"ތާރް" އަކީ އަނިލް އާއި ދަރިފުޅު ހާޝްގެ ފިލްމެއް

މިދިޔަ މަހު ނެޓްފްލިކްސް އިން ގެނެސްދިން އަނިލް ކަޕޫރްގެ ފިލްމު "އޭކޭ ވާސަސް އޭކޭ" ގައި ފިރިހެން ދަރިފުޅު ހާޝްވަރުދަން ކަޕޫރް ވެސް ރޯލެއް ކުޅެފައި ވަނިކޮށް ދެބަފައިން އިތުރު ފިލްމަކަށް ސޮއިކޮށް، އޭގެ މަސައްކަތް ފަށައިފި އެވެ.

މިއީ އެއްވެސް މައުލޫމާތެއް މިހާތަނަށް ރަސްމީކޮށް ހާމަނުކޮށް ވަރަށް ސިއްރިޔާތުން ޝޫޓިން ކުރިއަށް ގެންދާ "ތާރް" އެވެ. މީގެ ފުރަތަމަ ޝެޑިއުލް ރާޖަސްތާނުގައި ދާދި ފަހުން ނިންމާލާފައިވާ އިރު ސެޓުން ނަގާފައިވާ ބައެއް ފޮޓޯތައް ވެސް ސޯޝަލް މީޑިއާގައި އާންމުވެފައިވެ އެވެ.

"ތާރް" ގެ ވާހަކަ ތިލަވުމާ އެކު މި ފިލްމާ ބެހޭ ބައެއް މައުލޫމާތު މީޑިއާތަކުން ވެސް ގެނެސްދީފައިވެ އެވެ. އެގޮތުން މިއީ ނެޓްފްލިކްސް އަށް ހަދާ ފިލްމެއް ކަމަށާއި އަނިލް އާއި ހާޝްއާ އެކު ދެން ފިލްމުގެ އެންމެ މުހިއްމު އެކަކީ ފާތިމާ ސަނާ ޝެއިހް ކަމަށް މީޑިއާތަކުން ބުންޏެވެ.

ދާދި ފަހުން ފާތިމާ އަށް އުފަން ދުވަހުގެ ތަހުނިޔާކިޔަން ދެ މީހުން އެކީގައި ނަގާފައިވާ ފޮޓޯއެއް ވެސް އަނިލް ޓްވިޓާގައި ޕޯސްޓްކުރުމުން ފޭނުން ވަނީ ދެ ތަރިން އެކީގައި ފިލްމެއްގެ މަސައްކަތްކުރަނީ ކަމަށް ވެސް ލަފާކޮށްފަ އެވެ.

ބޮލީވުޑް ހަންގާމާ އިން ބުނި ގޮތުގައި އަނިލްގެ ދެބަފައިންނާއި ފާތިމާއާ އެކު ގެނެސްދޭން މަސައްކަތްކުރާ "ތާރް" ގެ ޝޫޓިން ރާޖަސްތާނުގެ އެކި ހިސާބުތަކުގައި ކުރިއަށް ގެންގޮސްފައި ވަނީ މިދިޔަ މަހުގެ 24 އިން ފެށިގެން މި މަހުގެ 17 އާ ހަމައަށެވެ.

ފިލްމުގެ ޑައިރެކްޓަރަކީ ޑައިރެކްޓަރު އަނޫރާގް ކެޝަޕާ އެކު ކުރިން މަސައްކަތްކޮށްފައިވާ އެކްޓަރު/ސްކްރީން ރައިޓަރު ރާޖް ސިންގް ޗައުދަރީ އެވެ. އޭނާ އަކީ އަނޫރާގް 2009 ގައި ގެނެސްދިން "ގުލާލު" ގެ ބަތަލުގެ އިތުރުން އަނޫރާގްގެ 2007 ގެ ފިލްމު "ނޯ ސްމޯކިން" ކޯ-ރައިޓަރެވެ.

"ތާރް" އާ ބެހޭ އެއްވެސް މައުލޫމާތެއް އަދި ރަސްމީކޮށް ހިއްސާކޮށްފައި ނުވިޔަސް މި އަހަރުގެ ތެރޭގައި މި ފިލްމު ބެލުންތެރިންނަށް ގެނެސްދޭނެ ކަމަށް ބެލެވެ އެވެ.

އަނިލް އާއި ހާޝް އަކީ އޮލިމްޕިކް މެޑަލް ހާސިލުކޮށްފައިވާ އިންޑިއާގެ ކުރީގެ ޝޫޓަރު އަބިނާވް ބިންދުރާގެ ބައޮގްރަފިކަލް ޑްރާމާ އަށް ވެސް ސޮއިކޮށްފައިވާ ދެ ތަރިންނެވެ. ދެހާސް ސަތާރައިގައި އެ ފިލްމު އިއުލާންކުރި ނަމަވެސް މިހާތަނަށް ފިލްމުގެ މާ ބޮޑު މަސައްކަތެއް ކުރިއަކަށް ނުދެ އެވެ. އޭގައި އަބިނާވްގެ ރޯލް ކުޅޭނީ ހާޝް އެވެ. އަދި އަނިލް ކުޅޭނީ އޭނާގެ ބައްޕަގެ ރޯލެވެ.

ހާޝް ބޮލީވުޑަށް ނުކުތީ 2016 ގެ "މިރުޒިޔާ" އިންނެވެ. އޭގެ ފަހުން އޭނާ ކުޅުނީ "ބަވޭޝް ޖޯޝީ ސުޕަހީރޯ" އެވެ. މި ދެ ފިލްމަކީ ބޮޑު ދެ ފްލޮޕެވެ.