މިހާތަނަށް ވަރަށް ކާމިޔާބު ފިލްމުތަކެއް ގެނެސްދިން މެޑޮކް ފިލްމްސްގެ ޕްރޮޑިއުސަރު ދިނޭޝް ވިޖަން "ދާސްވީ" ގެ ނަމުގައި ފިލްމެއް ހަދަން ނިންމައި، އޭގެ ލީޑް ކާސްޓް ވެސް ހަމަޖައްސާފައިވާ ކަމަށް ރިޕޯޓްތައް ބުނެފި އެވެ.
ފިލްމުފެއާ އިން ބުނި ގޮތުގައި މި ފިލްމުގެ ތަރިންނަކީ އަބީޝެކް ބައްޗަން އާއި ޔާމީ ގޯތަމްގެ އިތުރުން ނިމްރަތު ކޯރެވެ. "ދާސްވީ" ވެގެންދާނީ ޔާމީ އާއި ނިމްރަތާ އެކު އަބީޝެކް މަސައްކަތްކުރާ ފުރަތަމަ ފަހަރަށެވެ. ފިލްމުފެއާ އިން ބުނިގޮތުގައި މި ފިލްމުގެ ވާހަކަ އަބީޝެކަށް ނެރޭޓްކޮށް ދިނުމާ އެކު، އޭނާ ވަނީ ވަގުތުން ފިލްމަށް އެއްބަސްވެފަ އެވެ.
ދާދި ފަހުން ކޮވިޑް-19 އަށް ފަރުވާ ވެސް ހޯދި އަބީޝެކްގެ އަތުގައި މިހާރު ވެސް ތިން ފިލްމެއް އެބައޮތެވެ. އެއީ ޝާހްރުކް ޚާން ޕްރޮޑިއުސްކުރާ "ބޮބް ނިވާސް" އާއި "އަޖޭ ދޭވްގަން ޕްރޮޑިއުސްކުރާ "ދަ ބިގް ބުލް" އަދި އަނޫރާގް ބާސޫގެ "ލޫޑޯ" އެވެ. އަބީޝެކްގެ އެންމެ ފަހުގެ މަސައްކަތަކީ ޖުލައިގައި އެމެޒޯން ޕްރައިމް ވީޑިއޯ އިން ސްޓްރީމްކުރި ވެބް ސީރީޒް "ބްރީތު: އިން ޓު ދަ ޝެޑޯޒް" އެވެ.
މިދިޔަ އަހަރު "ބާލާ" އާއި "އުރީ: ދި ސާޖިކަލް ސްޓްރައިކް" ފަދަ ކާމިޔާބު ފިލްމުތަކުން ފެނުނު ޔާމީގެ ކުރިއަށް އޮތް ފިލްމަކީ އަންނަ މަހުގެ 9 ގައި ނެޓްފްލިކްސް އިން ގެނެސްދޭ "ގިނީ ވެޑްސް ސަނީ" އެވެ.
ވަރަށް މަދުން ފިލްމުތަކުން ފެންނަ ނިމްރަތުގެ ފާހަގަކޮށްލެވޭ ފިލްމުތަކުގެ ތެރޭގައި "އެއާލިފްޓް" އާއި "ލަންޗްބޮކްސް" ހިމެނެ އެވެ. ނިމްރަތު ސޮއިކޮށްފައިވާ ފިލްމުތަކުގެ ތެރޭގައި އަކްޝޭ ކުމާރާއި ސާރާ އަލީ ޚާން އަދި ދަނޫޝްގެ "އަތުރަންގީ ރޭ" ހިމެނެ އެވެ.
މި އަހަރު "އަނގްރޭޒީ މީޑިއަމް" ގެނެސްދިން ދިނޭޝްގެ "ދާސްވީ" އާ ބެހޭ އެއްވެސް މައުލޫމާތެއް އަދި ރަސްމީކޮށް ހާމައެއްނުކުރެ އެވެ. އެކަމަކު ވަރަށް އަވަހަށް ފިލްމު އިއުލާންކުރާނެ ކަމަށް މީޑިއާތަކުން ބުންޏެވެ.
މެޑޮކްސް އިން ރިލީޒްކުރަން ތައްޔާރަށް ހުރި ފިލްމުތަކުގެ ތެރޭގައި ކްރިތީ ސެނަންގެ "މިމީ" އާއި "ކާންވީ ކަޕޫރްގެ "ރޫހި އަފްޒާނާ" ފާހަގަކޮށްލެވެ އެވެ.