ކެޓްރީނާ އާއި ވިޖޭގެ ފިލްމުގައި ވާނީ 90 މިނެޓު

ބޮލީވުޑްގެ ބަތަލާ ކެޓްރީނާ ކެއިފާއި ތަމަޅަ އެކްޓަރު ވިޖޭ ސެތުޕަތީ ހިމަނައިގެން ޑައިރެކްޓަރު ސްރީރާމް ރަގްވަމް ހަދާ ފިލްމަކީ އިންޓަވަލްއަކާ ނުލައި ގެނެސްދޭނެ 90 މިނެޓްގެ ވަރަށް ތަފާތު ފިލްމަކަށް ވާނެ ކަމަށް ރިޕޯޓްތައް ބުނެފި އެވެ.

މި ފިލްމުގެ ވާހަކަ މީޑިއާތަކުގައި ވަރަށް ބޮޑަށް ދެކެވެމުން ދިޔަ ނަމަވެސް، ބޮލީވުޑްގައި ތުރިލާތައް ގެނެސްދޭން ކުޅަނާނެ ޑައިރެކްޓަރު އަދި ފިލްމާ ބެހޭ އެއްވެސް ވާހަކައެއް ރަސްމީކޮށް ހާމައެއްނުކުރެ އެވެ. އެކަމަކު ކެޓްރީނާ އާއި ވިޖޭއާ އެކު ހަދަން ސްރީރާމް ނިންމި މި ފިލްމަކީ އޭނާ ވަރުން ދަވަންއާ އެކު ހަދަން އިއުލާންކޮށްފައި އޮތް ބައޮގްރަފިކަލް ޑްރާމާ "އެއްކީސް" ގެ މަސައްކަތް މި ވަގުތަށް މަޑުޖައްސައިލުމަށް ފަހު ހަދަން ނިންމި ފިލްމެއް ކަމަށް މީޑިއާތަކުން ބުންޏެވެ.

ބޮލީވުޑް ހަންގާމާ އިން ބުނި ގޮތުގައި އެޕްރީލް މަހުގެ ތެރޭގައި ޕޫނޭގައި ޝޫޓިން ފަށާ ފިލްމުގެ މަސައްކަތަކަށް ނަގާނީ މަސް ދުވަހެވެ. އަދި މީގެ ބައެއް މަންޒަރުތައް މުމްބާއީގައި ވެސް ޝޫޓްކުރާނެ އެވެ.

ދެހާސް އަށާރައިގައި "އަންދާދުން" ގެނެސްދިން ސްރީރާމްގެ އާ ފިލްމު ދޮޅު ގަޑިއިރުގެ ފިލްމެއްގެ ގޮތުގައި އިންޓަވަލްއަކާ ވެސް ނުލައި ގެނެސްދޭ ފިލްމެއްގެ ގޮތުގައި ހަދަން ނިންމި އިރު، ހިންދީ ފިލްމުތަކަކީ އެވްރެޖްކޮށް ދިގުމިން ދެ ގަޑިއިރަށް ވުރެ ކުރު ނޫން ފިލްމުތަކެވެ. އަދި ފިލްމުތަކިުގެ ޑިއުރޭޝަން ދެ ބަޔަކަށް ބަހާލައި އިންޓަމިޝަނާ ނުލައި ފިލްމުތައް ގެނެސްދިނުމަކީ ހިންދީ ސިނަމާގައި އެހާ އާންމު ކަމެއް ވެސް ނޫނެވެ.

ކެޓްރީނާ މި ވަގުތު ހޮރޯ-ކޮމެޑީ "ފޯންބޫތު" ގެ މަސައްކަތްކުރަމުން އަންނަ އިރު، ރިޕޯޓްތައް ބުނާގޮތުން އޭނާ މާޗް މަހު ސަލްމާން ޚާނާ އެކު ކުޅޭ "ޓައިގާ 3" ގެ ޝޫޓިން ފަށާނެ އެވެ. އަދި އަލީ އައްބާސް ޒަފަރު ޑައިރެކްޓްކުރާ ސުޕަހީރޯ ފިލްމު "ސުޕަ ސޯލްޖާ" ގެ މަސައްކަތް ވެސް އޮތީ އެޕްރީލަށް ތާވަލުކޮށްފަ އެވެ.

މި ފަހުން ބޮލީވުޑްގެ ޕްރޮޖެކްޓްތަކުން ފުރުސަތު ލިބެމުން އަންނަ ވިޖޭ މި ވަގުތު އަންނަނީ "މުމްބައިކާ" ގެ މަސައްކަތްކުރަމުންނެވެ. އަދި ޝާހިދު ކަޕޫރްގެ ވެބް ސީރީޒް "ގަވަރު" ގެ ކާސްޓްގައި ވެސް އޭނާ ހިމެނެ އެވެ.