ބޮލީވުޑްގައި ޖިންސީ ގޯނާގެ ތުހުމަތުތަކުގެ އަޑު ތަންކޮޅެއް މަޑުވެފައި އޮތުމަށް ފަހު އަނެއްކާ ވެސް އިތުރުވެ، ޑައިރެކްޓަރު އަނޫރާގް ކެޝަޕަށް ވެސް ޖިންސީ ގޯނާގެ ތުހުތުމަކޮށްފި އެވެ.
އިންޑިއާގެ އެންމެ ހުނަރުވެރި ޑައިރެކްޓަރުންގެ ތެރޭގައި ހިމެނޭ އަނޫރާގް، 48، އަށް ޖިންސީ ގޯނާގެ ތުހުމަތުކުރީ ބަތަލާއެއް ކަމަށްވާ ޕާޔަލް ގޯޝް އެވެ. އޭބީއެން ތެލެގޫ އަށް ދިން އިންޓަވިއުއެއްގައި އޭނާ ބުނީ ފިލްމަކާ ބެހޭ ގޮތުން އަނޫރާގާ ބައްދަލުކުރަން ދިއުމުން ކޮޓަރިއަކަށް ގެންގޮސް، ގަދަކަމުން އޭނާއާ ގުޅުން ހިންގަން މަސައްކަތްކޮށްފައިވާ ކަމަށެވެ.
"އަދި ވަރަށް ހުތުރު ވާހަކަ ވެސް ދެއްކި. އޭނާ ބުނަނީ އަންހެނުން ތިބެނީ ތިމަންނައާ ހެދި މޮޔަވެފައޭ،" އަލަތު ކައިވެނި ރޫޅުމުން ފަހުން ބަތަލާ ކަލްކީ ކޮއެޗްލިންއާ ވެސް އިން އަނޫރާގާ ބެހޭ ގޮތުން ޕާޔަލް، 30، ބުންޏެވެ.
މި ވާހަކަތައް އިންޓަވިއުގައި ހިއްސާކުރުމަށް ފަހު ޕާޔަލް ވަނީ އިންޑިއާގެ ބޮޑުވަޒީރު ނަރެންދުރަ މޯދީ ޓެގްކޮށް، އަނޫރާގަށް ފިޔަވަޅު އަޅަން ޓްވިޓާގައި ގޮވާލައިފަ އެވެ. އަދި އެ ޓްވީޓްގައި ވަނީ މި ވާހަކަ ފެންމަތިކުރުމުން އޭނާގެ ސަލާމަތާ ދޭތެރޭ ވެސް މިހާރު ކަންބޮޑުވާ ކަމަށް ބުނެ އެހީވާން ވެސް އެދިފަ އެވެ. މިކަމާ ގުޅިގެން ނެޝަނަލް ކޮމިޝަން ފޮ ވިމެންގެ ޗެއާޕާސަން ރޭކާ ޝަރުމާ ވަނީ ޕާޔަލް އަށް ކުރިމަތިވި ހާދިސާގެ ތަފުސީލުތައް ހިއްސާކޮށްދޭން އެދިފަ އެވެ.
ޕާޔަލްގެ ވާހަކަތަކާ ގުޅިގެން ބަތަލާ ކަންގަނާ ރަނާވަތު ވެސް މީގެ ތެރެއަށް މިހާރު "އަނގަ ބާނައި" އަނޫރާގް ހައްޔަރުކުރަން ގޮވާލާފައިވެ އެވެ. އަނޫރާގްގެ މައްޗަށް ޖިންސީ ގޯނާގެ ތުހުމަތުކޮށްފައި ވަނީ ބޮލީވުޑާ ބެހޭ ގޮތުން ކަންގަނާ ދައްކަމުންދާ ވާހަކަތަކާ ގުޅިގެން އެ ދެ މީހުންގެ މެދުގައި ޓްވިޓާގައި ކޯޅުންތަކެއް ހިނގަމުން ދަނިކޮށެވެ.
ޕާޔަލް ކުރި ތުހުމަތާ ގުޅިގެން "ގޭންގް އޮފް ވަސޭޕޫރް" އާއި "މަންމަރުޒިޔާ" ފަދަ ފިލްމުތަކުގެ ޑައިރެކްޓަރު ހިންދީ ބަހުން ކުރި ޓްވީޓެއްގައި ރައްދު ވެސް ދީފައިވެ އެވެ. އޭގައި 19 އަހަރުގެ އަންހެން ދަރިއަކު ހުރި އަނޫރާގް ބުނީ އޭނާއާ ދެކޮޅަށް މިހާރު މިފަދަ ވާހަކައެއް ފެންމަތިކުރީ ބޮލީވުޑްގެ ދިފާއުގައި ދައްކާ ވާހަކަތައް ހުއްޓުވައި ހިމޭންކުރުވަން ކަމަށެވެ. އަދި ބުނެލަން ބޭނުން ވަނީ ޕާޔަލް ކަހަލަ މީސްމީހުން ދައްކާ ވާހަކަތަކަކީ ހަދަހަދައިގެން ދައްކާ ވާހަކަތަކެއް ކަމަށް ވެސް އަނޫރާގް ބުންޏެވެ.