ބަތަލާ އަނީތާ އަށް ލިބުނީ ފިރިހެން ކުއްޖެއް

ކާމިޔާބު އެތައް ސިލްސިލާއެއް ކުޅެފައިވާ އިންޑިއާގެ މަޝްހޫރު ޓީވީ ބަތަލާ އަނީތާ ހަސަނަންދާނީ އަށް ފިރިހެން ކުއްޖަކު ލިބިއްޖެ އެވެ.

އޭނާ އަންގާރަ ދުވަހު ވިހޭކަން އިންސްޓަގްރާމްގައި ވެސް ހިއްސާކޮށްފައިވެ އެވެ. އަނީތާ އާއި ރޯހިތު ރެޑީ އަށް ދަރިއަކު ލިބެން އުޅޭކަން އިއުލާންކުރީ މިދިޔަ އަހަރުގެ އޮކްޓޯބަރު މަހުގެ ތެރޭގަ އެވެ.

އޭރު އަނީތާ ބުނެފައިވާ ގޮތުގައި ފިރިހެން ކުއްޖަކު ލިބިއްޖެ ނަމަ ނަމަކަށް ކިޔާނީ މަރުވެފައިވާ ބަފާބެ ރަވީގެ ނަމެވެ. އެހެންވެ އެ ވައުދު އޭނާ އާއި ފިރިމީހާ ފުއްދާނެ އެވެ.

އަނީތާ މަގުބޫލު އެތައް ސިލްސިލާއެއް ކުޅެފައިވެ އެވެ. އޭގެ ތެރޭގައި "ނާގިން" އާއި "ޔޭ ހޭ މޮހަބައްތޭން" އާއި "ޔޭ ހޭ އާޝިގީ" އާއި "ކިޔޫ ކީ ސާސް ބީ ކަބީ ބަހޫ ތީ" ފަދަ އެތައް ސިލްސިލާއެއް ހިމެނެ އެވެ.

އަނީތާ އަކީ ކުރިން އިންޑިއާގެ އެކި ބަހުރުވަތަކުން ފިލްމުތަކެއް ވެސް ކުޅުނު ތަރިއެކެވެ. އޭނާ ކުޅުނު ހިންދީ ފިލްމުތަކުގެ ތެރޭގައި "ކުޗް ތޯ ހޭ" އާއި "ކޮއީ އާޕް ސާ" އާއި "ޖަސްޓް މެރިޑް" ގެ އިތުރުން "ރާގިނީ އެމްއެމްއެސް 2" ހިމެނެ އެވެ. އަނީތާގެ ފިރިމީހާ ރޯހިތަކީ ވެސް ޓީވީ އެކްޓަރެކެވެ.