ސަލްމާން ޚާން އެންމެ ފުރަތަމަ ސީރިއަސް ލޯބީގެ ގުޅުމެއް ބޭއްވި ބޮލީވުޑްގެ ކުރީގެ ބަތަލާ ސަންގީތާ ބިޖްލާނީ އަލުން އެކްޓިން އަށް ނުކުންނަން ނިންމައިފި އެވެ.

މިކަމާ ބެހޭ ގޮތުން ހިންދުސްތާން ޓައިމްސްއާ ވާހަކަ ދައްކަމުން 60 އަހަރުގެ ބަތަލާ ބުނީ އަލުން އެނބުރި އެކްޓިން އަށް އަންނަން ނިންމީ ހިންދީ ސިނަމާ ވަރަށް ބޮޑަށް ބަދަލުވެ، ކޮންޓެންޓްގެ ގޮތުން ވަރުގަދަ ފިލްމުތަކާ އެކު، ބަތަލާއިންނަށް ވެސް މިހާރު ވަރަށް ޝައުގުވެރި ބޮޑެތި ރޯލްތައް ކުޅެން ލިބެމުން އަންނާތީ އެވެ. އެހެންވެ އެފަދަ ޕްރޮޖެކްޓްތަކެއްގައި މަސައްކަތްކުރަން ބޭނުންވާ ކަމަށާއި ބޭނުން ވަނީ ވީހާ ވެސް ވަރުގަދަ، އޮއްޓަރު ހުރި ރޯލްތައް ކުޅެން ކަމަށް ބުންޏެވެ.

"ހަމައެކަނި ފިލްމުތަކެއް އެކަންޏެއް ނޫން އަހަރެން ބޭނުން ނުފޫޒު ބޮޑުވަމުން އަންނަ ޑިޖިޓަލް ކޮންޓެންޓަށް ދާން. ދާދި ފަހުން ވެސް އެކަހަލަ ދެ ޕްރޮޖެކްޓާ ގުޅޭ ގޮތުން މަޝްވަރާތަކެއް ވެސް ކުރެވުނު،" ސަންގީތާ ބުންޏެވެ. "އެކަމަކު އެއްބަސްވުމަކާ ހަމައަށް ނާދެވުނީމަ އެ އެއްޗެހި ދޫކޮށްލަން ޖެހުނީ. ނަމަވެސް އަހަރެން މިހުރީ ސްކްރިޕްޓްތައް ކިޔަން ހަމަ ރެޑީގައި. އޮފާތާއް ދޭން ތިބި އެންމެންނަށް ވެސް މަރުހަބާކިޔަން. ހަގީގަތުގައި ފިލްމީ މަސައްކަތްތަކާ ދުރުގައި ހުއްޓަސް އެކްޓިން އަށް އޮތް ޝައުގުވެރިކަމެއް ނުގެއްލޭ."

ސަންގީތާ އެންމެ ފަހުން ކުޅުނު ފިލްމަކީ 1996 ގެ "ނިރްބޭ" އެވެ. އަދި އެ އަހަރު، ކުރީގެ ކްރިކެޓް ތަރި މުހައްމަދު އަޒްހަރުއްދީނާ ކައިވެނިކޮށް ސަންގީތާ ވަނީ އެކްޓިންއާ ދުރަށް ގޮސްފަ އެވެ. އޭނާ އަލުން އެނބުރި އަންނަން އުޅޭ އިރު ކައިވެނި 2010 ގައި ވަނީ ރޫޅިފަ އެވެ.

ސަންގީތާ ބުނީ އޭނާ ފިލްމު ކުޅުނު ޒަމާނުގައި ބަތަލާއިންނަށް މާ ހާއްސަ ރޯލްތަކެއް ކުޅެން ނުލިބުމުގެ އިތުރަށް، އޭރު ހިންދީ ސިނަމާގައި އަންހެން ޑައިރެކްޓަރުންގެ މާ ބޮޑު ދައުރެއް ވެސް ނެތް ކަމަށެވެ. އެކަމަކު މިހާރު ޒޯޔާ އަޚްތަރާއި މެގްނާ ގުލްޒާރާއި ގޯރީ ޝިންޑޭ އާއި ތަނޫޖާ ޗަންދުރާ ފަދަ ހުނަރުވެރި އަންހެން ޑައިރެކްޓަރު ހިންދީ ސިނަމާގައި އެބަތިބި ކަމަށް ބުންޏެވެ.

"މިކަހަލަ ސަބަބުތަކާ ހުރެ މިއީ ހަގީގަތުގައި އެކްޓިން އަށް އަހަރެން އެނބުރި އަންނަންވީ ވަގުތު ކަމަށް ގަބޫލުކުރަނީ،" ސަންގީތާ ބުންޏެވެ.

https://www.instagram.com/p/B0_WlZGpXKd/?utm_source=ig_embed&utm_campaign=loading

އޭނާ ބުނީ ފިރިހެން ޑައިރެކްޓަރުންގެ ތެރެއިން އިމްތިއާޒް އަލީ އާއި އަނޫރާގް ކެޝަޕާއި ސްރީރާމް ރަގްވަނާއި މިލަން ލުތުރިއާ ފަދަ ޑައިރެކްޓަރުންނަކީ ވެސް ވަރަށް ހުނަރުވެރި މީސްމީހުން ކަމަށެވެ.

އަލުން އެކްޓިން އަށް އަންނަ އިރު ސަލްމާނާ އެކު މަސައްކަތްކޮށްފާނެތޯ ކުރި ސުވާލާ ގުޅިގެން ސަންގީތާ ބުނީ އެއީ ތަންކޮޅެއް ޒާތީ ވާހަކައެއް ކަމަށާއި އެ ވާހަކަ ނުދައްކާނެ ކަމަށެވެ. ނަމަވެސް މިހާރު ވެސް ސަލްމާނާއި އޭނާގެ އާއިލާއާ ސަންގީތާ ވަރަށް ގާތް ގުޅުމެއް އޮވެ އެވެ. ސަލްމާންގެ އާއިލާ އިން ބާއްވާ ބޮޑެތި ހަފުލާތަކުން ވެސް ސަންގީތާ ފެނުމަކީ ވަރަށް އާންމު ކަމެކެވެ.

ސަންގީތާ ބޮލީވުޑަށް ނުކުތީ 1988 ގެ "ގާތިލް" އިންނެވެ. އޭގެ ފަހުން އޭނާ ކުޅުނު ފާހަގަކޮށްލެވޭ ބައެއް ފިލްމުތަކުގެ ތެރޭގައި "ތުރީދޭވް"، "ހާތިމް ތާއީ"، "ޚޫން ކާ ކަރްޒް" އަދި "ލަކްޝްމަންރޭކާ" ފަދަ ފިލްމުތައް ހިމެނެ އެވެ.