"ޑެވިލް" އެއް ނޫން ރަންބީރަށް "އެނިމަލް"

މިދިޔަ އަހަރު ޝާހިދު ކަޕޫރާ އެކު "ކަބީރް ސިންގް" ގެނެސްދިން ޑައިރެކްޓަރު ސަންދީޕް ރެޑީ ވަންގާ، ރަންބީރް ކަޕޫރާ އެކު ހަދަން ނިންމާފައިވާ ފިލްމުގެ ނަަމަކަށް "ޑެވިލް" ގެ ބަދަލުގައި "އެނިމަލް" ކިޔަން ނިންމައިފި އެވެ.

މީޑިއާތަކުން ބުނީ މި ޑާކް ތުރިލާގެ ނަން ބަދަލުކުރަން ޖެހުނީ "ޑެވިލް" އަކީ ޕްރޮޑިއުސަރު ސާޖިދު ނަދިއަދުވާލާ ރަޖިސްޓްރީކޮށްފައި އޮތް ނަމެއް ނަމަވެސް އެ ނަން އޭނާގެ އަތުން ލިބޭތޯ ކުރި މަސައްކަތް ނާކާމިޔާބުވުމުންނެވެ. "ޑެވިލް" އެ ނަމަކީ ސާޖިދު 2014 ގައި ސަލްމާން ޚާނާ އެކު ގެނެސްދިން "ކިކް" ގައި ސަލްމާންގެ ކެރެކްޓާ އަށް ކުރުކޮށް ކިޔާ ނަމެވެ. ސާޖިދު ޑައިރެކްޝަނަށް ނުކުތް "ކިކް" ގެ ދެވަނަ ބައި ހަދަން ވެސް މިހާރު އަންނަނީ ތައްޔާރީތައްވަމުންނެވެ.

ސަންދީޕްގެ "އެނިމަލް" އަކީ "ކަބީރް ސިންގް" ވެސް ޕްރޮޑިއުސްކުރި ޓީ ސީރީޒްގެ ބުޝަން ކުމާރާއި މުރާދު ކެތާނީ ޕްރޮޑިއުސްކުރާ ފިލްމެކެވެ. މީގެ ސްކްރިޕްޓާ ގުޅޭ މަޝްވަރާ ސެޝަތަކެއް ވެސް މިހާރު އަންނަނީ ފިލްމުގެ ޓީމްގެ މެދުގައި ބާއްވަމުންނެވެ.

އެކަމަކު "އެނިމަލް" އަށް ވަގުތު ހުސްކުރުމުގެ ކުރިން އަންނަ މަހުގެ ތެރޭގައި ރަންބީރް އެހެން ފިލްމެއްގެ ޝޫޓިން ފަށާނެ އެވެ. އެއީ ޝްރަދާ ކަޕޫރް ބަތަލާގެ ރޯލު ކުޅޭ، ޑައިރެކްޓަރު ލަވް ރަންޖަންގެ ރޮމޭންޓިކް ކޮމެޑީއެކެވެ.

ނަން އަދި އިއުލާންނުކުރާ އެ ފިލްމުގެ ޝޫޓިން އަންނަ މަހުގެ 6 ގައި ގަޒީއާބާދުގައި ފަށަން ވަނީ ތާވަލުކޮށްފަ އެވެ.

ރަންބީރްގެ ކުރިއަށް ހުރި ފިލްމުތަކުގެ ތެރޭގައި މިހާރު ޕޯސްޓް-ޕްރޮޑަކްޝަން މަރުހަލާގައި އޮތް ކަރަން ޖޯހަރުގެ ދަރުމާ ޕްރޮޑަކްޝަންސްގެ "ބުރައްމަސްތުރާ" އާއި އަދިތިޔާ ޗޯޕްޅާގެ ޔާޝްރާޖް ފިލްމްސް (ވައިއާރްއެފް) ގެ "ޝަމްޝޭރާ" ހިމެނެ އެވެ.