އާލިއާ ބަޓް އަމިއްލަ ފިލްމު ކުންފުންޏެއް ލޯންޗްކޮށްފި

ބޮލީވުޑްގެ ޒުވާން ބަތަލާ އާލިއާ ބަޓް އިޓާނަލް ސަންޝައިން ޕްރޮޑަކްޝަންސްގެ ނަމުގައި އަމިއްލަ ފިލްމު ކުންފުންޏެއް ލޯންޗްކޮށްފި އެވެ.

މިހާރު ވެސް އަމިއްލަ ކްލޯތިން ލައިނެއް ގެންގުޅޭ ބަތަލާގެ ފިލްމު ކުންފުނި ލޯންޗްކުރި ވާހަކަ ޓްވިޓާގައި ހިއްސާކޮށް ބުނީ މިއީ ވަރަށް ބޮޑު އުފަލެއް ކަމަށާއި ދެން އޮތީ ބެލުންތެރިންނަށް ވާހަކަތައް ކިޔައިދިނުން ކަމަށެވެ.

މިހާރު ބޮލީވުޑްގައި ތިބި އެންމެ ހުނަރުވެރި އަދި ކާމިޔާބު ބަތަލާއިންގެ އެންމެ ކުރީގައި ގުނައިލެވޭ އާލިއާ އަކީ މިހާތަނަށް އިންޑިއާގެ އެންމެ ވަރުގަދަ ބައެއް ޑައިރެކްޓަރުންނާ އެކު މަސައްކަތްކޮށް، ފިލްމީ މަސައްކަތުގެ ތަޖުރިބާ ލިބިފައިވާ ބަތަލާއަކަށްވާތީ އޭނާގެ އަމިއްލަ ފިލްމު ކުންފުނިން ވެސް އާދައިގެ އުފެއްދުންތަކެއް ގެނެސްދޭނެ ކަމަކަށް ނުބެލެވެ އެވެ. އަނެއްކޮޅުން އޭނާގެ މެންޓާ ކަރަން ޖޯހަރާއި ބައްޕަ މަހޭޝް ބަޓަކީ ބޮލީވުޑްގެ ވަރުގަދަ ސިކުނޑިތަކަކަށްވާތީ އާލިއާގެ ކުންފުނި ބައްޓަންކުރުމުގައި އެ މީހުންގެ މަޝްވަރާ އާއި ލަފާ ވެސް ލިބޭނެ އެވެ.

ދެހާސް ބާރައިގައި ކަރަންގެ "ސްޓޫޑަންޓް އޮފް ދި އިޔާ" އިން ބޮލީވުޑަށް ނުކުތް ބަތަލާގެ މި އަހަރު ފެންނާނެ ފިލްމުތަކުގެ ތެރޭގައި ޑައިރެކްޓަރި ސަންޖޭ ލީލާ ބަންސާލީ ޖުލައި 30 ގައި ގެނެސްދޭ "ގަންގޫބާއި ކަތިއަވާޅީ" އާއި "ބާހްބަލީ" ގެ ޑައިރެކްޓަރު އެސްއެސް ރާޖަމޯލީ އޮކްޓޯބަރު 13 ގައި ގެނެސްދޭ "އާރްއާރްއާރް" ހިމެނެ އެވެ. މީގެ އިތުރުން ލޯބިވެރިޔާ ރަންބީރް ކަޕޫރާ އެކު އާލިއާ ފެންނާނެ "ބުރައްމަސްތުރާ" އަކީ ވަރަށް އުންމީދީ ފިލްމެކެވެ.

މި މަހުގެ 15 ގައި 28 އަހަރު ފުރޭ އާލިއާ ސޮއިކޮށްފައި ހުރި ފިލްމުތަކުގެ ތެރޭގައި ކަރަންގެ "ތަޚުތު" އާއި ޝާހްރުކް ޚާން ޕްރޮޑިއުސްކުރާ "ޑާލިންސް" ހިމެނެ އެެވެ.