފާރީގެ އެއްބަސްވުން އުވައިލަން ނިންމީ އެކި ސަބުތަކާ ހެދި "ތަޚުތު" ގެ ޝޫޓިން ނުފެށި ލަސްވުމާއި އެ ފިލްމުގެ ބަޖެޓާ ދޭތެރޭ ހުރި ކަންބޮޑިވުންތަކާ ގުޅިގެންނެވެ. ރިޕޯޓްތައް ބުނާގޮތުން އޭ-ލިސްޓް ބޮޑު ކާސްޓަކާ އެކު ހަދާ ތާރީހީ ފިލްމުގެ ބަޖެޓް އެންމެ ދަށްވެގެން ވެސް 200 ކްރޯޑް ރުޕީސް (28 މިލިއަން ޑޮލަރު) އަށް އަރާނެ އެވެ.

އަންނަ އަހަރުގެ ޑިސެމްބަރުގައި ގެނެސްދޭން ހަމަޖެހިފައިވާ "ތަޚުތު" އަކީ އިންޑިއާގެ އިތުރުން ޔޫރަޕްގެ ބައެއް ތަންތަނުގައި ވެސް ޝޫޓްކުރަން ހަމަޖެހިފައިވާ ފިލްމެކެވެ.

މި މަހުގެ ތެރޭގައި އެ ފިލްމުގެ ޝޫޓިން ފަށަން ނިންމާފައި ވަނިކޮށް ކޮރޯނާވައިރަހާ ގުޅިގެން ދަރުމާގެ ހުރިހާ ފިލްމުތަކެއްގެ މަސައްކަތްތައް ވަނީ ވަގުތީ ގޮތުން މެދުކަނޑާލައިފަ އެވެ.

ފޮކްސް ސްޓާ އިންޑިއާގެ ސީއީއޯ ވިޖޭ ސިންގްއާ ހަވާލާދީ ހަންގާމާ އިން ބުނިގޮތުގައި ކަރަންއާ އެކު ހަދާފައި އޮތް އެއްބަސްވުން ރަަސްމީކޮށް އުވައިލުމާ ދޭތެރޭ މިހާރު އަންނަނީ ސީރިއަސްކޮށް މަޝްވަރާތަކެއް ކުރެވެމުންނެވެ. އަދި ހުރިހާ ކަމެއް ނިމުމުން އެކަން އިއުލާންކުރާނެ ކަމަށްވެ އެވެ.

މިހާރު ބޮލީވުޑްގެ އެންމެ ކާމިޔާބު ޕްރޮޑަކްޝަން ހައުސްތަކުގެ އެންމެ ކުރީގައި ގުނައިލެވޭ ދަރުމާ އަކީ އެހެން ކުންފުނިތަކާ ހިއްސާވެގެން ފިލްމުތައް ހެދުން އިތުރު ސްޓޫޑިއޯއެކެވެ. އޭގެ ތެރޭގައި ސާޖިދު ނަދިއަދުވާލާގެ ނަދިއަދުވާލާ ގްރޭންޑް ސަން އާއި ޒީ ސްޓޫޑިއޯސް ފާހަގަކޮށްލެވެ އެވެ.