ޑިޖިޓަލް ކޮންޓެންޓް އިންޑިއާގައި ރެގިއުލޭޓްކުރަން ނިންމައިފި

އިންޑިއާގައި ޑިޖިޓަލް ކޮންޓެންޓްތައް ރެގިއުލޭޓްކުރާ ގޮތަށް ހަމަޖައްސައިފި އެވެ.

މި ގޮތަށް ހަމަޖެއްސީ އެލޮކޭޝަން އޮފް ބިޒްނަސް ގާނޫނު 1961 އަށް ގެނައި ދެ އިސްލާހެއް އިންޑިއާގެ ރައީސް ރާމް ނާތު ކޯވިންދު ހޯމަ ދުވަހު ތަސްދީގު ވެސް ކުރެއްވުމާ އެކުގަ އެވެ. ގާނޫނަށް ގެނައި ދެ އިސްލާހަކީ ސްޓްރީމިން ޕްލެޓްފޯމްތަކުން ގެނެސްދޭ ޑިޖިޓަލް ކޮންޓެންޓާއި ޚަބަރު ފަތުރާ އޮންލައިން ޕްލެޓްފޯމްތައް ވެސް ރެގިއުލޭޓްކުރާ ގޮތަށް ހަމަޖެއްސުމެވެ.

މިގޮތަށް ނިންމާފައި ވަނީ މިފަދަ އިސްލާހެއް އިންޑިއާ އަށް ވަރަށް މުހިއްމު ކަމަށް ބުނެ އެ ގައުމުގެ އިންފޮމޭޝަން އެންޑް ބްރޯޑްކާސްޓިން (އައިއެންޑްބީ) މިނިސްޓްރީން ކުރިން ވެސް ވާހަކަ ދައްކާފައި ވަނިކޮށެވެ. އަދި މި އަހަރުގެ މެދުތެރޭގައި އިންޑިއާގެ ޑިފެންސް މިނިސްޓްރީން ވަނީ އެ ގައުމުގައި ހިނގާފައިވާ ހަނގުރާމަތަކާއި އަސްކަރީ ކަންކަމާ ގުޅޭ މީސްމީހުންނާ ހާދިސާތަކާ ބެހޭ ފިލްމުތަކާއި ވެބް ސީރިޒް ފަދަ އުފެއްދުންތައް ހަދާ ނަމަ އެ އެއްޗެހި އާންމުކުރުމުގެ ކުރިން އޭގެ ކޮންޓެންޓް މިނިސްޓްރީއާ ހިއްސާކުރަން އެދި ސާކިއުލާއެއް ވެސް ނެރެފަ އެވެ. އެއީ ހަގީގަތް އޮޅޭ ގޮތަށް އުފެއްދުންތައް ގެނެސްދޭކަމުގެ ޝަކުވާތައް ބޮޑުވެގެންނެވެ.

މިފަހަކަށް އައިސް އިންޑިއާގައިި އެންމެ މަގުބޫލު ޑިޖިޓަލް ޕްލެޓްފޯމްތަކުން އެ ގައުމުގެ މޫނުމަތި ހުތުރުވާ ޒާތުގެ ކޮންޓެންޓްތައް ގެނެސްދޭ ކަމަށް ބުނެ، ވެރިކަންކުރާ ބީޖޭޕީ އާއި އާންމުންގެ ތެރޭގައި ވެސް ކަންބޮޑުވުންތަކެއް އުފެދިފައިވެ އެވެ. އަދި އެފަދަ ކޮންޓެންޓްތައް ގެނެސްދޭ ޕްލެޓްފޯމްތަކަށް ފިޔަވަޅު އަޅަން ވެސް އެކި ފަހަރު މަތިން ބައެއް މީހުން ގޮވާލާފައިވެ އެވެ.

އިންޑިއާގައު އެންމެ މަގުބޫލު އެހެން ގައުމުތަކުގެ ސްޓްރީމިން ޕްލެޓްފޯމްތަކުގެ ތެރޭގައި ހިމެނެނީ ނެޓްފްލިކްސް އާއި އެމެޒޯން ޕްރައިމް ވީޑިއޯގެ އިތުރުން ޑިޒްނީ ޕްލަސް ހޮޓްސްޓާ އެވެ. އިންޑިއާގައި މި ފަހަކަށް އައިސް އަންނަނީ އެ ގައުމުގެ އަމިއްލަ އެތައް ސްޓްރީމިން ޕްލެޓްފޯމެއް ވެސް އޮޕަރޭޓްކުރަމުންނެވެ.

ޑިޖިޓަލް ޕްލެޓްފޯލްމަތަކުން ގެނެސްދޭ ކޮންޓެންޓްތަކަކީ ސެންސަރު ކުރުމަކާ ނުލައި، ގެނެސްދޭ އެއްޗިއްސެވެ.