އަކްޝޭގެ "ރާމް ސެތޫ" އަށް ޖެކްލިން އާއި ނުޝްރަތު

އަކްޝޭ ކުމާރު ސޮއިކޮށްފައިވާ ފިލްމުތަކުގެ ތެރޭގައި ހިމެނޭ "ރާމް ސެތޫ" ގެ ބަތަލާއިންނަށް ޖެކްލިން ފެނަންޑޭޒާއި ނުޝްރަތު ބަރޫޗާ ނަގާފައިވާ ކަމަށް ރިޕޯޓްތައް ބުނެފި އެވެ.

ޖެކްލިން އަކީ އަކްޝޭ މި ވަގުތު ކުޅެމުން އަންނަ ފިލްމު "ބައްޗަން ޕާންޑޭ" ގެ ވެސް އެއް ބަތަލާ އެވެ. ދެ ތަރިން ކުރިން އެކީގައި 2016 ގެ "ހައުސްފުލް 3" އާއި 2013 ގެ "ހައުސްފުލް 2" އަދި 2015 ގެ "ބްރަދާޒް" ގައި ވެސް މަސައްކަތްކޮށްފައިވެ އެވެ.

"ރާމް ސެތޫ" އަކީ އަކްޝޭއާ ނުޝްރަތު މަސައްކަތްކުރާނެ ފުރަތަމަ ފިލްމެވެ. ކުރިއަރަމުން އަންނަ ބަތަލާ އަކީ 2018 ގެ އެންމެ ކާމިޔާބު އެއް ފިލްމު ކަމަށްވާ "ސޯނޫ ކޭ ޓިޓޫ ކީ ސްވީޓީ" ގެ ބަތަލާ އެވެ.

ބޮލީވުޑް ހަންގާމާ އިން ބުނިގޮތުގައި "ރާމް ސެތޫ" ގެ ޝޫޓިން ފަށާނީ މި އަހަރުގެ މެދުތެރޭގަ އެވެ. އަދި ފިލްމު އަންނަ އަހަރުގެ ދިވާލީގައި ގެނެސްދޭން ނިންމާފައިވާ އިރު، އޭގެ ޕޯސްޓަރު މިދިޔަ އަހަރު ދައްކާލާފައިވެ އެވެ.

މީގެ ޑައިރެކްޓަރަކީ އަބީޝެކް ޝަރުމާ އެވެ. އޭނާ އަކީ މިދިޔަ އަހަރު ރިލީޒްކުރި "ސޫރަޖް ޕޭ މަންގަލް ބާރީ" ގެ ޑައިރެކްޓަރެވެ. އަބީޝެކް ޑައިރެކްޓްކޮށްފައިވާ ފިލްމުތަކުގެ ތެރޭގައި ސޯނަމް ކަޕޫރްގެ "ދަ ޒޯޔާ ފެކްޓާ" އާއި ޖޯން އަބްރަހަމްގެ "ޕަރުމަނޫ: ދަ ސްޓޯރީ އޮފް ޕޮކްރާން" އަދި "ތެރެ ބިން ލާދިން" ހިމެނެ އެވެ.

މި އަހަރު ރިލީޒްވާން ހުރި އަކްޝޭގެ ފިލްމުތަކަކީ "ސޫރިޔަވަންޝީ" އާއި "ބެލް ބޮޓަމް" އާއި "އަތުރަންގީ ރޭ" ގެ އިތުރުން "ޕްރިތުވީރާޖް" އެވެ.