ކަލާޒްގެ ރިއަލިޓީ ޝޯ "ބިގް ބޮސް" ގެ 14 ވަނަ ސީޒަން، ރުބީނާ ދިލައިކް ކާމިޔާބުކޮށްފި އެވެ.
މިދިޔަ އަހަރުގެ އޮކްޓޯބަރު 3 ގައި ގެނެސްދޭން ފެށި ޝޯ ޓީވީ ބަތަލާ ރުބީނާ ކާމިޔާބުކުރުމާ ގުޅިގެން ފައިސާގެ އިނާމުގެ ގޮތުގައި 36 ލައްކަ ރުޕީސް ލިބުނެވެ. "ބިގް ބޮސް" ގެ ކޮންމެ ސީޒަނެއްގެ އިނާމަކަށް ކަނޑައަޅަނީ 50 ލައްކަ ރުޕީސް އެވެ.
އެކަމަކު ފައިނަލާ ހަމައަށްދާ ގަދަ ފަހަކާ އެކު، ކޮންމެވެސް އެއް ބައިވެރިޔަކަށް އޭނާ ގަދަ ތިނެއްގައި ނުހިމެނޭކަން އަމިއްލަ އަށް ޔަގީންވާ ނަމަ އިނާމުން ބައެއް މިލްކޮށްގެން ފިނާލޭ ރޭހުން ވަކިވުމުގެ ފުރުސަަތުދެ އެވެ. މި ފަހަރު އެގޮތަށް ދިނީ 14 ލައްކަ އެވެ. އެއާ އެކު ސީޒަން ކާމިޔާބުކުރާ މީހަކަށް ކަނޑައަޅާފައި އޮންނަ 50 ލައްކަ އިން އެ ބައި އުނިވީ އެވެ.
"ބިގް ބޮސް 14" ގެ ގަދަ 5 ގެ ތެރެއިން ފިނާލޭ ރޭހުން 14 ލައްކަ ހާސިލުކޮށްގެން ބޭރުވީ މި ފަހަރުގެ ސީޒަނުން ޗެލެންޖާއެއްގެ ގޮތުގައި ފުރުސަތު ލިބި ގަދަ ހިފުމަކަށް ދިޔަ ރާކީ ސާވަންތެވެ. އޭނާ އަކީ "ބިގް ބޮސް" ގެ އެންމެ ފުރަތަމަ ސީޒަނުގައި ވާދަކުރި ބައިވެރިއެކެވެ.
މި ފަހަރުގެ ސީޒަން ކާމިޔާބުކުރި ރުބީނާ، 33، އަކީ އިންޑިއާގެ މަޝްހޫރު ޓީވީ ބަތަލާއެކެވެ. އޭނާ ކުޅުނު ސިލްސިލާތަކުގެ ތެރޭގައި "ޗޯޓީ ބަހޫ" އާއި "ޝަކްތީ" އަދި "ޕުނާރު ވިވާ" ފަދަ ސިލްސިލާތައް ހިމެނެ އެވެ. ރުބީނާ އަށް "ބިގް ބޮސް 14" އިން ފުރުސަތު ލިބުނީ ފިރިމީހާ/އެކްޓަރު އަބިނާވް ޝުކްލާއާ ވެސް އެކީގަ އެވެ. އެކަމަކު ޝޯ ނިމެންދެން ހަފުތާއަށް ވެފައި ވަނިކޮށް އޭނާ ވަނީ ކަޓައިފަ އެވެ.
ސީޒަންގެ ޓްރޮފީ އުފުލާލުމުގެ ޝަރަފު ރުބީނާ ހޯދި އިރު މި ފަހަރު ގަދަ 5 އަށް ދިޔަ ބައިވެރިންގެ ތެރެގައި އޭނާ ނޫނީ ސީޒަން ފެށި ގޮތަށް އެއްވާނެއްގައި ހިފަހެއްޓި ބައިވެރިއެއް ނެތެވެ. އަދި ރުބީނާ ފައިނަލާ ހަމައަށް ގޮސް ސީޒަން ކާމިޔާބުކުރީ ވެސް ވަރަށް އުނދަގޫ އަދި އެހާމެ ވާދަވެރި ދަތުރަކާ އެކީގަ އެވެ.
ގިނަ ބަޔަކު ކުރިން ވެސް އުންމީދުކޮށްގެން ތިބީ "ބިގް ބޮސް 14" ކާމިޔާބުކުރާނީ ރުބީނާ ކަމަށެވެ.
މި ފަހަރުގެ ސީޒަންގެ ދެވަނަ ލިބުނީ އަމިއްލަ އަށް ޝޯއިން ވަކިވެ، ފަހުން އަނެއްކާ ފުރުސަތު ލިބުނު ލަވަކިޔުންތެރިޔާ ރާހުލް ވައިދިއާއަށެވެ. އޭނާ އަކީ މުޅި ސީޒަނަށް ބަލާ އިރު، ރުބީނާއާ އެންމެ ވާދަވެރިކޮށް ފެނުނު ބައިވެރިޔާ އެވެ. ރާހުލް އަކީ "ބިގް ބޮސް 14" އިން މި ފަހަރު ފުރުސަތު ލިބުނު ދެ ލަވަކިޔުންތެރިންގެ އެކެކެވެ. އަނެއް ފަންނާނަކީ ޝޯގެ ވަރަށް ކުރީކޮޅު ކެޓި ޖާން ކުމާރު ސާނީ އެވެ.
ދެން މި ފަހަރުގެ ސީޒަންގައި މުޅިން ވެސް ވާދަކުރީ ޓީވީ ތަރިންނެވެ.
ސީޒަންގެ ތިން ވަނަ ލިބުނީ ޝޯ އިން ކެޓި ފަހުން ދެވަނަ ފުރުސަތެއް ލިބުނު ނިކީ ތަމްބޯލީއަށެވެ.
މިި ފަހަރު ގަދަ 5 އަށް ދިޔަ ފަސް ބައިވެރިންގެ ތެރޭގައި ދެން ހިމެނުނީ ދެ ފަހަރެއްގެ މަތިން ޝޯ އިން ފުރުސަތު ލިބުނު އަލީ ގޯނީ އެވެ. އޭނާ އަކީ "ބިގް ބޮސް 14" ގެ އޮރިޖިނަލް ބައިވެރިންގެ ތެރޭގައި ހިމެނުނު ޖޭސްމީން ބާސީންގެ ލޯބިވެރިޔާ އެވެ.
ބޮލީވުޑްގެ އެކްޓަރު ސަލްމާން ހޯސްޓްކުރާ ޝޯގެ 14 ވަނަ ސީޒަންގެ ފިނާލޭ ރޭ ނިންމައިލީ ފޯރި ގަދަ އައިޓަމްތަކަކާއި ބައެއް ތަރިންނާ ވެސް އެކީގަ އެވެ. އެގޮތުން މަދޫރީ ޑިކްސިޓާއި ދަރުމެންދުރާ އަދި ނޯރާ ފަތެހީ ފަދަ ތަރިން ފެނިގެން ދިޔަ އެވެ.
މަދޫރީ އަކީ ކަލާޒް މި މަހުގެ 27 ގައި ފަށާ "ޑާންސް ދިވާނޭ" ސީޒަން 3 ގެ ޖަޖެކެވެ.
"ބިގް ބޮސް 14" ނިންމާލައި ދެން އެ ޝޯގެ 15 ވަނަ ސީޒަން ބެލުންތެރިންނަށް ގެނެސްދޭނީ މި އަހަރުގެ ސެޕްޓެމްބަރު ނުވަތަ އޮކްޓޯބަރު ހިސާބުގަ އެވެ.
