އަޖޭ ދޭވްގަންގެ ވެބް ސީރީޒްގެ ނަމަކީ "ރުދުރާ"

ބޮލީވުޑްގެ އެކްޓަރު އަޖޭ ދޭވްގަންގެ އަލަތު ވެބް ސީރީޒްގެ ނަމާ އެކު އޭގެ ފަސްޓްލުކް ޕޯސްޓަރު ދައްކާލައިފި އެވެ.

ބީބީސީން އިޑްރިސް އެލްބާއާ އެކު ގެނެސްދިން "ލޫތާ" އަށް ބިނާކޮށް ހަދާ ސީރީޒްގެ ނަމަކީ "ރުދުރާ: ދި އެޖް އޮފް ޑާކްނެސް" އެވެ. މީގެ ސްޓިލް/މޯޝަން ޕޯސްޓަރު ސޯޝަލް މީޑިއާގައި ހިއްސާކޮށް އަޖޭ ބުނީ މި ކްރައިމް ޑްރާމާ އަކީ ވަރަށް ވަރުގަދަ އެއްޗަކަށް ވާނެ ކަމަށެވެ.

ބޮލީވުޑްގެ އެންމެ ކާމިޔާބު އެކްޓަރުންގެ ތެރޭގައި ހިމެނޭ އަޖޭގެ އަލަތު ވެބް ސީރީޒް ޑައިރެކްޓްކުރާނީ ރާޖޭޝް މަޕުސްކަރެވެ. ރިޕޯޓްތައް ބުނާ ގޮތުން މުޅި ސީރީޒް މުމްބާއީގައި ޝޫޓްކުރާ "ރުދުރާ" ގެ ބަތަލާގެ ރޯލު ކުޅޭނީ އިލިއާނާ ޑި ކްރޫޒެވެ.

އެކަމަކު އަދި ޑިޒްނީ ޕްލަސް ހޮޓްސްޓާ އިން ގެނެސްދޭ ގޮތަށް ހަދާ ސީރީޒްއާ ބެހޭ އިތުރު ތަފުސީލުތަކެއް ހާމައެއްނުކުރެ އެވެ.

ބޮލީވުޑްގެ އެންމެ ބިޒީ އެކްޓަރުންގެ ތެރޭގައި ހިމެނޭ އަޖޭ ވެބް ސީރީޒަކަށް ސޮއިކުރި އިރު އޭނާގެ ރިލީޒްވާން ހުރި ފިލްމުތަކުގެ ތެރޭގައި "ގަންގޫބާއީ ކަތިއަވާޅީ" އާއި "އާރްއާރްއާރް" އާއި "މައިދާން" އާއި "ބޫޖް: ދަ ޕްރައިޑް އޮފް އިންޑިއާ" ހިމެނެ އެވެ.

ސޮއިކޮށްފައި ހުރި އިތުރު ފިލްމުތަކުގެ ތެރޭގައި "ތޭންކް ގޯޑް" އާއި "ޗަނަކިއާ" އާއި ތަމަޅަ ފިލްމު "ކައިތީ" ގެ ރިމޭކާއި އަދި އަމިއްލަ އަށް ޑައިރެކްޓްކުރާ "މޭޑޭ" ހިމެނެ އެވެ.