ކަނޑީގެ "މަރްޔަމް" އަކީ މަޖޫ

މަޝްހޫރު ކެމެރާމަން އިބްރާހީމް ވިޝާން (ކަނޑި) އަނެއްކާ ވެސް ފިލްމެއް ޑައިރެކްޓްކުރުމުގެ މަސައްކަތް ފަށައިފި އެވެ.

ދެހާސް ސޯޅަ ވަނަ އަހަރު "ވީ ބޭވަފާ" ގެނެސްދިން ކަނޑީގެ އާ ފިލްމަކީ އަހުމަދު ޒަރީރުގެ ސްކްރީންޕްލޭއަކަށް ހަދާ ޕޮލިޓިކަލް ތުރިލާ "މަރްޔަމް" އެވެ. މީގެ މައިގަނޑު ކާސްޓުންގެ ތެރޭގައި ހިމެނެނީ މަރިޔަމް މަޖުދާ (މަޖޫ) އާއި އަހުމަދު ސައީދާއި އަލީ އާޒިމް (ދޮންއައްޔަ) އާއި އަލީ ޝަޒްލީމާއި ނިޝާ އާއި ހަސަން މަނިކު (ރޯނު) އެވެ.

ޓެގް ލައިނަކަށް "ބަދަލެއްގެ ފެށުން" ބޭނުންކުރާ "މަރްޔަމް" އަކީ އާންމުކޮށް ޑާކް ރެއިން އެންޓަޓައިންމަންޓްގެ ފިލްމުތަކުން ފެންނަ މަޖޫ މުޅިން އަލަށް އެހެން ސްޓޫޑިއޯއެއްގެ ފިލްމެއްގެ ލީޑް ރޯލް ކުޅޭ ފުރަތަމަ ފަހަރެވެ. މާލޭގެ ޝޫޓިން މިހާރު އެއްކޮށް ނިންމާލައި، މ. މުލަކުގައި ޝޫޓިން ކުރިއަށްދާ "މަރްޔަމް" ގައި އޭނާ ފެންނާނީ ފިލްމުގެ ޓައިޓްލް ރޯލުންނެވެ.

ޒަރީރުގެ އެއް ކާފު ޕްރޮޑަކްޝަންސް އިން ހަދާ ފިލްމު ސިނަމާ އަށް ގެންނަން އަމާޒު ހިފާފައި ވަނީ މި އަހަރުގެ އޮގަސްޓް މަހުގެ ތެރޭގަ އެވެ.

އޭނާ ބުނީ ފިލްމުގެ ޝޫޓިން މި މަހުގެ ނިޔަލަށް ނިންމައިލެވޭނެ ކަމަށާއި "މަރްޔަމް" ގެ ޕޯސްޓް-ޕްރޮޑަކްޝަން މަސައްކަތްކުރާނީ "ހައްދު" އާއި "ބަވަތި" ފަދަ ކާމިޔާބު ފިލްމުތަކުގެ މަސައްކަތް ވެސް ކުރި އޯކޭޒް އިންކުން ކަމަށެވެ.