ސައިފަށް އަނެއްކާ ވެސް ވިލަންއެއްގެ ރޯލް

އަހުމަދު އަދްޝަން، މިހާރު

22 އޯގަސްޓް 2020 - 09:24

މި އަހަރުގެ ޖެނުއަރީގައި ރިލީޒްކުރި އަޖޭ ދޭވްގަން ތާރީހީ ހަނގުރާމަ ފިލްމު "ތާނާޖީ: ދި އަންސަންގް ވޮރިއާ" ގައި ނުބައިބައި ރޯލު ކުޅުނު އެކްޓަރު ސައިފް އަލީ ޚާން އެ ފިލްމުގެ ޑައިރެކްޓަރު އޯމް ރައުތުގެ އާ ފިލްމުގެ ވިލަންގެ ރޯލަށް ވެސް ސޮއިކޮށްފި އެވެ.

ޓީ ސީރީޒުން ޕްރޮޑިއުސްކުރާ އެ ފިލްމަކީ "ބާހްބަލީ" އިން ވިދައިލި އެކްޓަރު ޕްރަބާސް ބަތަލުގެ ރޯލް ކުޅޭ ފިލްމެކެވެ. "އަދިޕުރުޝް" އަންގާރަ ދުވަހު ރަސްމީކޮށް އިއުލާންކޮށް އޭގެ ސްޓިލް އާއި މޯޝަން ޕޯސްޓަރު ވެސް ވަނީ ދައްކާލައިފަ އެވެ.

ބޮލީވުޑް ހަންގާމާ އިން ބުނިގޮތުގައި "ތާނާޖީ" ގައި ސައިފް ދެއްކި ހުނަރު ކަމުދިޔަލެއް ބޮޑުކަމުން އޭނާއާ އެކު އަނެއްކާ ވެސް މަސައްކަތްކުރަން އޯމް ބޭނުންވީ އެވެ. އެހެންވެ ޕްރަބާސްގެ ފިލްމުގެ ވިލަންގެ ރޯލް ހުށަހެޅުމުން ސައިފް އެ ރޯލް ގަބޫލުކޮށްފައިވާ ކަމަށް ބުންޏެވެ. އެކަމަކު އެކަން އަދި ރަސްމީކޮށް ފިލްމުގެ ޓީމުން ކަށަވަރުކޮށެއް ނުދެ އެވެ.

MOTION POSTER... Celebrating the victory of good over evil... #Prabhas in and as #Adipurush... #Tanhaji director #OmRaut to direct... In 3D... #Adipurush is #Prabhas' third film with producer #BhushanKumar. #Prabhas22 pic.twitter.com/TS0Riz9BlX
— taran adarsh (@taran_adarsh) August 18, 2020

"އަދިޕުރުޝް" ގެ ޝޫޓިން ފަށާނީ އަންނަ އަހަރު އެވެ. އަދި ސިނަމާތަކަށް ގެންނާނީ 2022 ގަ އެވެ.

THE DREAM TEAM... #Prabhas to star in #Tanhaji director #OmRaut's next film... Titled #Adipurush... In 3D... Will be shot in #Hindi and #Telugu and dubbed in #Tamil, #Malayalam, #Kannada and several international languages... Starts 2021... 2022 release. #Prabhas22 pic.twitter.com/CaPwUhRiBb
— taran adarsh (@taran_adarsh) August 18, 2020

"ތާނާޖީ" ގެ ކުރިން ވެސް ސައިފް ވަނީ ވިލަންއެއްގެ ރޯލް އެހެން ފިލްމެއްގައި ކުޅެގެން އާންމުންގެ ސަމާލުކަން ހޯދައިފަ އެވެ. އެއީ ޑައިރެކްޓަރު ވިޝާލް ބަރަދްވާޖް 2006 ގައި ގެނެސްދިން "އޯމްކާރާ" ގަ އެވެ.

މި މަހުގެ 16 ވަނަ ދުވަހު 50 އަހަރު ފުރުނު ސައިފްގެ ކުރިއަށް ހުރި ފިލްމުތަކުގެ ތެރޭގައި "ބަންޓީ އޯރް ބަބްލީ 2" އާއި "ބޫތު ޕޮލިސް" ހިމެނެ އެވެ. މި އަހަރު ތިން ފިލްމަކުން ސައިފް ފެނިފައިވެ އެވެ. އެއީ "ތާނާޖީ" ގެ އިތުރުން "ޖަވާނި ޖާނެމަން" އާއި "ދިލް ބޭޗާރާ" އިންނެވެ.