"ބިރުވެރި ވާހަކަ" އަކީ 15 އެޕިސޯޑްގެ ވެބް ސީރީޒެއް
އައިފިލްމްސްގެ "ބިރުވެރި ވާހަކަ" ސީރީޒްގައި ފެންނާނެ އެކްޓްރެސް، ޝަރާ އާދަމް.-- ފޮޓޯ: އައިފިލްމްސް
28 ނޮވެމްބަރ 2020 - 08:28
1 comments
ބެލުންތެރިންގެ ބޮޑު ތަރުހީބެއް ލިބުނު ފިލްމު "ބަވަތި" ގެނެސްދިން ޑައިރެކްޓަރު އިލްޔާސް ވަހީދު (އިއްލެ) "ބިރުވެރި ވާހަކަ" ގެ ނަމުގައި ވެބް ސީރީޒެއް ގެނެސްދިނުމުގެ މަސައްކަތް ފަށައިފި އެވެ.
ޝޫޓިން ކުރިއަށްދާތާ މިހާރު ދުވަސްކޮޅެއްވެފައިވާ ސީރީޒުން ފިލްމީ ދާއިރާގައި މިހާރު އަރަމުން އަންނަ ޒުވާން ތަރިންތަކެއްގެ އިތުރުން މުޅިން އަލަށް އާ މޫނުތަކެއް ވެސް ނެރޭނެ އެވެ.
"ބިރުވެރި ވާހަކަ" އަކީ އިއްލެ އާއި ހޫދު އިބްރާހީމްގެ ސްކްރީންޕްލޭތަކަށް ހަދާ އެއްޗެކެވެ. އެގޮތުން ސީރީޒްގެ ދެ އެޕިސޯޑް ފިޔަވައި އެހެން ހުރިހާ ބައެއްގެ ސްކްރިޕްޓް ލިޔުނީ އިއްލެ އެވެ. އަނެއް ދެ އެޕިސޯޑް ލިޔުނު ހޫދަކީ ޑާކް ރެއިން އެންޓަޓައިންމަންޓުން ހަދަމުން އަންނަ ބިރުވެރި ފިލްމު "ބަޅިނދު" ގެ ސްކްރީން ރައިޓަރެވެ.
"މިހާރު" ނޫހުގެ ދަށުން ހިންގާ "ދޯ" އަށް ދިން އިންޓަވިއުއެއްގައި އިއްލެ ބުނީ 15 އެޕިސޯޑަށް ހަދާ ސީރީޒްގެ ކޮންމެ އެޕިސޯޑަކުން ކިޔައިދޭނީ އާ ވާހަކައެއް ކަމަށެވެ.
"މި ސީރީޒްގެ ކޮންސެޕްޓާއި ސްޓޯރީލައިނާ އެއްޗެހި ވަރަށް ތަފާތު ވާނެ. އެއީ އަދި ކޮންމެ އެޕިސޯޑެއްގައި ވަކި ވާހަކައެއް ގެނެސްދިން ކަމަށް ވިޔަސް. އަދި ހިޔެއް ނުވޭ ރާއްޖޭގައި މިގޮތަށް ސީރީޒެއް ހަދައިފައި ވާނެހެނެއް،" އިއްލެ ބުންޏެވެ. "ކޮންމެ އެޕިސޯޑަކަށް ބޭނުންވާ ހާއްސަ މޭކަޕް އާއި ވިޝުއަލްސްތައް ގެނެސްދޭން ޖެހޭތީ، މީގެ ކޮންމެ އެޕިސޯޑެއްގެ ނަގަން ހަފުތާއެއްވަރު އެބަ ހޭދަވޭ."
މިދިޔަ މަހުގެ ތެރޭގައި ޝޫޓިން ފެށި ސީރީޒްގެ މަސައްކަތްތައް މިހާރު ގޮސްފައިވާ ހިސާބަށް ބަލާ އިރު، މިހާރު ކުރިއަށް ދަނީ ހަތަރު ވަނަ އެޕިސޯޑްގެ ޝޫޓިން އެވެ. ކާސްޓާ ބެހޭ ގޮތުން އިއްލެ ބުނީ "ބިރުވެރި ވާހަކަ" އަށް އާ މޫނުތަކެއް ނެގީ އޮޑިޝަންތަކެއް ވެސް ބޭއްވުމަށް ފަހު އެވެ. މީގެ މަސައްކަތް ފަށަން ތައްޔާރުވި ދުވަސްކޮޅު އިއްލެގެ އައި ފިލްމްސް އިން ކާސްޓިން ކޯލަކަށް ވެސް ހުޅުވައިލި އެވެ.
"ކާސްޓުގައި ހިމެނޭ ގިނަ ކުދިންނަކީ އޮޑިޝަނުން ހޮވިގެން ފުރުސަތު ދީފައި ތިބި ކުދިން. އަދި މަޝްހޫރު ބައެއް އެކްޓަރުން ވެސް ބައެއް އެޕިސޯޑްތަކުން ފެންނާނެ." ހުނަރުވެރި ޑައިރެކްޓަރު ބުންޏެވެ.
އާންމުންގެ ތެރޭގައި މިހާރު ދަންނަ މޫނުތަކުގެ ތެރެއިން "އެހެނަސް" ގެ މުހައްމަދު ވިޝާލް އާއި ޝަރާ އާދަމް އަދި ތަޖުރިބާކާރު ބަތަލާ މަރިޔަމް ޝަކީލާ ވެސް "ބިރުވެރި ވާހަކަ" އުން ފެންނާނެ އެވެ. މީގެ އިތުރުން އިއްލެގެ ކުރިއަށް އޮތް ފީޗާ ފިލްމު "ނީނާ" އިން ތައާރަފުކުރާ ބަތަލު ޝަރަފު އަބްދުﷲ ވެސް ސީރީޒްގައި ހިމެނެ އެވެ.
"ބިރުވެރި ވާހަކަ" އިއްލެ ފެށީ "ނީނާ" ގެ ޝޫޓިން މި އަހަރުގެ ކުރީކޮޅު އެއްކޮށް ނިންމާލާފައި ވަނިކޮށެވެ. މިހާރު ޕޯސްޓް-ޕްރޮޑަކްޝަން މަރުހަލާގައި އޮތް އެ ފިލްމަކީ ކުރިން މި އަހަރު ގެނެސްދޭން ޕްލޭންކުރި ފިލްމެކެވެ. އެކަމަކު ކޮވިޑް-19އާ ހެދި އަންނަ އަހަރަށް ފަސްކުރީ އެވެ.
"ބިރުވެރި ވާހަކަ" ގެ ވެސް ޕޯސްޓް-ޕްރޮޑަކްޝަން މަސައްކަތާ ހަވާލުވެފައި ވަނީ "ބަވަތި" އާއި "ނީނާ" ގެ ވެސް އެ މަސައްކަތްކުރި އޯކޭޒް އިންކެވެ. މި ސީރިޒް ގެނެސްދޭނެ ދުވަހަކާއި ގެނެސްދޭނެ ޕްލެޓްފޯމެއް އަދި އައި ފިލްމްސް އިން ނުނިންމަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ގެދާނޯމޮސް
28 November 2020
ރިއަލް އިފެކްޓް ހެދެންހުއްޓަސް ރިއަލް އެކްޓިންގް ދެއްކޭވަރައް ދިވެހިން އަދި ފައްކަލެއް ނުވެއެވެ. މީގައި ދިވެހިންނަށް މިދިމާވާ އެއްމައްސަލައަކީ ދިވެހިންނަށް ގިނަސީންތަކެއްގެ ސްޓޯރީ އެއްފަހަރާ ކިޔައިދީގެން އުޅުމުގައި ފޯކަސްގެއްލެނީއެވެ. ޚައްސަ ސީންތަކަށް ވަގުތު ދީގެން އުޅޭނަމަ މިކަންމިހެން ދިމާނުވާނެވެ. ފާޑުފާޑުގެ ބުއިންތައް ބޭނުންކުރާ ބޭރުފަންނާނުންގެ ކެޕޭސިޓީ ދިވެހިންގެ ސިކުނޑީގައި ނުހުންނާނެއެވެ.