"މަރްޔަމް" ގެ ޝޫޓިން ނިންމާލައިފި

ބަތަލާ މަރިޔަމް މަޖުދާ (މަޖޫ) ސިޔާސީ ރޯލެއް ކުޅޭ ފިލްމު "މަރްޔަމް" ގެ ޝޫޓިން ނިންމާލައިފި އެވެ.

މަޝްހޫރު ކެމެރާމަން އިބްރާހީމް ވިޝާން (ކަނޑި) ޑައިރެކްޓްކުރާ ފިލްމުގެ ޝޫޓިން މ. މުލަކުގައި ނިންމައިލުމަށް ފަހު، ކާސްޓާއި ކްރޫ ވަނީ އާދީއްތަ ދުވަހު މާލެ ވެސް އައިސްފަ އެވެ. އެ ރަށަށް ފިލްމުގެ ޓީމް ފުރައިގެން ދިޔައީ މާލޭގައި ނަގަން ޖެހޭ މަންޒަރުތައް ނިންމައިލުމަށް ފަހު، މި މަހުގެ ކުރީކޮޅު އެވެ.

"މަރިޔަމް" އަކީ އަހުމަދު ޒަރީރުގެ ސްކްރީންޕްލޭއަކަށް ހަދާ ޕޮލިޓިޓަލް ތުރިލާއެކެވެ. ސިޔާސީ ކަންތައްގަނޑެއް ދައްކުވައިދޭ ފިލްމުގެ ޓެގް ލައިނަކީ "ބަދަލެއްގެ ފެށުން" އެވެ. އަދި "މަރްޔަމް" ގެ ޓައިޓްލް ރޯލުން ފެނިގެންދާނީ ޑާކް ރެއިން އެންޓަޓައިންމަންޓުން މި އަހަރު ގެނެސްދޭން ހަމަޖެހިފައިވާ "ނޮވެމްބާ" ގެ ބަތަލާ މަޖޫ އެވެ.

"މަރްޔަމް" ގެ ކާސްޓުންގެ ތެރޭގައި އަހުމަދު ސައީދާއި އަލީ އާޒިމް (ދޮންއައްޔަ) އާއި އަލީ ޝަޒްލީމާއި ނިޝާ އާއި ހަސަން މަނިކު (ރޯނު) ހިމެނެ އެވެ.

"މަރްޔަމް" ބެލުންތެރިންނަށް ގެނެސްދޭން އަމާޒު ހިފާފައި ވަނީ މި އަހަރުގެ އޮގަސްޓް ހިސާބުގަ އެވެ. ޒަރީރުގެ އެއް ކާފު ޕްރޮޑަކްޝަނުން ގެނެސްދޭ "މަރްޔަމް" ގެ ޕޯސްޓް-ޕްރޮޑަކްޝަން މަސައްކަތްތައް ކުރާނީ އޯކޭޒް އިންކުންނެވެ.

މި ފިލްމަކީ ކަނޑި ޑައިރެކްޓްކުރާ ދެވަނަ ފިލްމެވެ. މިހާތަނަށް އެތައް ފިލްމެއް ކެމެރާކޮށް، އެވޯޑް ވެސް ހޯދާފައިވާ ކަނޑީގެ އަލަތު ޑައިރެކްޝަނަކީ 2016 ގެ "ވީ ބޭވަފާ" އެވެ.