ފިލްމީ ތަރިއަކަށްވުމުގެ އުންމީދުގައި ފުރާވަރުގައި އާއިލާ ދޫކޮށް މުމްބާއީ ގޮސް ދުވަސްތަކެއް ވަންދެން ގަނަތެޅުނު އިރު، މަސްތުވާތަކެތީގެ ތެރެއަށް ވަދެވި، އަހަރުތަކެއް ވަންދެން އެޑިކްޝަނުގައި އުޅެން ޖެހުނު ކަމަށް ބޮލީވުޑްގެ މިހާރު އެންމެ ކާމިޔާބު ބަތަލާއިންގެ ތެރޭގައި ހިމެނޭ ކަންގަނާ ރަނާވަތު ބުނެފި އެވެ.
ނެޝަނަލް އެވޯޑް ތިން ފަހަރަށް ހޯދުމުގެ އިިތުރުން އިންޑިއާ ސަރުކާރުން ދޭ މަތީ ޝަރަފު ޕަދުމާ ޝްރީ ވެސް ހާސިލުކޮށްފައިވާ އަދި އެންމެ ބޮޑު އަގު ލިބޭ ބަތަލާއިންގެ ތެރޭގައި ވެސް ހިމެނޭ 33 އަހަރުގެ ބަތަލާ ބުނީ އޭނާ ފިލްމު ކުޅެން ފެށި އިރު ވެސް މަސްތުވާތަކެތި ބޭނުންކުރަމުން ދިޔަ ކަމަށެވެ. އަދި އެކަމާ ދުރުވެވުނީ ދެ އަހަރު ފަހުން ކަމަށް ބުންޏެވެ.
ކަންގަނާ ބޮލީވުޑަށް ނުކުތީ އުމުރުން 17 އަހަރުގައި 2006ގެ ފިލްމު "ގޭންގްސްޓާ" އިންނެވެ. އަދި އޭނާ އަށް ފުރަތަމަ ނެޝަނަލް އެވޯޑް 2008 ގެ ފިލްމު "ފެޝަން" އިން ވެސް ލިބުނީ މަސްތުވާތަކެއްޗާ ހެދި ކެރިއަރު ހަލާކުވާ މޮޑެލްއެއްގެ ރޯލް ކުޅެގެންނެވެ.
"އަހަރެން އާއިލާއާ ދެކޮޅަށް ފިލައިގެން މުމްބާއީ އަށް އައި އިރު އުމުރުން ވާނީ ފަނަރަ ވަރަކަށް އަހަރު. ފިލްމަކުން ފުރުސަތު ލިބޭތޯ އާދޭސްކުރަމުން ވަރަށް ގިނަ މީހުންގެ ގާތަށް ދުވިން. އެކަންތައްގަނޑުގެ ތެރޭގައި އެކި ކަހަލަ މީހުންނާ ދިމާވެވި ނުބައި ގޯޅި އެޅުނީ. ފުރާވަރުގައި އަހަރެންގެ ހަޔާތަކީ ބޮޑު ހާޖާނުގަނޑެއް،" އޭނާ ބުންޏެވެ. "އެކަމަކު ފިލްމުތަކުން ފުރުސަތު ލިބެން ފެށި ހިސާބުން އަހަރެން ވަރަށް ބޮޑަށް ނަފުސު އިސްލާހުކުރަން މަސައްކަތްކުރިން."
ކަންގަނާ ކިޔައިދިން ގޮތުގައި ޑްރަގްގެ ވަބާއިން ނުކުމެވި، އަމިއްލަ ނަފުސު އިސްލާހުކުރަން މަގުފަހިކޮށް ދިނީ ރަނގަޅު އެކުވެރިންތަތަކެކެވެ. އެގޮތުން އެކުވެރިން ދިން ނަސޭހަތަކަށް ރޫހާނީ ފަރުވާ ހޯދަން ފެށި ކަމަށާއި އެކަމުގައި އެންމެ ބޮޑަށް އެހީވެ ދިނީ ސްވާމީ ވިވެކަނަންދު ކިޔާ މީހަކު ކަމަށް ބުންޏެވެ.
"އޭނާ އަކީ ހަގީގަތުގައި އަހަރެން ހަމަ މަގަށް ގެނެސްދިނުމުގައި އެންމެ އިސް ރޯލެއް އަދާކުރި ގުރޫ އަކީ. އޭނަގެ ފަރާތުން ޔޯގާގެ އިތުރުން ސްޕިރިޗްއަލީޓީގެ ވަރަށް ގިނަ ކަންކަމުގެ ތެރެއަށް އަހަންނަށް ދެވުނު." ކަންގަނާ ބުންޏެވެ. "އަހަރެން ބުނާނީ އެ ގުރީގެ އެހީ އެހާ ބޮޑަށް ނުލިބުނު ނަމަ އަހަރެން ސަލާމަތްނުވީހޭ. ހަގީގަތުގައި ނަފުސު އިސްލާހުކުރަން އެންމެ ބޮޑަށް ހިތްވަރެއް ލިބުނީ ވެސް އޭނަގެ ފަރާތުން."
ކަންގަނާ ބުނީ މަގު އޮޅުނީ ގޯސް ބަޔަކާ ޖެހިގެން ކަމަށާއި ބޮލީވުޑަށް ނުކުތް ކުރީކޮޅު ވެސް އެފަދަ އެތައް ބަޔަކާ ދިމާވި ކަމަށެވެ. އަދި އޭނާގެ ފަރާތުން ނާޖާއީޒު ފައިދާ ނަގަން އެތައް ބަޔަކު މަސައްކަތްކުރި ކަމަށް ބުންޏެވެ.
"އަހަންނަށް މި ހިސާބަށް އާދެވުމުގެ ސިއްރަކަށް ވާނެ އަޑިގުޑަންތަކާ ކެރިގެން ހިތްވަރާ އެކު ކުރިމަތިލާން އެނގުނުކަން. އަހަންނަކީ އަބަދު ވެސް ކަންކަމުގައި ހިތްވަރު ކުރާ މީހަކަށް. އަޒުމެއް އޮވެގެން މަސައްކަތްްކުރާ ނަމަ ކާމިޔާބީއާ ހަމައަށް ވާސިލުވެވޭނެ." ބޮލީވުޑްގެ އެންމެ ހުނަރުވެރި އެއް ބަތަލާ ބުންޏެވެ.
އިންޑިއާގެ ހިމާޗަލް ޕްރަދޭޝް އަށް ނިސްބަތްވާ ކަންގަނާ އަކީ މިހާރު ބޮލީވުޑްގެ އެންމެ ނުފޫޒު ގަދަ އެއް ބަތަލާ އެވެ. އޭނާ އަކީ ބަތަލާއެއްގެ އިތުރުން ޑައިރެކްޓަރެއް އަދި ޕްރޮޑިއުސަރެއް ވެސް މެ އެވެ. ދާދި ފަހުން ކަންގަނާގެ އަމިއްލަ ޕްރޮޑަކްޝަން ހައުސް މަނިކަރްނިކާގެ އޮފީސް ވެސް މުމްބާއީގައި ހުޅުވާފައިވާ އިރު، ހިމާޗަލްގައި އޭނާގެ ގަނޑުވަރެއް ކަހަލަ އަގުބޮޑު ގެއެއް ވެސް ހުރެ އެވެ.
"ކްއީން" އާއި "ތަނޫ ވެޑްސް މަނޫ" އަދި "މަނިކަރްނިކާ" ފަދަ ކާމިޔާބު އެތައް ފިލްމެއް މިހާތަނަށް ކުޅުނު ބަތަލާގެ އެންމެ ފަހުގެ ފިލްމަކީ ޖެނުއަރީގައި ގެނެސްދިން "ޕަންގާ" އެވެ. ކަންގަނާގެ ކުރިއަށް އޮތް ފިލްމަކީ ޓަމިލް ނާޑޫ ސްޓޭޓްގެ ކުރީގެ ޗީފް މިނިސްޓަރު ޖަޔަލަލީތާގެ ރޯލް ކުޅޭ "ތަލައިވީ" އެވެ.
އެ ފިލްމު ސިނަމާތަކަށް ގެންނަން ނިންމާފައި ވަނީ ޖޫން 26 ގަ އެވެ.