އަކްޝޭ ކުމާރު ކޮވިޑް-19 އަށް ޕޮޒިޓިވްވެއްޖެ

ބޮލީވުޑްގެ މަޝްހޫރު އެކްޓަރު އަކްޝޭ ކުމާރު ވެސް ކޮވިޑް-19 އަށް ޕޮޒިޓިވްވެ، ފިލްމީ މަސައްކަތްތައް ވަގުތީ ގޮތުން ދޫކޮށްލައި ކަރަންޓީނަށް ހިނގައްޖެ އެވެ.

އާދީއްތަ ދުވަހު އިންސްޓަގްރާމްގައި އަކްޝޭ ބުނީ މި ވަގުތު ހުރީ ރައްކާތެރިކަމުގެ ހުރިހާ ފިޔަވަޅުތަކެއް އަޅައިގެން އަދި ފަރުވާ އަށް ވެސް ހޯމް ކަރަންޓީނުގައި ކަމަށެވެ. އަދި ބަލިން ރަނގަޅުވެ، ވަރަށް އަވަހަށް އެނބުރި މަސައްކަތްތަކަށް ނުކުންނާނެ ކަމަށް ބުންޏެވެ.

އަކްޝޭ އަށް ކޮވިޑް ޖެހުނީ މިދިޔަ ހަފުތާގެ ތެރޭގައި ފިލްމު "ރާމް ސެތޫ" ގެ ޝޫޓިން ވެސް ފަށާފައި ވަނިކޮށެވެ. އޭނާ އަކީ ބޮލީވުޑްގެ އެކްޓަރުންގެ ތެރެއިން އެންމެ ބިޒީ އެކެކެވެ.

މި އަހަރު ރިލީޒްކުރަން ނިންމާފައި އޮތް އަކްޝޭގެ ފުރަތަމަ ފިލްމަކީ މި މަހުގެ 30 އަށް ތާވަލުކޮށްފައި އޮތް "ސޫރިޔަވަންޝީ" އެވެ. އެކަމަކު މިހާރު އިންޑިއާގައި ކޮވިޑްގެ ކޭސްތައް ވަރަށް ބޮޑަށް އިތުރުވަމުންދާތީ އެ ތާރީހުގައި ފިލްމު އެޅުވުމުގެ ފުރުސަތު ކުޑަ ކަމަށް މީޑިއާތަކުން ބުނެ އެވެ. ނަމަވެސް ފިލްމުގެ ތާރީހަށް ބަދަލެއް ގެނައިކަން އޭގެ ޓީމުން އަދި ނުބުނެ އެވެ.

މި އަހަރު ރިލީޒްވާން ހުރި އަކްޝޭގެ އިތުރު ފިލްމުތަކުގެ ތެރޭގައި އަންނަ މަހުގެ 28 ގައި ގެނެސްދޭ "ބެލް ބޮޓަމް" އާއި ޖޫން 6 ގައި ގެނެސްދޭ "އަތުރަންގީ ރޭ" އަދި ނޮވެމްބަރު 5 ގައި ގެނެސްދޭ "ޕްރިތުވީރާޖް" ހިމެނެ އެވެ.