އެކްޓަރު ސުޝާންތު ސިންގް ރާޖްޕޫތު ޖޫން މަހު ދަންޖެހިގެން އަމިއްލަ އަށް މަރުވި ފަހުން ބަތަލާ ކަންގަނާ ފިލްމު އިންޑަސްޓްރީގެ އެތައް ބައެއްގެ ބޮލުގައި ތުހުމުތުތަކެއް އަޅުވައި އަބުރަށް ހުތުރުވާ ވާހަކަ ދައްކާފައިވާތީ، މަޝްހޫރު ޅެންވެރިޔާ ޖާވިދު އަޚްތަރު ކަންގަނާ އަށް ދައުވާކޮށްފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ޑައިރެކްޓަރު/އެކްޓަރު ފަރުހާން އަޚްތަރާއި ޑައިރެކްޓަރު ޒޯޔާ އަޚްތަރުގެ ބައްޕަ ކަންގަނާގެ މައްސަލަ މުމްބާއީގެ އަނދޭރީގެ މެޓްރޮޕިލިޓަން މެޖިސްޓްރޭޓް ކޯޓަށް ހުށަހެޅީ، ބޮލީވުޑާ ޖައްސާލައިގެން އުޅޭ، މައްސަލަ ބޮޑު ނޫސްވެރިޔާ އަރްނާބް ގޮސްވާމީ އިސްކޮށް ހުރެގެން ހިންގާ ޓީވީ ޗެނެލް ރިޕަބްލިކަން ޓީވީ އަށް ދިން އިންޓަވިއުއެއްގައި ޖާވިދަށް ރައްދުވާ ގޮތަށް ކަންގަނާ ދެއްކި ވާހަކަތަކަކާ ގުޅިގެންނެވެ.
ކަންގަނާއާ ދެކޮޅަށް ހުށަހެޅި މައްސަލާގައި ބުނެފައި ވަނީ އިންޓަވިއުއެއްގައި ޖާވިދާ ބެހޭ ގޮތުން ހަގީގަތެއް ނެތް ވާހަކަތަކެއް ދައްކައި ކަމާ ނުބެހޭ މީސްމީހުންގެ އަބުރު ކަތިލަން ކަންގަނާ މަސައްކަތްކޮށްފައިވާ ކަމަށެވެ. ކަންގަނާ ޖާވިދާ ބެހޭ ގޮތުން ދެއްކި ވާހަތަކުގެ ތެރޭގައި އެކްޓަރު ރިތިކް ރޯޝަނާއި ކަންގަނާއާ ދެމެދު ލޯބީގެ މައްސަލަގަނޑެއް އުފެދި، ހޫނުވި ދުވަސްވަރު އެ ވާހަކަ ނުދައްކަން ޖާވިދު، ކަންގަނާ އަށް އިންޒާރު ދިން ކަމަށް ވެސް ބުނެފައިވެ އެވެ.
ކަންގަނާ އަށް ޖާވިދު ދައުވާކުރި އިރު އޭނާގެ އަންހެނުން ބަތަލާ ޝަބާނާ އަޒްމީ އަކީ ވެސް ކަންގަނާ ދައްކާ ވާހަކަތަކަށް ވަރަށް އާންމުކޮށް ރައްދު ދީ އުޅޭ ބަތަލާއެކެވެ. އަދި މިކަމުގެ ތެރޭގައި އެ ދެ މީހުންގެ މެދުގައި އެކި ފަހަރުމަތިން ބަހުގެ ހަމަލާތައް ބަދަލުކޮށްފައިވެ އެވެ. ޝަބާނާ ދާދި ފަހުން ބުނެފައިވާ ގޮތުގައި ކަންގަނާ އަކީ އަނގައެއް އޮންނާތީ ކިޔާނެނުކިޔާނެ އެއްޗެއް ނޭނގިގެން އުޅޭ ފަންނާނެކެވެ. އަދި ހިތަށް އެރިހާ ވާހަކައެއް ދައްކައި މީސްމީހުންގެ ބޮލުގައި ސާބިތު ނުހިފޭ ތުހުމަތުތައް ކަންގަނާ އަޅުވަނީ ނޫސްތަކުގެ ސުރުހީތަކުން ޖާގަ ހޯދަން ކަމަށް ވެސް ޝަބާނާ ބުނެފައިވެ އެވެ.
މި ފަހުން ކަންގަނާ ދެއްކި އެތައް ވާހަކަތަކަކާ ގުޅިގެން އޭނާއާ ދެކޮޅަށް އެތައް މައްސަލައެއް އެކި މީސްމީހުން ކަމާބެހޭ ފަރާތްތަކަށް ހުށަހަޅާފައިވެ އެވެ. އެގޮތުން އިންޑިއާގެ ހިންދޫންނާއި މުސްލިމުންނާ ދެމެދު ރުޅިވެރިކަން އުފައްދަން ކަންގަނާ އާއި އޭނާގެ ދައްތަ ރަންގޯލީ ޗަންދެލް މަސައްކަތްކުރާ ކަމަށް ބުނެ ހުށަހަޅާފައިވާ މައްސަލައަކާ ގުޅިގެން އެ ދެ މީހުން މި މަހުގެ 10 ވަނަ ދުވަހު މުމްބާއީ ޕޮލިހަށް ހާޒިރުވާން އަންގައި ޗިޓް ވެސް ފޮނުވާފައިވެ އެވެ.
މިފަދަ މައްސަލަތަކާ ގުޅިގެން ކަންގަނާ ވަނީ އޭނާގެ އަނގަ ބަންދު ނުކުރެވޭނެ ކަމަށާއި ޖަލަށް ދާން ޖެހުނަސް، ހައްގު ބަސް ބުނުމުގައި ދެމިހުންނާނެ ކަމަށް ބުނެފަ އެވެ.
