ދީޕިކާ އަށް މަސައްކަތް ގިނަ އަހަރެއް

ބޮލީވުޑުން މި އަހަރު އެންމެ ބިޒީވާނެ ބަތަލާ އަކީ ދީޕިކާ ޕަދްކޯން އެވެ. އޭނާގެ އަތުގައި ބޮޑެތި ފިލްމުތަކެއް ހުރި އިރު، އޭގެ ތެރެއިން ބައެއް ފިލްމުތަކުގެ ޝޫޓިން ވެސް އޮތީ ފަށައިފަ އެވެ.

އެކްޓަރު ރަންވީރު ސިންގްގެ އަނބިމީހާ ކަމަށްވާ ދީޕިކާގެ އަތުގައި ހަ ފިލްމެއް އޮތް އިރު، އެންމެ ފަހުން ދީޕިކާ، 35، ސޮއިކުރީ ޑައިރެކްޓަރު ސިދާތު އާނަންދުގެ "ފައިޓާ" އަށެވެ. އަންނަ އަހަރުގެ ސެޕްޓެމްބަރު 30 ގައި ސިނަމާތަކަށް ގެންނަން ތާވަލުކޮށްފައި އޮތް ފިލްމަކީ ބޮޑު ސްކްރީނުން ދީޕިކާ އާއި ރިތިކް ރޯޝަން އަލަށް ފެންނާނެ ފިލްމެކެވެ.

ދީޕިކާ ޝޫޓިން ފަށާފައި އޮތް ދެ ފިލްމަކީ ޝާހްރުކް ޚާނާ އެކު ސިދާތު ހަދާ "ޕަތާން" އާއި ޑައިރެކްޓަރު ޝަކުން ބަޓްރާގެ އަދި ނަން އިއުލާންނުކުރާ ފިލްމެކެވެ. "ޕަތާން" ހެ މުމްބާއީ ޝެޑިއުލް މިދިޔަ މަހުގެ ތެރޭގައި ނިންމާލާފައިވާ އިރު މިހާރު އަންނަނީ ދެވަނަ ޝެޑިއުލް އިންޑިއާ އިން ބޭރުގައި ކުރިއަށް ގެންދަން ތައްޔާރުވަމުންނެވެ.

"ޕަތާން" ގެ ކުރިން ދީޕިކާ ޝޫޓިން ފަށާފައި އޮތް ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަނަށް ޝަކުން ބަޓްރާ ޑައިރެކްޓްކުރާ ތުރިލާ އެވެ. އޭގެ ވަރަށް ބޮޑުބައި މިދިޔަ އަހަރުގެ އޮކްޓޯބަރާއި ނޮވެމްބަރުގައި ގޯއާގައި ވަނީ ނިންމައިފަ އެވެ. ދީޕިކާ ބުނެފައިވާ ގޮތުގައި އެ ފިލްމަކީ އޭނާގެ ކެރިއަރުގައި އަންނާނެ އެންމެ ތަފާތު އެއް ފިލްމަށް ވާނެ އެވެ. އޭގެ ކާސްޓުންގެ ތެރޭގައި ސިދާންތު ޗަތުރަވެދީ އާއި އަނަންޔާ ޕާންޑޭގެ އިތުރުން ދައިރިއާ ކަރްވާ ހިމެނެ އެވެ.

ދީޕިކާގެ އަތުގައި ދެން ހުރި ފިލްމުތަކަކީ އޭނާ ޕްރޮޑިއުސަރެއްގެ ގޮތުގައި ހިއްސާވާ "މަހާބާރާތު" އާއި ހޮލީވުޑްގެ ފިލްމު "ދި އިންޓާން" ގެ ރިމެކެވެ. މީގެ އިތުރުން ކާމިޔާބު އެތައް ފިލްމެއް ކުޅެފައިވާ ބަތަލާގެ އެންމެ ހާއްސަ އެއް ފިލްމަކީ "ބާހްބަލީ" ގެ ބަތަލު ޕްރަބާސް އާއި އަމީތާބް ބައްޗަނާ އެކު ކުޅޭ ފިލްމެކެވެ. މިއީ ވެސް އަދި ނަން އިއުލާން ނުކުރާ ފިލްމެކެވެ.

މި ފިލްމުތަކާ އެކު ދީޕިކާ މި އަހަރުގެ ތެރޭގައި މި ހުރިހާ ފިލްމުތަކަށް ވެސް އެކި ގޮތްގޮތުން ވަގުތު ދޭން ޖެހޭނެ އެވެ. އެގޮތުން ޝޫޓިންތައް ފެށުމުގެ ކުރިން ފިިލްމުތަކަށް ތައްޔާރުވާން ކުރަން ޖެހޭ މަސައްކަތްތަކަށް ވަގުތު ދިނުން ހިމެނެ އެވެ.

މިދިޔަ އަހަރު "ޗަޕާކް" އިން ފެނިގެން ދިޔަ ބަތަލާ ދެން އެންމެ އަވަހަށް ފެންނާނީ ފިރިމީހާ ރަންވީރުގެ ކްރިކެޓް ފިލްމު "83" އިންނެވެ. މިދިޔަ އަހަރު ކޮވިޑާ ހެދި މި އަހަރަށް ފަސްކުރި އެ ފިލްމު ރިލީޒްކުރާ ތާރީހު މި މަސް ނިމުމުގެ ކުރިން އިއުލާންކުރާނެ ކަމަށް މީޑިއާތަކުން ބުނެ އެވެ.

ދީޕިކާގެ ކުޑަ ރޯލެއް ފެންނާނެ "83" އަކީ "ބަޖިރަންގީ ބައިޖާން" އާއި "އޭކް ތަ ޓައިގާ" ފަދަ ކާމިޔާބު ފިލްމުތައް ގެނެސްދިން ކަބީރް ޚާން ޑައިރެކްޓްކޮށްފައިވާ ފިލްމެކެވެ.