ފަރުދީން ޚާން އަލުން އެކްޓިން އަށް ނުކުންނަނީ

ދެހާހުގެ އަހަރުތަކުގެ ކުރީކޮޅު ބޮލީވުޑުން ވިދައިލި އެކްޓަރު ފަރުދީން ޚާން އެކްޓިންއާ ދުރުގައި ހުންނަތާ އަހަރުތަކެއް ފަހުން އަލުން އެކްޓިން އަށް ނުކުންނަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.

އުމުރުން މިހާރު 46 އަހަރުގެ އެކްޓަރުގެ ވާހަކަ މި ފަހުން މީޑިއާތަކުގައި އެންމެ ބޮޑަށް ދެކެވުނީ ވަރަށް ބޮޑަށް ފަލަވެ، ސިފަ އަށް އައިސްފައި ހުރި ބޮޑެތި ބަދަލުތަކާ ހެދި އެވެ. ނަމަވެސް އޭނާ ތަންކޮޅެއް ހިކިފައި ހުއްޓައި ފެންނަ ފޮޓޯތަކެއް ވަނީ އާންމުކޮށްފަ އެވެ. އެއީ މަޝްހޫރު ކާސްޓިން ޑައިރެކްޓަރު މުކޭޝް ޗަބްރާގެ އޮފީހުން ނުކުމެގެން ދަނިކޮށް ނަގާފައިވާ ފޮޓޯތަކެއް ކަމަށްވެ އެވެ.

ބައެއް މީޑިއާތަކުން ބުނީ މި އަހަރު ރިލީޒްކުރި ފިލްމު "ދިލް ބޭޗާރާ" އިން ޑައިރެކްޝަނަށް ނުކުތް ޗަބްރާއާ ފަރުދީން ބައްދަލުކުރީ އޭނާ އަށް ލިބިފައި ހުރި ޕްރޮޖެކްޓްތަކަކާ ބެހޭ ގޮތުން ވާހަކަ ދައްކާށެވެ. އޭގެ ތެރޭގައި ފިލްމުތަކާއި ވެބް ސީރީޒް ވެސް ހިމެނެ އެވެ.

އެކަމަކު ފަރުދީން އަދި އެއްވެސް ޕްރޮޖެކްޓަކަށް ސޮއިކުރިކަމެއް ކަށަވަރެއް ނޫނެވެ. ނަމަވެސް މީޑިއާތަކުން ބުނީ އޭނާ އަލުން އެނބުރި އައުމަކީ ކަށަވަރުކަމެއް ކަމަށެވެ.

ފަރުދީން އެންމެ ފަހުން ކުޅުނު ފިލްމަކީ 2010 ގެ "ދުލްހާ މިލް ގަޔާ" އެވެ.

ކުރީގެ މަޝްހޫރު އެކްޓަރު ފީރޯޒްގެ ޚާންގެ ދަރިފުޅު ފަރުދީން ބޮލީވުޑަށް ނުކުތީ ބައްޕަ 1998 ގައި ޑައިރެކްޓްކުރި "ޕްރޭމް އަގަން" އިންނެވެ. އެކަމަކު ފަރުދީނަށް އާންމުންގެ ސަމާލުކަން ލިބުނީ 2000 ވަނަ އަހަރު ނުކުތް "ޖަންގަލް" އިންނެވެ. އޭގެ ފަހުން އޭނާ ކުޅުނު ފިލްމުތަކުގެ ތެރޭގައި "ލަވް ކޭ ލިޔޭ ކުޗް ބީ ކަރޭގާ" އާއި "ޕިޔާރު ތޫނޭ ކިޔާ ކިޔާ" އާއި "ހޭއި ބޭބީ" އާއި "ބޫތު" އާއި "ނޯ އެންޓްރީ" އާއި "ފިދާ" އަދި "ޑާލިން" ފަދަ ފިލްމުތައް ހިމެނެ އެވެ.

ފަރުދީނަކީ މިހާރު ދެ ކުދިންގެ ބައްޕައެކެވެ. އޭނާ އާއި ނަތާޝާ މަދުވާނީ ކައިވެނިކުރީ 2005 ގަ އެވެ. ނަތާޝާ އަކީ ކުރީގެ މަޝްހޫރު ބަތަލާ މުމްތާޒްގެ ދަރިއެކެވެ.