އަމީތާބާ އެކު ސޫރަޖް ހަދާ ފިލްމުގެ ޝޫޓިން އަންނަ މަހު

އާއިލީ ލޯބީގެ ފިލްމުތައް ހަދަން ކުޅަދާނަ ބޮލީވުޑްގެ ޑައިރެކްޓަރު ސޫރާޖް ބަރްޖިއާތިއާ، އަމީތާބް ބައްޗަންއާ އެކު މަސައްކަތްކުރާ ފުރަތަމަ ފިލްމުގެ ޝޫޓިން އަންނަ މަހުގެ ތެރޭގައި ފަށަން ނިންމައިފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި ސޫރަޖްގެ ފިލްމަކުން މުޅިން އަލަށް ފުރުސަތު ލިބުމުން އަމީތާބަށް ވަރަށް ބޮޑު އުފަލެއް ލިބިފައިވެ އެވެ. އެހެންވެ އޭނާގެ ބިޒީ ޝެޑިއުލްގެ ތެރެއިން ސޫރަޖްގެ ފިލްމަށް ވަގުތު ދޭން ވަރަށް ބޮޑު އިސްކަމެއް ދީފައިވެ އެވެ. މި ވަގުތު އަޖޭ ދޭވްގަން ޑައިރެކްޓްކުރާ "މޭޑޭ" ގެ އިތުރުން ސޮނީ ޓީވީގެ ކޯން ބަނޭގާ ކަރޯޑްޕަތީ (ކޭބީސީ) ގެ ސީޒަން 12 ވެސް ހޯސްޓްކުރަމުން އަންނަ އަމީތާބް "މޭޑޭ" ނިންމާލައި ވަގުތު ހުސްކުރާނީ ސޫރަޖްގެ ފިލްމަށެވެ.

މި ފިލްމުގެ ވާހަކަ އަދި ރަސްމީކޮށް ސޫރަޖް ކަށަވަރުކޮށް ނުދިން ނަމަވެސް މީޑިއާތަކުން ބުނާ ގޮތުގައި އަމީތާބަށް ފިލްމުގެ ވާހަކަ ކިޔައިދިނުމާ އެކު އޭނާ ވަގުތުން ފިލްމަށް އެއްބަސްވި އެވެ. އަދި މިއީ ވަރަށް ޝައުގުވެރި ރީތި ފިލްމަކަށް ވާނެ ކަމަށް ބުންޏެވެ.

އަމީތާބް މީގެ ކުރިން ވެސް ކާމިޔާބު ފެމިލީ ޑްރާމާތަކެއް ކުޅެފައިވެ އެވެ. އޭގެ ތެރޭގައި "ކަބީ ހުޝީ ކަބީ ޢަމް" އާއި "އޭކް ރިޝްތާ" އަދި "ބާގްބާން" ފާހަގަކޮށްލެވެ އެވެ.

ސޫރަޖް މަޝްހޫރުވެފައި ވަނީ އާއިލާގެ އެންމެން އެކީގައި ތިބެގެން ކަމުދާ ކަހަލަ އާއިލީ ފިލްމުތައް ގެނެސްދޭން މޮޅު ޑައިރެކްޓަރެއްގެ ގޮތުގަ އެވެ. އޭނާ ގެނެސްދިން ފިލްމުތަކުގެ ތެރޭގައި "މޭނޭ ޕިޔާރު ކިޔާ" އާއި "ހަމް އާޕް ކޯ ހޭ ކޯން" އާއި "ހަމް ސާތު ސާތު ހޭ" އާއި "މޭ ޕްރޭމް ކީ ދީވާނީ ހޫ" އާއި "ވިވާ" އަދި "ޕްރޭމް ރަތަން ދަން ޕަޔާތޯ" ހިމެނެ އެވެ.

ސޫރަޖްގެ "ވިވާ" އާއި "މޭ ޕްރޭމް ކީ ދީވާނީ ހޫ" ފިޔަވައި އެހެން ފިލްމުތައް ގެނެސްދިނީ ސަލްމާން ޚާނާ އެކީގަ އެވެ.

ބޮލީވުޑް ހަންގާމާ އިން ބުނިގޮތުގައި ނަން އިއުލާންނުކުރާ ސޫރަޖްގެ އާ ފިލްމުގެ ޝޫޓިން އަންނަ މަހު ފަށާ ގޮތަށް ރާވާފައި ވަނީ ޝޫޓިން ފަށާތާ ދެ މަސްތެރޭގައި ނިންމާ ގޮތަށެވެ. އަދި މީގެ ކާސްޓަށް ބޮމަން އިރާނީ ވެސް ނަގާފައިވާ އިރު، އިތުރު ކާސްޓުން ހަމަޖެއްސުމުގެ މަސައްކަތް މި ވަގުތު އަންނަނީ ކުރެވެމުންނެވެ.

ރިޕޯޓްތައް ބުނާގޮތުން އަމީތާބާ އެކު ހަދާ ފިލްމަށް ފަހު، ސޫރަޖް 2022 ގައި ސަލްމާނާ އެކު އާ ފިލްމެއްގެ މަސައްކަތް ވެސް ފަށާނެ އެވެ.