ރާޖް މެހެތާގެ ދެވަނަ ފިލްމުގައި ވަރުން ދަވަން އާއި ކިއާރާ އަދްވާނީ

މިދިޔަ އަހަރުގެ އެންމެ ކާމިޔާބު އެއް ފިލްމު ކަމަށްވާ، ކަރަން ޖޯހަރްގެ ދަރުމާ ޕްރޮޑަކްޝަނުން ގެނެސްދިން ފިލްމު "ގުޑް ނިއުޒް" ގެ ޑައިރެކްޓަރު ރާޖް މެހެތާގެ އާ ފިލްމަށް ވަރުން ދަވަން އާއި ކިއާރާ އަދުވާނީ ސޮއިކޮށްފި އެވެ.

ބޮލީވުޑް ހަންގާމާ އިން ބުނި ގޮތުގައި މިދިޔަ އަހަރު ދަރުމާއިން ގެނެސްދިން "ކަލަންކް" ގައި ވަރުންއާ އެކު ލަވައެއް ވެސް ކުޅުނު ކިއާރާ އާއި ވަރުން ރާޖްހެ ފިލްމަށް ސޮއިކުރީ ހުކުރު ދުވަހު ކަރަންގެ އޮފީހުގަ އެވެ. ނަމަވެސް ފިލްމުގެ ނަމާއި ސްޓޯރީ ލައިނަކީ ކޮބައިކަމެއް އަދި ނޭނގެ އެވެ. އެކަމަކު ރާޖް މިހާރު ފިލްމުގެ ސްކްރިޕްޓް ވެސް އެއްކޮށް ނިންމާފައިވާ ކަމަށާއި މި ފިލްމަކީ ވެސް "ގުޑް ނިއުޒް" ގޮތަށް ލައިޓްހާޓެޑް ފިލްމަކަށްވާނެ ކަމަށް ބެލެވޭ ކަމަށް ހަންގާމާ އިން ބުންޏެވެ.

އެ ފިލްމުން ޑައިރެކްޝަނަށް ނުކުތް ރާޖްގެ އާ ފިލްމާ ބެހޭ އެއްވެސް ވާހަކައެއް ރަސްމީކޮށް އަދި ދަރުމާ އިން ހިއްސާއެއްނުކުރެ އެވެ.

ވަރުން އާއި ކިއާރާ އަކީ ބެލުންތެރިން އެކީގައި ސްކްރީނުން ދެކިލަން ވަރަށް ބޮޑަށް ބޭނުންވާ ޖޯޑެކެވެ.

ވަރުންއާ އެކު ކުޅެން މީގެ ކުރިން ކިއާރާ އަށް އެހެން ފިލްމަކުން ވެސް ފުރުސަތު ލިބުނެވެ. އެއީ ކަރަން ޕްރޮޑިއުސްކޮށް، ޝިޝާންކް ކައިތާން ޑައިރެކްޓްކުރަން މި އަހަރުގެ ކުރީކޮޅު އިއުލާންކުރި "މިސްޓަ ލޭލޭ" އެވެ. ނަމަވެސް އަންނަ އަހަރުގެ ޖެނުއަރީ 1 ގައި ސިނަމާތަކަށް ގެންނަން ތާވަލުކުރި އެ ފިލްމު ކިއާރާ އަށް ވަނީ އެހެން ޕްރޮޖެކްޓްތަކެއްގައި ބިޒީވެގެން ދޫކޮށްލަން ޖެހިފަ އެވެ.

އެހެންވެ "މިސްޓަ ލޭލޭ" އިން ވަރުންއާ އެކު ފެންނާނެ ކަމަށް ބެލެވެނީ ޖާންވީ ކަޕޫރާއި ބޫމީ ޕެޑްނޭކަރެވެ. އެ ފިލްމުގެ މަސައްކަތް މި ވަގުތަށް ޖަޑުޖައްސާލާފައިވާކަން ޝިޝާންކް ވަނީ ކަށަވަރުކޮށް ދީފަ އެވެ. އެކަމަކު ސަބަބެއް ހާމައެއްނުކުރެ އެވެ.

ވަރުންގެ ކުރިއަށް އޮތް ފިލްމަކީ ބައްޕަ ޑޭވިޑް ދަވަންގެ "ކޫލީ ނަމްބަރު 1" އެވެ. އޭނާ ސޮއިކޮށްފައިވާ ފިލްމުތަކުގެ ތެރޭގައި ސްރީރާމް ރަގްވަންގެ "އެއްކީސް" ހިމެނެ އެވެ.

ކިއާރާގެ ކުރިއަށް ހުރި ފިލްމުތަކުގެ ތެރޭގައި "ލަކްޝްމީ ބޮމް" އާއި "ޝޭރްޝާހް އާއި "އިންދޫ ކީ ޖަވާނީ" އަދި "ބޫލް ބުލައްޔާ 2" ހިމެނެ އެވެ.