ޓީވީ ބަތަލާއަކަށްވާތީ ފިލްމުތަކުން ފުރުސަތެއް ލިބުން ވަރަށް ދަތި: ކްރިސްޓަލް ޑި ސޫޒާ

ޓީވީ ބަތަލާއަކަށްވާތީ ބޮލީވުޑްގެ ފިލްމުތަކުން ފުރުސަތެއް ލިބުން ވަރަށް އުނދަގޫ ކަމަށާއި މީގެ ކުރިން ވެސް އެކަމާ ހުރެ ބައެއް ޕްރޮޖެކްޓްތައް ގެއްލިފައިވާ ކަމަށް ބަތަލާ ކްރިސްޓަލް ޑީ ސޫޒާ ބުނެފި އެވެ.

އިންޑިއާގެ މަޝްހޫރު ޓީވީ ބަތަލާއިންގެ ތެރޭގައި ހިމެނޭ ކްރިސްޓަލްގެ އެންމެ ފާހަގަކޮށްލެވޭ ސިލްސިލާ އަކީ ސްޓާ ޕްލަސް އިން 2011-2013 އަށް ގެނެސްދިން "އޭކް ހަޒާރޯ މޭ މޭރީ ބެހެނާ ހޭ" އެވެ.

ބޮލީވުޑް ބަބްލް އަށް ދިން އިންޓަވިއުއެއްގައި ކްރިސްޓަލް، 31، ބުނީ އޭނ މިހާތަނަށް ވަރަށް ގިނަ ފިލްމުތަކަށް އޮޑިޝަން ހެދި ކަމަށެވެ. އެކަމަކު ކޮންމެ ފަހަރަކު ވެސް ވަރަށް ހިތްދަތިވާ ގޮތަށް ފުރުސަތު ނުދީ ބޭރުކޮށްލަނީ ކަމަށް ބުންޏެވެ.

"އެއް ފަހަރަކު އޮޑިޝަނެއް ހަދައިގެން ފިލްމަކަށް ހޮވުނު ވެސް މެ. އަދި އޭގެ މަސައްކަތް ފަށަން ދެ ދުވަހަށް ވެފައި ވަނިކޮށް ގުޅާފައި ބުނީ ބަދަލުގައި މިހާރު އެހެން ބަތަލާއަކު ހަމަޖައްސައިފީމޭ. އަހަންނަކީ ޓީވީ ބަތަލާއަކަށްވާތީ ބޭނުމެއް ނުވެޔޯ ފިލްމުގައި ހިމަނާކަށް،" ކްރިސްޓަލް ބުންޏެވެ. "އެ ދުވަހު ވަރަށް ހިތްދަތިވެގެން ރޮވުނު."

އޭނާ ބުނި ގޮތުގައި ޓީވީ ބަތަލާއިންނާ ދޭތެރޭ ބޮލީވުޑުން މާ ދަށް ބައެއްގެ ގޮތުގައި ދެކޭ ސަބަބެއް ނޭނގެ އެވެ. އެކަމަކު ޓީވީގައި މަސައްކަތްކުރުމަކީ އެތައް ތަޖުރިބާއެއް ލިބޭ ކަމެއް ކަމަށާއި މިހާތަނަށް އެކްޓިން އިން ލިބުނު ހުރިހާ ތަޖުރިބާއެއް ލިބުނީ ޓީވީގައި މަސައްކަތްކޮށްގެން ކަމަށް ކްރިސްޓަލް ބުންޏެވެ.

ކްރިސްޓަލްގެ އަތުގައި މިހާރު ބޮލީވުޑްގެ ފިލްމެއް އެބައޮތެވެ. އެއީ މިދިޔަ މަހުގެ 9 ގައި ރިލީޒްކުރަން އުޅެފައި ކޮވިޑް-19އާ ހެދި ފަސްކޮށްފައިވާ "ޗެހެރޭ" އެވެ. އެ ފިލްމުގެ ކާސްޓްގައި އަމީތާބް ބައްޗަނާއި އިމްރާން ހާޝިމީގެ އިތުރުން ރިއާ ޗަކްރަބަތީ ވެސް ހިމެނެ އެވެ.

ރޫމީ ޖެފްރީ ޑައިރެކްޓްކޮށްފައިވާ އެ މިސްޓްރީ ތުރިލާ އިން ކްރިސްޓަލް އަށް ފުރުސަތު ލިބުނީ ކުރިން އެ ފިލްމުގެ ކާސްޓަށް ނެގި ކްރިތީ ކަރްބަންދާ ފިލްމު ދޫކޮށްލުމުންނެވެ.

މި ފަހުން ވީޑިއޯ ލަވަތަކުން ވެސް ފެންނަ ކްރިސްޓަލް މިހާތަނަށް ގިނަ ސިލްސިލާތަކުގެ އިތުރުން ވެބް ސީރީޒް ވެސް ކުޅެފައިވެ އެވެ.